Сўнгги бир ҳафта давомида Ўзбекистон қора бозорида АҚШ долларининг курси шиддат билан ўса бошлади.
12 март куни Тошкент қора бозорларида 7 минг 150 сўмдан сотилган 1 АҚШ доллари 15 мартга келиб, қарийб минг сўмга қимматлади - 7 минг 900 сўмга чиқди.
Dollaruz.com сайтининг ёзишича, 15 март куни тушга яқин Тошкентнинг айрим нуқталарида саррофлар 1 долларни 7800 сўмдан сотиб олган ва 7900 сўмдан сотган.
Озодлик манбалари, Тошкентнинг элетротехника, кийим-кечак бозорларида савдо қилувчи тадбиркорлар саросимага тушиб қолганини, товарларига қандай нарх қўйишга ҳайрон бўлиб қолганликларини айтмоқдалар.
Уч кунда 500 сўмга қимматлади
12 март куни Тошкентдаги қора бозорларда 1 АҚШ долларининг нархи янги рекорд кўрсаткич - 7500 сўмга чиққан эди. Ундан икки кун аввал эса АҚШ долларининг қора бозордаги курси 150 сўмга қимматлаб, 7400 сўмга тенглашган эди.
Озодлик тошкентлик қора саррофлардан олган бу маълумотларни 12 март куни шаҳарнинг бир неча қора пул бозоридаги вазият билан танишган фаол тингловчимиз Тошбек тасдиқлаган эди.
Тошбекнинг саррофлар ва пулини алмаштираётганлар билан қилган мулоқотларига таяниб айтишича, сўм қадрининг пасайишига одамларнинг “доллар қимматлаб кетармиш”, деган ваҳима ортидан ишламай ётган сўмларини алмаштиришга шошилиши, мавсумий омиллар, сўмнинг расмий курси сўнгги 1 ой ичида ҳафтасига қарийб 50 сўмдан кўтарилаётгани каби бир қатор факторлар туртки бўлган.
"Дўконларни ёпиб келдик"
Чилонзор буюм бозорида савдо қиладиган тадбиркорнинг айтишича, сўнгги кунларда доллар курсининг яшин тезлигида кўтарилиб бораётгани сабаб, савдода ҳам васваса бошланди:
"Ҳозир бир нарса сотишга ҳам ўйланиб қолдик. Чунки молнинг биз оладиган нархдан келадиган нархи жуда ошиб кетяпти. Ҳозир кўпчилик келган клиентларга баланд нарх айтиб, сотмай турибди. Биз ҳам обедгача дўконни очиб турдикда, кейин ёпиб уйга қайтиб келдик. Билмаймиз, эртага нима бўлади?", деди тадбиркорлардан бири.
"Автосалон ҳам сўмда машина сотмай қўйди!"
Озодлик тингловчиларидан бирининг ёзишича, ўзбек сўмида сотилиши шарт бўлган автомобилларнинг ҳам сотуви тўхтатилган:
"Assalomu aleykum ozodlika bitta savolim bor agar shunga toliq jb ololsam minator bolardim savolim shundan iboratki avtosalonda bitta moshina omoqchi bosam somda nega ololmiyman somda avtosalon saytida yozilgan misol uchun spark 3 pazisasa 28 miliyon xop man beraman shu 28 miloni naht desam yo ololmisan dolirda berishin kere deyishti uzbekistoni puli som emasmi nega dolirda sotishad somda bermas ekan nma sababdan 28 milyon deb yozib qoyilga undan kora toğridan toğri dolirda yozib qoymasmikan somga bermaganidan keyin va nma sababdan somga ololmaymiz sababni bilolmayaman. Agar shu savolimga jb olsam ozodlik radiosidan mamnun bolardim savolim bir cheta qolib ketmas degan umittaman oldindan raxmat", деб ёзди тингловчилардан бири.