Саддам адвокатлари суд билан ҳамкорликни давом эттириш учун жиддий шартлар¸ жумладан¸ судянинг ишдан бўшатилиши ва маҳкаманинг бошқа мамлакатга кўчирилишини талаб қилмоқда. Ҳозирча маҳкама бу талабларни эътиборга олгани йўқ.
Пайшанба куни Бағдодда ҳакам Рауф Абдул Раҳмон навбатдаги суд мажлисини очаркан:
“Раҳмдил Оллоҳ номи билан¸ Ироқ халқи номидан Ал-Дужайл ишини кўриб чиқувчи жиноий суднинг махсус юқори трибунали 10 сессиясини очиқ деб эълон қиламан”¸ - деди судя Абдул Раҳмон.
Аммо суд бу гапларни айтаëтган суд залида Саддам Ҳусайн ва унинг жиноий жавобгарликка тортилган 7 нафар шериги йўқ эди.
Суд мажлиси бошланди ва судя Абдул раҳмон судланувчилар ўринлари нега бўш эканлигини қисқача мана бундай изоҳлади:
“Саддам Ҳусайн¸ Барзан Иброҳим¸ Таҳа Ëсин¸ Авад ал-Бандерлар тўғрисида айтадиган бўлсам¸ уларнинг маҳкама жараëнига аралашишини инобатга олиб суд бугунги мажлисни улар иштирокисиз ўтказишга ва бу ишни кўриб чиқишни давом эттиришга қарор қилди”¸ - деб таъкидлади.
Унга кўра¸ қолган 4 нафар айбланувчи суд залига кириш олдидан ўзини нобоп тутгани боис¸ улар ҳам суд мажлисига қўйилмаган.
Жорий маҳкама жараëнида Саддам ва унинг 7 нафар шеригига қўйилаëтган 1982 йили шиалар яшайдиган Ал-Дужайл қишлоғида 148 одамни ўлдирганлик айби кўриб чиқилмоқда. Агар маҳкама жараëнида Саддам айбдор деб топилса¸ олий жазога ҳукм этилиши мумкин.
Бугунги суд жараëнида бир қатор гувоҳларнинг сўзлари тингланганидан кейин 13 февралга қадар танаффус эълон қилинди. Суд мажлисиниг 13 февралга қолдирилгани сабабларига оид тафсилотлар маълум қилинмади.
