Линклар

Шошилинч хабар
17 август 2019, Тошкент вақти: 23:05

Халқаро янгиликлар

Олтинчи кундирки Исроил Ливан узра ҳаво ҳужумларини амалга оширмоқда.

Душанба тонги Исроил ҳарбий учқичлари шундоқ ҳам ҳужумлардан талафот кўрган Байрут халқаро аэропорти ҳамда кўприк, йўлларни ҳамда Ливаннинг иккинчи йирик шаҳри Триполи яқинидаги ҳарбий объектларни ҳаводан нишонга олган. Ҳаво ҳужумлари оқибатида 15 киши, жумладан етти ливанлик аскар нобуд бўлгани хабар қилинмоқда. Исроил бу амалиётни икки аскари Ҳизбуллоҳ жангарилари томонидан олиб қочиб кетилиши ортидан бошлаб юборган эди. Ўтган тунда Исроил ҳаво зарбалари оқибатида Ливанда 36 киши ҳалок бўлди.
Канада Ташқи ишлар вазири Питер МакКайга кўра, ҳалок бўлганлар орасида саккиз Канада фуқароси ҳам бор. Шунингдек, бугун Исроил учқичлари Ғазода Фаластин мухторияти ташқи ишлар вазирлиги биносига ҳаводан зарбалар берган. Оқибатда уч кишининг яралангани хабар қилинмоқда. Фаластин ташқи ишлар вазирлигига қилинган аввалги ҳаво ҳужумлари оқибатида бинога жиддий шикаст етган эди.
Айни дамда Ливандаги жангари гуруҳ Ҳизбуллоҳ Исроилнинг Афулу ҳамда учинчи йирик шаҳри бўлмиш Хайфага ўнлаб ракеталар отган ва камида саккиз кишини ўлдирган. Илк ракеталар темир йул омбори атрофига эрталабги тиғиз пайтда отилган. Ракета келиб тушган маҳал қурбон бўлган саккиз киши темир йўл хизмати ишчилари деб айтилади. Бош вазир Эхуд Олмерт ҳужумларни даҳшатли деб таърифлаган ва ҳодисаларнинг жиддий оқибатларга олиб келишидан огоҳлантирган. Ҳизбуллоҳ Исроилга чоршанба кунидан бери 400та ракета отган. Беш кун давомида Исроил томонидан амалга оширилган ҳаво ҳужумларида эса аксари тинч фуқаролар бўлган камида 100 ливанлик ҳаётдан кўз юмган.
Айни дамда Ливандан хориж фуқаролари эвакуция қилинмоқда. Италия ва Греция ҳарбий учқичлари Австрия, Испания, Италия, Чехия, Ирландия фуқаролари бўлган жами 350 одам Қибрисга олиб ўтган. Бортида 400 одам билан Италия кемасининг бугун Қибрис портига келиши кутилмоқда. Шунингдек, Франция ҳам Ливандан ўз фуқароларини эвакуация этиш учун махсус кема жўнатган. Кеманинг бугун Ливан бандаргоҳига келиши кутилмоқда.

Ҳам Исроил ҳам Ливан томонида қурбонлар ва яраланганлар сони ортиб борар ва можаро кўламининг бутун минтақа бўйлаб ёйилиши хавфи кучаяр экан, Хавьер Солана бошлиқ Европа Иттифоқи делегацияси можарони дипломатик ҳал этиш ниятида Байрутга ташриф буюрган.
Жаноб Солананинг бугун Ливан Бош вазири билан учрашиши кутилмоқда. Шунингдек, БМТнинг махсус гуруҳи ҳам Ливанда, Байрут ҳукуматининг ўт очишни тўхтатиш чақириқларини қўллаб қувватлаган ва айни пайтда икки Исроил ҳарбийсининг қўйиб юборилишини Ливан ҳукуматидан талаб этган.

Кеча Минскда Россия элчихонаси олдида норозилик пикети ўтказган 30 киши хибсга олинди.

Норозилар қўлларида сиёсий махбуслар портретларини кўтариб, Москва ҳукумати Беларус раҳбари Александр Лукашенкони дастаклашни бас қилсин, деган талабда Россия элчихонаси олдида тўпланган эди. Хибсга олинганлар орасида Беларус мухолифати етакчиларидан бири Анатолий Лебедко ҳам бор. Полиция шунингдек, норозилар кўтариб олган портретларни ҳам мусодара этган.

