Линклар

Шошилинч хабар
25 август 2019, Тошкент вақти: 16:02

Халқаро янгиликлар

НАТОНинг Афғонистон жанубидаги тинчликпарвар кучлари сони яна кўпайтириладиган бўлди.

НАТО қўшинлари раҳбари Дэвид Ричардснинг мълум қилишича, сўнгги ойда 6 минг ҳарбий Афғонистон жанубига жўнатилади.
Тобора нотинчлашиб бораётган Афғонистон жанубидаги Қандаҳор вилоятида бомба ўрнатилган автомобиль портлаши оқибатида тинч аҳолидан тўрт киши ҳалок бўлди, 12 нафари жароҳатланди. Худкуш Канада ҳарбийларининг икки автомобили ўртасида машинасини портлатди.
Айни ҳудудда содир бўлган тўқнашув чоғида эса тўрт афғон полициячиси ва толиблардан камида еттитаси ўлдирилган.

Исроил бош вазири Эҳуд Олмерт Миср президенти Ҳусни Муборак билан учрашди.

Мисрга кетишдан олдин Э.Олмерт ҳукумат йиғилиши ўтказиб, Ҳусни Муборак билан Исроил-Миср муносабатларини муҳокама қилишини маълум қилди.
“Хабарингиз бор, Миср президенти билан икки давлат ўртасида муҳим бўлиб турган кўплаб масалаларни муҳокама қиламиз. Бу араб мамлакатлари орасидаги етакчи давлат билан алоқаларни мустаҳкамлашга оид музокараларнинг бир қисми бўлади”, - деди Исроил бош вазири.

Ироқ ҳукумати Россия элчихонасининг гаровга олинган тўрт ходимини озод қилиш учун барча тезкор чораларни кўрмоқда.

Бу ҳақда Ироқ ташқи ишлар вазири Ҳушёр Забарий маълум қилди.
Сал аввал Ироқ телевидениеси Россия элчихонасининг шанба куни гаровга олинган тўрт ходими озод этилганини хабар қилган эди. Бироқ бу ахборот тасдиқланмади.
Шанба куни россиялик дипломатларни ўғирлаш чоғида улардан бири Виталий Титов ўлдирилган эди.
Айни вақтда Ироқда террорчилик ҳужумлари давом этмоқда. Бугун содир этилган ҳужумлар оқибатида 30 га яқин одам қурбон бўлгани хабар қилинди.

Эроннинг олий диний раҳбари оятулло Али Ҳуманаий агар АҚШ ҳукумати Эронга зарба бермоқчи бўлса, жавоб тариқасида мамлакати бу ҳудуддан нефть ўтишига тўсқинлик қилиши мумкинлиги ҳақида баёнот берди.

“Агар сиз Эронга нисбатан хатога йўл қўйсангиз, ундан сўнг бизнинг ҳудуддан нефт етказилиши ҳам хавф остида қолади”, - деди оятулло АҚШ ва бошқа мамлакатларга мурожаатида.
А.Ҳуманаийнинг сўзларига кўра, бу ҳолда глобал энергетик инқироз юзага келади. Чунки Эрон Форс кўрфазини Ҳинд океани билан боғлаб турувчи Ҳурмуз бўғозидан ўтадиган танкерлар йўлини тўсиши мумкин.

“Интерфакс” агентлигининг хабар қилишича, жума куни Москвада тожикистонлик фуқарога ёшларнинг бир гуруҳи ҳужум қилган.

Улар миллатчилик мазмунидаги шиорларни бақириб айтган ва хорижлик фуқарони металл таёқлар билан калтаклаган.
Жабрланувчи бош мия жароҳати ва бошқа жароҳатлар билан шифохонага ётқизилди.
Ҳозир жиноятни содир этганликда гумон қилинаётган 17 ёшли мактаб ўқувчиси қўлга олинган.

Чехияда шанба куни якунлаган парламент сайловидан сўнг мавҳум вазият юзага келди.

Сайлов натижаларига кўра, сўл ва ўнг марказчи кучларнинг ҳар бири парламентнинг қуйи палатасида юзтадан ўринга эга бўлди. Бу эса сиёсий кучларнинг ҳеч бири ҳукумат тузиш учун зарур миқдорда ўринга эга бўлмаганини кўрсатади.
Чехия президенти Вацлав Клаус коалиция ташкил этиш тўғрисида топшириқ беражагини маълум қилди. Унинг айтишича, 35 фоиз овоз тўплаган Фуқаровий демократик партия ва 32 фоиз овоз тўплаган ҳамда 8 йилдан буён амалда бўлган Социал демократлар партияси ҳамкорликда ишлаш бўйича музокара бошлаши лозим.
“Биз христиан демократлар ва яшиллар партияси билан қўшма сиёсий дастур тузишга уриниб кўрамиз. Бу, албатта, ислоҳотлар дастурида айрим ўзгаришлар бўлишидан далолат беради. Аммо тубдан ўзгаришлар бўлади, деб бўлмайди”, - деди Фуқаровий демократик партия лидери Мирослав Тополанек.

