Ўзбек футбол ишқибозларининг ҳафсаласи пир бўлди

Чилонзор туман Ички ишлар бўлимидан олинган маълумотга кўра, 15 июн кунидан бошлаб "Бунёдкор" чиптахонаси олдига милиция ходимларининг махсус гуруҳи жўнатилади.

"Милиция чипта сотиш пайти тартибни сақлаб туриш учун назорат қилади", деди ИИБнинг ўзини таништирмаган ходими.

Дастлаб Ўзбекистон-Қатар ўйинига чипталар 13-14 июндан бошлаб сотувга чиқарилиши хабар қилинди. Кейинчалик бу сана 15 июн кунига ўзгартирилди.

Бунёдкор стадионининг ходимига кўра, ўйин чипталари сотилиши бўйича Ўзбекистон Вазирлар Маҳкамасининг махсус баённомаси чиқарилган бўлиб, ушбу ҳужжат асосида чипталарнинг қалбакилаштирилиши ва олибсотарлар қўлига ўтиб кетишининг олди олинади:

“Биз Вазирлар Маҳкамасининг ушбу баённомаси асосида ишлаяпмиз. Бизга турли ташкилотлар ёзма равишда мурожаат қилишади. Биз ушбу мурожаатни ўрганиб кўриб, кейин уларга чипта ажратамиз. Ҳозир Ўзбекистон Олий таълим вазирлигига 4000 чипта ажратдик. Шунингдек, Тошкентдаги ҳар бир туманга катта-кичиклигидан келиб чиқиб, 1 та ёки 2 тадан сектор ажратганмиз. Ҳокимликлар бу секторлар учун ажратилган чипталарнинг сотилиши учун масъул бўлади”, деди “Бунёдкор” стадиони ходими.

Суҳбатдошга кўра,10 мингта чиптагина эркин сотувга чиқарилади. Чипталар нархи балкон учун 25 минг сўм, пастки секторларга 20 минг сўм, иккинчи қават учун эса 15 минг сўм қилиб белгиланган.

Стадион ходими чипталарнинг нима учун бу қадар кеч сотувга чиқарилганини изоҳлашдан бош тортди.

18 июн куни Тошкентда ўтадиган Ўзбекистон ва Қатар ўртасидаги футбол учрашувига чипталар тамом бўлди. 17 июн – душанба куни эрта тонгдан “Бунёдкор” стадиони атрофига тўпланган юзлаб мухлисга милиция ходимлари шундай деб маълумот берди.

Қатар Футбол Уюшмаси Президенти ҳам Тошкентда ва у Қатарнинг машғулотларини кўриш учун "Бунёдкор" стадионига боради. #UZBQAT

— Sanjar Rizayev (@sanjarrizayev) June 17, 2013