Россиянинг Санкт Петербург шаҳрида ўтаётган “катта саккизлик” саммитида ҳам Яқин Шарқда кечаётган воқеалар юзасидан баёнотлар янгради.

Германия Канцлери Ангела Меркел "катта саккизлик" етакчилари, шунингдек Россия раҳбарияти ҳам Ҳизбуллоҳ қўлга олган исроилликларни қўйиб юбориши ва Исроилга қарши ҳужумларни тўхтатишини талаб этаётганини билдирди. Шунингдек, "катта саккизлик" Исроилга ҳам Ливанга қарши ҳужумларни тўхтатиш талабини қўйган. Қўшма Штатлар эса Исроил ташқи ҳужумдан ўзини мудофаа этиш ҳаққига эгалигини айтиб келади. Жаноб Буш Яқин Шарқдаги бу воқеаларга жавобгарликни Ливандаги Ҳизбуллоҳ жангари гуруҳи зиммасига юклаган.
”Ҳозирги низога дахлдор бўлган аҳамиятли жиҳатлардан бири – унинг Яқин Шарқдаги беқарорликнинг асл илдизидан тутганидир. Мен Ҳизбуллоҳ гуруҳи ва унинг Сурия билан алоқадорлигини назарда тутаяпман. Шу боис, бу муаммони ҳал қилиш учун унинг илдизларига эътибор қаратиш керак”, - деди Буш.
Шунингдек, Британия Бош вазири Тони Блэр ҳам Ҳизбуллоҳ гуруҳини Яқин Шарқда барқарорлик ўрнатиш жараёнини издан чиқаршига уринаётганликда айблади.
Бугун “катта саккизлик” саммитининг иккинчи куни, Хитой, Ҳиндистон, Бразилия, Жанубий Африка Республикаси етакчилари ҳамда БМТ Бош Котиби Кофи Аннан, Халқаро Атом энергияси агентлиги бошлиғи Муҳаммад Ал Барадей, Жаҳон банки президенти Пол Вулфовицларнинг Санкт Петербургдаги олий даражадаги учрашувга қўшилиши кутилмоқда. Кеча “катта саккизлик” етакчилари саммитнинг қатор якуний ҳужжатлари, жумладан глобал энергетика хавфсизлиги, таълим, эпидемик бўхронларнинг олдини олиш, коррупция ҳамда ақлий мулк қароқчилигига қарши курашишга оид ҳужжатлар имзолади.

Хитойда тропик довул оқибатида камида 115 одам нобуд бўлган.

Мамлакат жануб шарқида рўй берган ушбу табиий офат юзлаб уйларни вайрон қилган. Минглаб одам бош панасиз қолган. Офат рўй берган қишлоқлардан аҳоли эвакуация этилмоқда.

Таниқли эронлик диссидент Акбар Ганжий Америка жамоатчилиги эътиборини мамлакатидаги инсон ҳуқуқлари холатига қаратиш мақсадида АҚШга сафар қилмоқда.

Ганжий бир неча йиллик қамоқ жазосидан сўнг яқинда озодликка чиқарилган эди. У АҚШга келишдан аввал қатор Европа давлатларида бўлди.

Афғонистон Мудофаа вазири жорий йил оҳирига қадар мамлакатда Толибон қаршилигига чек қўилишини билдирди.

Генерал Абдул Раҳим Вардак бу ҳақда "Файненшл Таймс" газетасига таъкидлаган. Жаноб Вардакга кўра, Толибон қўмондонлиги яксон этилган ва кўпгина толибон қўмондонлари Покистонга қочган. Бир кун аввал Афғонистондаги АҚШ ҳарбий қўмондонлиги мамлакатда афғон маъмурияти тўлиқ назоратни қўлга олмагунча аксил-толибон амалиётлари давом этишини айтган. Коалиция кучларининг даъво қилишича, Хелманд вилоятида олиб борилган кечаги амалиётларда 70дан ортиқ толибон жангариси ҳалок бўлган.

Ироқ шимолида рўй берган портлаш оқибатида камида 23 киши нобуд бўлди.