Канаданинг Торонто шаҳри теграсида аксилтеррор ҳаракатлари чоғида 17 киши ҳибсга олинди, катта миқдорда портловчи модда қўлга киритилди.

Полиция вакилининг маълум қилишича, ҳибсга олинганлар Онтарио штатида террорчилик ҳаракатларини режалаштиришда гумон қилинмоқда.
Канада бош вазири Стивен Ҳарпер мамлакат ҳануз террор хавфи остида турганидан огоҳлантирди.
“Биз террорчиларнинг асосий нишонимиз. Чунки улар биздан, турмуш тарзимиздан нафратланади. Улар жамиятимиз, маданий ва этник хилма-хиллигимиз, қадриятларимиздан нафратланади”, - деди Канада бош вазири.

Бугун Пекин шаҳрининг Тяньаньмэнь майдонида талабалар намойиши қонли тарзда бостирилганига 17 йил тўлди.

Сана муносабати билан Хитой пойтахтида хавфсизликни сақлаш чоралари кучайтирилган.
1989 йилнинг 4 июнида Хитой ҳукумати талабаларнинг демократик чиқишини бостириш учун ҳарбий қудратини ишга солган, танклар қўллаган эди. Маълумотларга кўра, юзлаб намойишчилар қурбон бўлган. Айрим манбаларда эса уларнинг сони мингдан ортиши мумкинлиги айтилади. Бироқ қурбонларнинг аниқ сони ҳозиргача маълум эмас.

Феодосия шаҳрида Украинанинг НАТОга аъзо бўлишига қаршилар иштирокидаги норозилик намойиши давом этмоқда.

Намойишчилар Феодосия денгиз портини ўраб олган.
Шу портга “Си Бриз-2006” халқаро ҳарбий машқлари учун мўлжалланган техника ва жиҳозлар келтирилган эди.
Американинг 109 денгиз пиёдаси ҳозир Феодосия сиҳатгоҳларидан бирига кўчирилди. Сиҳатгоҳда АҚШ ҳарбийларидан яна 150 таси бор. Улар бир неча кун аввал Қримда ўтказилиши кўзланган ҳарбий машқларда қатнашиш учун келган эди.

Ироқнинг Басра шаҳридаги бозор ташқарисида худкуш бошқарган машинага ўрнатилган бомба портлаши оқибатида 15 киши ҳалок бўлди, 30 одам яраланди.

Ироқ ҳукумати жангари гуруҳларни йўқ қилиш мақсадида уч кун олдин Басрада коммендантлик соати жорий қилган эди.
Бақуба шаҳрида полиция текширув пунктига қилинган ҳужум оқибатида полициянинг камида олти ходими нобуд бўлди, икки нафари яраланди.
Ироқ полицияси ходимлари Бағдоддан шимолда жойлашган шаҳарда одамнинг саккиз бошини топди. Улардан бир нечтаси шифохона соқчиларига тегишли экани айтилмоқда.

Бағдодда Россия элчихонасининг бир ходими отиб ўлдирилди, тўрттаси ўғирлаб кетилди.

Ироқ Ички ишлар вазирлиги маълумотига кўра, қуролланган номаълум шахслар Бағдод туманларидан бирида Россия дипломатлари кетаётган машинанинг йўлини тўсиб, ўт очган.
Москвада Россия Ташқи ишлар вазирлиги тарқатган баёнотда дипломатларни озодликка чиқариш учун Россия ҳукумати Ироқ раҳбарияти ва халқаро ҳамжамият билан бирга иш олиб бораётгани қайд этилади.
Шунингдек, ҳужжатда элчихонанинг ҳалок бўлган ходими жасади ўликхонага олиб борилгани билдирилган.

Афғонистон Ички ишлар вазирлигининг юқори лавозимли 86 амалдори ишдан олинди.

Улар орасида Кобул полицияси бошлиғи генерал Абдул Жамил Жумбеш ҳам бор.
Бу 2001 йилда толиблар ҳокимиятдан ағдарилганидан бери Афғонистон Ички ишлар вазирлигида амалга оширилаётган энг катта ўзгаришдир.
Амалдорлар ишдан кетишига эса 29 май куни АҚШ ҳарбийларига қарашли юк машинаси аварияга учраганидан кейин хорижликларга қарши исён кўтарилгани сабаб бўлди. Кобулда рўй берган зўравонликларда ўнга яқин киши ҳалок бўлган эди.

