АҚШ бош прокурори Жефф Сешнс январь ойида бўлиб ўтган сенат эшитишларида ўтган йилги президентлик сайлови давомида Россиянинг АҚШдаги элчиси билан икки марта суҳбатлашганини ошкор этмаган.
АҚШдаги Россия элчиси Сергей Кисляк билан ўтказилган суҳбатлар ошкор бўлиши ортидан демократлар Сешнсни истеъфога чиқишга ёки Россиянинг сайловга аралашуви бўйича Адлия вазирлиги ўтказаётган терговдан чиқиб кетишга чақирмоқда.
“Қасамёд қилганидан кейин Конгрессга ўзининг Россия билан мулоқотлари ҳақида ёлғон гапирган бош прокурор истеъфо бериши керак. Сешнс мамлакатимизнинг энг олий ҳуқуқ-тартибот офицери ўлароқ ишлашга муносиб эмас”, деди Вакиллар Палатасидаги етакчи демократ Нэнси Пелоси.
Сешнс президент Дональд Трампни дастаклайди, унга маслаҳатчилик қилиб келади.
Январь ойида ундан сайлов кампанияси иштирокчиларининг Россия билан алоқалари ҳақида сўралганида у бундай ҳолатлардан бехабарлигини таъкидлаган эди.
Адлия вазирлиги матбуот котиби Сара Исгур Флорес 1 март куни унинг жавобида ҳеч қандай ёлғон йўқлигини таъкидлади.
Матбуот котиби Сешнс ўтган йилда Сенатнинг қуролли хизматлар қўмитаси аъзоси ўлароқ 25дан ортиқ элчи билан учрашгани, мазкур учрашувлар Трампнинг сайлов кампанияси билан боғлиқ бўлмаганини айтди.
1 март куни кечқурун Сешнс томонидан эълон қилинган билдирувда: “Мен сайлов кампанияси масаласини муҳокама қилиш учун Россия расмийси билан учрашганим йўқ. Бу иддао нима ҳақида эканлигини билмайман. Бу ёлғон”, дейилади.
Прокурор Сешнс ва элчи Кислияк учрашувлари ҳақида биринчи бўлиб The Washington Post газетаси хабар тарқатди.
Бунинг ортидан бир неча демократ Сешнсдан Россиянинг сайловга аралашгани ҳақидаги даъволарни ўрганаётган Адлия вазирлиги терговидан чиқиб кетишни талаб қилди.
Вакиллар палатаси аъзоси Элиот Энгель: “У зудлик шундай қилиши керак”, деди.
Энгель шунингдек Россиянинг сайловда ўйнаган ролин ҳақидаги даъвони махсус прокурор текшириши кераклигини таъкидлади.
Вакил Адам Шифф 1 март куни MSNBC телеканли билан субатда Вакиллар Палатасининг Хорижий ишлар қўмитатасидаги республиклачилар ва демократлар Трамп атрофидагиларнинг Россия билан тил бириктиргани ҳақидаги иддаоларни тергов қилиш бўйича ёзма келишув имзолашганини билдирди.
Шифф руслар шантаж, пул ўндириш, тил бириктириш тактикаларидан фойдаланишганини, тергов давомида айнан шу жиҳатлар текширилиши лозимлигини таъкидлади.
Шифф терговга бўлган эҳтиёжнинг туғилишига сабаб сайлов давомида “демократиямизга ҳужум қилинди ва нималар содир бўлганини англаб етишимиз жуда муҳим”, деди.