Киркук шаҳридан 75 чақирим узоқликдаги Туз Ҳурмати шаҳарчасида, гавжум қавоқхона яқинида худкуш машинага ўрнатилган портлаш мосламасини ҳаракатга келтирган. Айни пайтда кеча Бағдодда нефт ширкати раҳбарларидан бири ўғирлаб кетилган. Басрадаги отишмада эса Британия аскари ҳалок бўлган эди.

Михаил Шумахер саккизинчи бор "Формула 1" бўйича Францияда ўтган мусобақасининг Гран-при совринини қўлга киритди.

Бу рекорд натижадир. Ҳаммаси бўлиб "асфалт қироли" Шумахер 88 марта ғалаба қилган. Етти карра жаҳон чемпионидир.

Американинг "Дискавери" космик кемаси Ерга қайтмоқда.

Бортида олти астронавт бўлган ушбу кеманинг бугун кечга яқин Флорида штатидаги космодромга қўниши кутилмоқда.

Санкт-Петербург шаҳрида “катта саккизлик” давлатлари саммити давом этди.

Унда асосий эътибор Яқин Шарқда юзага келган бўҳронга қаратилди. Шунингдек, глобал энергетик хавфсизлик, таълим ва инфекцион касалликлар эпидемиясига қарши кураш масалалари муҳокама этилди ва айрим ҳужжатлар қабул қилинди.
Шунингдек, Россия, Британия, Германия, Италия, Канада, АҚШ, Франция ва Япония давлат етакчилари, бугун, “ёшлар саккизлиги” деб номланаётган гуруҳ вакиллари билан ҳам учрашди.

Пхенян БМТ Хавфсизлик кенгашининг Шимолий Корея ракета синовларини қораловчи резолюциясига ўзининг алоқадорлиги йўқ, деб ҳисобламоқда.

Мамлакат Ташқи ишлар вазири баёнотида айтилишича, бу резолюция АҚШ нинг “душманлиги” натижасида қабул қилинган ҳужжатдир. Пхенян яна бир бор, мамлакат мудофаасини кучайтириш учун ҳарбий дастурни ривожлантиришни давом эттиражагини таъкидлади.
БМТ Хавфсизлик кенгаши томонидан қабул қилинган резолюцияда яқинда Шимолий Корея томонидан баллистик ракеталарнинг учирилганини қораланган ва Шимолий Кореяга нисбатан оммавий қирғин қуроллари ишлаб чиқаришда зарур барча маҳсулотлар бўйича эмбарго жорий этган.

Россия ҳукумати Ливан билан боғлиқ ҳозирги низони фақатгина Яқин Шарқ бўйича мавжуд халқаро келишувлар доирасида ҳал қилиш мумкин, деб баёнот берди.

Санкт-Петербург шаҳрида ўтаётган “катта саккизлик” саммити давомида Россия Ташқи ишлар вазири баёнот берди.
“Ливандаги вазият фалокат ёқасида турибди. Бу ерда ечим битта – БМТ Хавфсизлик кенгашининг Ливан ва Исроил хавфсизлиги кафолатлари тўғрисида ва умуман, Яқин Шарқ низосига оид резолюцияси бор. Саммит иштирокчилари бу масалани муҳокама этиши аниқ, бироқ саммит якунида бу борада умумий мурожаатнома қабул қилинадими ёки йўқми – буни саммит раиси ҳал қилади”, - деди Россия Ташқи ишлар вазири.

АҚШ ҳамда Британия Яқин Шарқда авж олган ҳозирги зўравонлик учун бор айбни “Ҳизбуллоҳ” гуруҳи зиммасига юкламоқда.

Петербург шаҳридаги катта саккизлик давлатлари саммитида қатнашаётган икки давлат етакчилари экстремистлар ортида Сурия ва Эрон турибди, деб таъкидлаб ўтди.
АҚШ президенти Жорж Буш, жумладан, шундай деди: “Ҳозирги низога дахлдор бўлган аҳамиятли жиҳатлардан бири – унинг Яқин Шарқдаги беқарорликнинг асл илдизидан тутганидир. Мен “Ҳизбуллоҳ” гуруҳи ва унинг Сурия билан алоқадорлигини назарда тутаяпман. Шу боис, бу муаммони ҳал қилиш учун унинг илдизларига эътибор қаратиш керак”.
Британия Бош вазири Тони Блэр “Ҳизбуллоҳ” гуруҳини Яқин Шарқда барқарорлик ўрнатиш жараёнини издан чиқаршига интилишда айблади.
“Низонинг бош сабаби шуки, бу ерда икки давлат хавфсизлиги таъминланиши керак бўлган Исроил ҳамда, том маънода, мустақил бўлган Фаластин давлатининг тинч мавжудлигини истамайдиган экстремистлар бор. Уларнинг ортида Сурия ва Эрон турибди. Экстремистлар бу ерда таранг вазият ва душманлик кайфиятини қўзғатиш учун Ливаннинг тинчини бузмоқчи ”, - деди Британия Бош вазири Тони Блэр.