Сингапурда хавфсизлик масалаларига бағишланган анжуманда иштирок этаётган АҚШ мудофаа вазири Доналд Рамсфелд Шанхай ҳамкорлик ташкилотининг Пекинда ўтказиладиган йиғилишида Эрон вакилларининг иштирок этаётганидан ҳайратда эканини айтди.

“Эрон террорчиликни қувватловчи давлат ҳисобланади. Эрон “Хамас”ни, “Ҳизбаллоҳ”ни қўллаб-қувватлаяпти. Бу давлат анча вақтдан бери террорчилик фаолияти билан шуғулланиб келмоқда. Терроризмга қарши курашда ҳисса қўшишига умид қилиб, улар Эронни ташкилотга олгани мени жуда ҳайратга солади”, – деди Пентагон раҳбари.
Россия, Хитой, Қозоғистон, Қирғизистон, Тожикистон ва Ўзбекистон аъзо бўлган ШҲТда Эрон кузатувчи мақомига эга.

Эрон ташқи ишлар вазири Манучеҳр Муттақий Теҳрон расмийлари халқаро ҳамжамият таклифига жавоб беришдан олдин уни ўрганиб чиқишини билдирди.

БМТ Хавфсизлик кенгашининг беш доимий аъзоси ҳамда Германия ташқи ишлар вазирларининг пайшанба кунги Вена учрашувида Эроннинг уранни бойитиш ишларидан воз кечиши эвазига иқтисодий манфаатли таклифлар ишлаб чиқилган эди. Шу ҳафта бошида АҚШ ҳам Эрон билан олиб борилаётган сўзлашувларга қўшилишини билдирганди.
М.Муттақий агар “яхши ният бўлса”, олдинга силжиш рўй бериши мумкинлигини, аммо музокаралардан олдин шарт қўйилмаслиги кераклигини айтди.
Европа Иттифоқи ташқи сиёсат бўйича мутасаддиси Ҳавьер Солананинг матбуот вакили халқаро ҳамжамият таклифини тақдим этиш учун бошлиғи зудлик билан Эронга боришга тайёрлигини, бироқ сафар муддати ҳозирча белгиланмаганини таъкидлади.

Афғонистон жанубидаги Қандаҳор вилоятида полиция идорасига ҳужум уюштирилгани оқибатида рўй берган отишмада толибларнинг 12 жангариси ўлдирилди.

Қандаҳор ҳокими матбуот вакили Довуд Ҳамадийнинг айтишича, жума куни тунда рўй берган тўқнашувда 17 одам, жумладан, полициянинг тўрт ходими ҳам яраланган.
Шанба куни эрталаб Ҳилманд вилоятида жангарилар пистирмадан ҳужум уюштиргани оқибатида полициянинг тўрт ходими яраланди.
Расмийларнинг билдиришича, мазкур ҳужумга алоқадорликда гумон қилинган 18 киши қўлга олинган.

Афғонистон парламенти мамлакатнинг биринчи бюджетини тасдиқлади.

Ҳужжатда давлат идоралари ходимлари маошлари оширилиши кўзда тутилган. Икки ҳафта олдин депутатлар давлат идоралари ходимлари ойлиги камлиги учун бюджет лойиҳасини қабул қилмаган эди.
Тасдиқланган бюджетда давлат идоралари ходимларининг энг кам ойлик маоши 60 АҚШ доллари этиб белгиланган. Бошқа соҳаларга ажратилиши кўзда тутилган маблағнинг қисқариши ҳисобига ойлик маош яна олти долларга ошиши мумкин.

Черногория парламенти йиғилишида мустақиллик декларацияси қабул қилиниши кутилмоқда.

Депутатлар 21 май куни ўтказилган референдумнинг расмий натижасини тасдиқлаши режаланган.
Мустақиллик референдумида қатнашган фуқароларнинг 55,5 фоизи Черногориянинг Сербиядан мустақил бўлишини ёқлаб овоз берган эди.

Чехия республикасида икки кунлик парламент сайловида овоз бериш тугади.

Дастлабки маълумотларга кўра, мухолифатдаги Фуқаролик демократик партияси сайловчиларнинг 38 фоиз овозини олиб, олдинда бормоқда.
Охирги саккиз йил давомида мамлакатни бошқариб келган бош вазир Йири Парубек етакчилигидаги Социал демократик партия 30 фоиз овоз олган. Чехия коммунистик партияси эса 12 фоиз овоз билан учинчи ўринда бормоқда.