Ливан ҳукумати халқаро ҳамжамиятни Исроилнинг Ливанга нисбатан ҳарбий ҳужумларини тўхтатишда ёрдамга чақирди.

Ливан Бош вазири Фуад Синиора, яна бир бор “Ҳизбуллоҳ” ҳаракати томонидан яҳудий аскарларининг ўғирлангани учун Байрут жавобгар эмас, деб таъкидлади.
Шунингдек, Исроил ҳарбийлари бугун ҳам Ғазо шимолига кириб борди. Уч нафар фаластинлик ўлдирилди, 10 нафари жароҳатланди.

“Ҳизбуллоҳ” гуруҳининг Исроилдаги Хайфа шаҳрига уюштирган янги ракета ҳужумлари оқибатида 9 одам ўлдирилди, 20 га яқини жароҳатланди.

Шунингдек, мамлакат жанубидаги Акко шаҳри ҳам ўққа тутилган. Исроил Бош вазири Эҳуд Олмерт “Ҳизбуллоҳ” гуруҳи ҳали бу ҳаракатларининг “узоқ давом этувчи” ёмон оқибатини кўражагини айтиб, огоҳлантирди.
Бунга жавобан эса, “Ҳизбуллоҳ”гуруҳи раҳбари, Хайфа шаҳрига уюштирган отишмалар билангина чекланмаслигини айтиб, баёнот берди.
Бугуннинг ўзида Исроил ҳарбий кучлари Байрут шаҳри яқинида ҳаво ҳужумларини амалга оширди. Ҳужумлардан жабрланганлар ҳақида маълумотлар йўқ. Хабарларга кўра, Исроил ҳарбийларининг тўрт кундан буён Ливан ҳудудида олиб бораётган ҳаракатлари чоғида тинч аҳолидан 35 нафари ўлдирилган. Уларнинг 15 нафари болалардир.

Саудия Арабистони ва Қувайт давлатлари бугун Ливаннинг Исроил ҳужумларига учраган аҳолиси учун 70 миллион АҚШ доллари миқдорида ёрдам пули ажратди.

Бу ёрдамлар Ливан Бош вазири Фуад Синиоранинг мамлакати аҳли ҳарбий ҳаракатлардан сўнг ҳалокат ҳудудига айлангани тўғрисида баёнот берганидан сўнг ажратилди. Бу маблағнинг 50 миллиони Саудия Арабистони, 20 миллиони эса Қувайт томонидан ажратилди.

Европа Иттифоқининг ташқи сиёсат бўйича расмийси Хавер Солананинг яқин кунлар ичида Байрутга бориши хабар қилинди.

Маълумотларга кўра, у Яқин Шарқда юзага келган бўҳрон юзасидан Ливан расмийлари билан музокара юритади.
Европа Иттифоқи расмийсини Британиянинг Қибрисда жойлашган ҳарбийлари Байрутга етказадиган бўлди.
Хавер Солана айнан кимлар билан учрашиши эса ҳали номаълум.

Эрон ҳукумати Теҳрон Ливанга ҳарбий жўнатмаган ва “Ҳизбуллоҳ” гуруҳини қувватламаган, деб баёнот берди.

Бу ҳақда Эрон Ташқи ишлар вазирлиги расмийси маълум қилди.
Исроил томонидан олинган маълумотларга кўра, Теҳрон тахминан 100 га яқин малакали ҳарбийни Ливан ҳудудига жойлаштирган ва жума куни Исроил патрул кемасига уюштирилган ракета ҳужумига техник ёрдам берган.
Шунингдек, бугун расмий Теҳрон Эрон ядровий дастури теграсидаги бўҳронни ҳал этиш юзасидан берилган халқаро таклифлар мажмуини музокаралар учун “асосли” деб ҳисоблашини билдирди.
Бу ҳақда катта саккизлик давлатлари саммитида иштирок этаётган Эрон ташқи ишлар вазирлиги расмийси маълум қилди. Айни вақтда у саммит иштирокчиларини Эрон билан мулоқот йўлини танлашга чақирди.

Бугун эрталаб Санкт-Петербург шаҳрида Милиий Болшевик партиясининг 30 дан ортиқ аъзоси қўлга олинди.

Улар шаҳар марказидаги “Прибалтийская” ва “Рэдиссон” меҳмонхоналари олдида ҳукуматга қарши шиорлар билан намойишга чиққан эди. Мухолифатнинг яна бир гуруҳи эса Александр Невский кўпригида “Ўз ихтиёринг билан кет, Путин!” ёзувли шиорни кўтаришди.
Куни кеча “катта саккизлик” давлатлари саммити биринчи кунида Петербург шаҳрида 29 нафар антиглобалист қўлга олинди. Улардан беш нафари қўйиб юборилган, қолганларининг иши эса судга оширилган.

Айни вақтда АҚШ, Франция, Британия, Швеция, Полша, Белгия ва Руминия ҳукуматлари Ливандаги юзлаб фуқароларини зудлик билан мамлакатдан эвакуация қилиш ҳаракатида.

Хусусан, АҚШнинг 25 мингга яқин фуқароси ҳозирда Ливанда. Швеция фуқаролари эса 4 мингдан ортиқ экани айтилмоқда. Полша, Руминия ва Белгия эса ҳозирда ўз фуқароларини эвакуация қилиш учун махсус парвозларга ҳозирлик кўрмоқда. Италия ва Испания эса ўз фуқароларини олиб чиқиб кетиб бўлди.

Санкт-Петербургда “Катта саккизлик” саммити очилди.

Саноати ривожланган саккиз давлат раҳбарларининг олий даражали учрашувига Россия биринчи бор мезбонлик қилмоқда.
Саммитнинг асосий тадбирлари 16 – 17 июль кунлари ўтказилади.

Исроил авиацияси ва артиллерияси Ливаннинг жануби ва шарқидаги ҳамда Ғазо минтақасидаги объектларга бугун янги зарбалар берди.

Натижада Ливаннинг Сурия билан чегарасига яқин қишлоқда 3 киши ўлди. Исроилнинг ҳарбий операцияси бошланганидан буён ўтган 4 кун давомида нобуд бўлганлар сони 70 кишига етди.
Исроил томонининг хабар қилишича, тунда Ливан ҳудудидан ракеталар отилган ва тинч аҳолидан 4 киши нобуд бўлган.
Шунингдек, ўтган кеча-кундузда Ливан соҳилида Исроил ҳарбий кемасига замбарак ўқи тегиб, исроиллик 4 ҳарбий хизматчи бедарак йўқолди.
Мазкур воқеа учун масъулиятни “Хизбуллоҳ” гуруҳи ўз зиммасига олди.

Суриядаги етакчи Баас партияси раҳбарияти “Хизбуллоҳ” гуруҳининг Ливандан туриб Исроилга қарши амалга ошираётган ҳаракатларини мутлақ қўллаб-қувватлаяжаги тўғрисида бугун яна бир баёнот берди.

АҚШнинг БМТдаги вакили Жон Болтон кеча Сурия ва Эрондан "Хизбуллоҳ" гуруҳини қўллаб-қувватлашни тўхтатишни талаб қилди.
БМТ Хавфсизлик кенгашининг жума куни ўтказилган фавқулодда мажлисида Ливандаги вазиятнинг кескинлашиб кетгани туфайли бу мамлакатга махсус делегация юборишга қарор қилди.

Санкт-Петербург яқинида Россия ва АҚШ президентлари Владимир Путин ва Жорж Буш ўртасида расмий сўзлашувлар бўлиб ўтди.