Туркиянинг Мерсин порт шаҳридаги савдо марказида рўй берган портлашдан ўн беш киши яраланди.

Полиция маълумотига кўра, портловчи қурилма мобил телефони ёрдамида узоқдан туриб ишга туширилган. Портлаш учун жавобгарликни ҳозирча ҳеч ким ўз зиммасига олгани йўқ.

Канада полицияси Онтарио штатининг турли жойларида террорчилик ҳаракатлари содир этишда гумон қилинган 17 кишини, жумладан, беш ўсмирни ҳибсга олди.

2 июнь куни Торонто минтақасида ўтказилган рейдда полициянинг 400 га яқин ходими қатнашди. Айтилишича, Канада полицияси гумонланувчилардан портловчи қурилма тайёрлашда ишлатиладиган уч тонна аммоний нитрат моддасини мусодара қилган.

Эроннинг жанубий вилоятларида Рихтер ўлчови бўйича 5,2 балл кучга эга зилзила рўй берди. Оқибатда бир қизча нобуд бўлди, камида икки киши жароҳатланди.

Эронда ер силкиниши тез-тез кузатилади. Эронда энг талофатли зилзила 2003 йил декабрда Бам шаҳрида рўй берган эди. Ўша табиий офат оқибатида 31 мингдан зиёд киши ҳалок бўлган.

АҚШ Миллий разведка хизмати директори Жон Негропонте “Би-Би-Си” радиосига Эрон 2010 йилгача атом қуроли яратиши мумкинлигини айтди.

Ж.Негропонте БМТ Хавфсизлик кенгашининг беш доимий аъзоси ва Германия ташқи ишлар вазирларининг Вена учрашувидан сўнг шундай баёнот берди.


Венада БМТ хавфсизлик кенгашининг беш доимий аъзоси ва Германия ташқи ишлар вазирлари иштирокида бўлиб ўтган учрашувдан сўнг АҚШ давлат котиби Кондолиза Райс “Эрон ўз келажаги хусусида қарор қабул қиладиган вақт келгани”ни айтди.

К.Райс уранни бойитишни тўхтатиш учун Эронга қанча муддат вақт берилганини маълум қилмади.
Россия ташқи ишлар вазири Сергей Лавров эса Вена учрашувида ишлаб чиқилган режа Теҳрон билан келишувга эришиш имкониятини яратишини таъкидлади.
“Биз Эрон томони бу чақириққа жавоб бериши ва музокара столига ўтиришига умидвормиз”, – деди С.Лавров.
У жавоб учун Эронга муҳлат белгиланмаганини билдирди.

Тожикистоннинг Сўғд вилояти суди Ўзбекистон фуқаросини жосусликда айблаб, 13 йилга озодликдан маҳрум этилди.

Вилоят прокурори ёрдамчиси Фатҳиддин Зуҳуровнинг “Авеста” ахборот агентлигига маълум қилишича, келиб чиқиши тожикистонлик бўлган Иброҳим Йўлдошев мамлакат ҳудудига ноқонуний киргани учун 2005 йил декабрда қўлга олинган.
“Авеста” хабарига кўра, Ўзбекистоннинг яна бир фуқароси Абдужалол Қодиров ҳам Сўғд вилоятида жосуслик айби билан судланмоқда. У 12 йилдан 20 йилгача қамоқ жазосига ҳукм қилиниши мумкин.

Ўзбекистон ҳарбий прокуратураси Қирғизистон чегарачиларини Ўзбекистон ҳудудига ўтиб, бир фуқарони оғир ярадор қилишда айблади.

www.press-uz.info сайти хабарига кўра, воқеа 1 июнь куни Наманган вилоятида рўй берган. Ўзбекистон расмийсининг билдиришича, тўрт қирғиз чегарачиси республика ҳудудига ноқонуний кирган. Улардан бири отган ўқ Қайроқи қишлоғилик 26 ёшли фуқарони оғир яралаган. Воқеа юзасидан жиноят иши очилган.
Қирғизистон томони ҳозирча мазкур воқеага расмий муносабат билдирмади.
Маълумотларга кўра, Ўзбекистон-Қирғизистон ўртасидаги бир минг 300 километр узунликдаги чегарада бир неча мунозарали ҳудуд бор. Яқинда Ўзбекистоннинг давлатга қарашли ахборот агентликлари Қирғистон томонини бир неча текширув пунктини амалдаги келишувга зид равишда ёпиб қўйишда айблаган.
Бошқа хабарларда Ўзбекистон ва Қирғизистон расмийлари 9 июнь куни Наманган шаҳрида учрашиб, чегарани белгилаш масаласини муҳокама қилиши айтилади.

Давомини ўқинг

XS
SM
MD
LG