Учрашувда бошқа масалалар қаторида Яқин Шарқдаги кескинлашиб кетган вазият муҳокама қилинди.
Буш зиддиятнинг авж олиб кетишида Фаластиндаги радикал "Хизбуллоҳ" гуруҳини айблади ва унинг жанггариларини "зудлик билан қуролсизланишга" чақирди.
- Зўравонликнинг тўхтатилишидан ҳаммамиз ҳам манфаатдор эканлигимизни тушунсангиз керак. Зўравонликни тўхтатиш учун, менимча, уни келтириб чиқарган сабабни аниқлаб олиш лозим. Сабаб эса, "Хизбуллоҳ"нинг Ливан ҳудудидан туриб Исроилни ракеталардан ўққа тутгани, исроиллик икки аскарни қўлга олгани бўлди. Мана зиддиятнинг сабаби. "Хизбуллоҳ" зудлик билан қуролни ташласа ва ўз ҳужумларини тўхтатса, куч ишлатиш тўхтатилади. Шу муносабат билан мен Сурияни "Хизбуллоҳ" гуруҳи раҳбариятига таъсир ўтказишга чақираман, - деди Жорж Буш.
Владимир Путин Бушнинг гапини маъқуллаб, Исроилнинг ҳарбий куч ишлатиши вазиятга “мутаносиб бўлиши лозим”, деб қўшиб қўйди.



Россия президентига кўра, икки давлат “ядровий терроризм” таҳдидига глобал миқёсда қарши ҳаракат қилиш тўғрисида келишувга эришди.
Мазкур келишув режасига кўра потенциал террорчилар ҳаракатлари ва ядровий материаллар ташилиши назорат қилинади ҳамда ядровий қуролни қўлга киритишга муваффақ бўлган террористик гуруҳларга қарши ҳамкорликда қарши турилади.
Сўзлашув натижаларини шарҳлар экан, Владимир Путин: - Россия томони учрашувнинг натижаларидан қониқиш ҳосил қилди. Бу учрашув Россия билан АҚШ ўзаро ишончли ҳамкорлар эканини яна бир бор намойиш қилди. Биз икки томонлама ва халқаро сиёсатнинг бир қатор ҳал қилувчи масалалари бўйича келишиб олдик, атом энергетикасини хавфсиз ривожлантириш бўйича параллель ташаббусларимиз – қабул қилганимиз қўшма баёнотга асос бўлди, - деди.
Жорж Буш Шимолий Корея ва Эронни ядровий соҳада ўтказаётган изланишларидан воз кечтириш учун Москва билан Вашингтон биргаликда ҳаракат қилажагини билдириб, жумладан мана бундай деди: - Биз Шимолий Корея ва Эронни муҳокама қилдик ва бу масалаларнинг кескинлиги бироз юмшагандай бўлди, чунки эндиликда бу мамлакатлар ҳукуматларига уларнинг ядровий иддаолари қабул қилиб бўлмаслигини биргаликда уқдириб қўйишга Россия ва АҚШ тайёр.
АҚШ президентининг маълум қилишича, Россиянинг Жаҳон савдо ташкилотига кириш масаласи ҳозирча узил-кесил ечимини топмади. Бу масала юзасидан сўзлашувлар давом эттирилади, деб қўшиб қўйди Жорж Буш.

Санкт-Петербургда “Катта саккизлик” саммитига қарши митинг бўлиб ўтди.

Коммунистлар уюштирган тадбирда мухолифатдаги партиялар ва жамоат ташкилотларининг 200 нафар атрофидаги вакили қатнашди.
Митинг уюштирувчиларидан бири, Ёш коммунистлар уюшмаси лидери Сергей Удальцов Рейтер ахборот агентлигига берган интервьюсида жумладан бундай деди:
- Саккизлик ғайриқонуний, нолегитимдир, деб ҳисоблаймиз. Дунёнинг тақдирини қандайдир элита эмас, балки барча мамлакатлар манфаатларини ҳимоя қиладиган демократик форум ҳал қилиши керак. Шунинг учун ҳам асосий шиоримиз “Саккизлик ғайриқонуний”, деган шиордир.
Жума куни Санкт-Петербургда ўзини “Глобализмга қаршиларнинг аксилсаммити” уюштирувчиларидан бири, деб таништирган Илья Пономарёв ҳамда “Қизил ёшлар авангарди” ҳаракатининг бир неча фаоли қўлга олинган эди.

Давомини ўқинг

XS
SM
MD
LG