Линклар

Шошилинч хабар
19 сентябр 2019, Тошкент вақти: 20:00

Халқаро янгиликлар

Бугун Туркия парламенти шу йилнинг ноябр ойида парламент сайловлари ўтказиш масаласини кўриб чиқмоқда.

Бош вазир Эжевет тарафдорларининг қаршилигига қарамай, кеча парламентда кўпчилик мазкур сайлов ўтказилишини қўллаб-қувватлаган.
Эжеветнинг билдиришича, шошилинч сайловлар Туркия иқтисодий аҳволига ёмон таъсир қилади ва мамлакатнинг Европа иттифоқи таркибига кириш истиқболини узоқлаштиради.
Туркия парламентидаги бугунги йиғилиш учун парламентдагилар ёзги дам олиш мавсумини тўхтатишига тўғри келди. Кўпчилик фракциялар вакиллари сиёсий инқирозни бартараф этиш масаласи қанчалик тезлашса, шунча фойдали эканлигини таъкидламоқдалар.

Чукоткадан Қримга парвоз қилаётган Ту-154 самолёти ҳалокат эҳтимолидан Ханти-Манси автоном округидаги аэропортга қўнишга мажбур бўлди.

Интерфакс ахборот агентлигининг тарқатган хабарига қараганда, учқичнинг кутилмаганда қўнишига двигателлар носозлиги сабаб бўлган. Қўниш пайтида заҳирадаги двигателлардан фойдаланишга тўғри келди, дейилади хабарда.
Учқичда 150 йўловчи ва 10 нафар экипаж аъзолари бўлган. Ҳеч ким жабр кўрмаган. Ҳозирда самолёт техник текширувдан ўтказилмоқда.

Бугун Олтой ўлкасида автомобил ва поезд тўқнашуви юз берди.

Олтой ўлкаси фавқулодда вазиятлар бошқармасининг билдиришича, “Тойота” русумли автомобил юк поезди яқинлашаётган темир йўл кесишмасига чиқиб кетган. Жароҳатланган ҳайдовчи касалхонага ётқизилди.

Москва вилоятидаги ўрмонларда давом этаётган ёнғин бир ярим баравар кенгайди.

Ҳозирда ёнғин 300 гектар майдонни қамраб олган. Ёнғин кучли кечаётган Шатурский районида вазият бирмунча мураккаблашди. Ёнғинни бартараф этишда махсус вертолётлардан фойдаланилаяпти. Шатурский районига эса ёнғин поездлари жўнатилди. Итар-Тасс ахборотида айтилишича, ёнғинни ўчириш амалиётига Москва ҳарбий округи ҳарбийлари жалб қилиниши мумкин.
Худди шундай ўрмон ёнғини Сибирда, Чита вилоятида ҳам давом этаяпти. Бу минтақада қарийб минг гектар ўрмон ёнғин ичида қолган. Ёнғинлар натижасида Москва вилояти атрофидаги атмосферада ис гази миқдори 20 фоиз ошди.

Чеченистоннинг Итум-Қалъа туманида қуролланган чечен гуруҳларига қарши ҳарбий амалиётлар давом этмоқда.

Россия ҳарбийларининг тасдиқлашича, чечен гуруҳлари Грузия ҳудудидаги Панкиси дарасида жойлашиб олган.
Кеча тунда бўлиб ўтган отишмалар чоғида 4 нафар чечен жангариси ҳалок бўлган. Сўнгги кунларда чечен жангарилари ва Россия ҳарбийлари ўртасидаги отишмалар чоғида 6 нафар рус ҳарбийси ҳалок бўлган.
Россия ҳарбий бўлинмаларидан олинган маълумотларга кўра, дала қўмондони Ҳасан бошчилигида чечен жангариларидан 60 нафари қуршаб олинди.
Россия Грузия ҳукуматини Чеченистон жанубидаги вазиятнинг кескинлашувида айбламоқда. Россия ташқи ишлар вазирлиги билдирувида Грузиядан чечен жангариларини йўқ қилиш талаб қилинади. Ўз ўрнида Тбилиси Москва айбловларини инкор этмоқда.

Уругвай ҳукуматига молиявий инқироз таҳдид солмоқда.

Кеча мамлакат банкларида маълум муддатга иш тўхтатилди. Сўнгги ҳафта мобайнида Уругвайнинг асосий банкларидан юз миллионлаб доллар пул олинди. Аҳоли ўртасида саросима бошланган.
АҚШ маъмурияти Халқаро Валюта фондини Уругвайга молиявий ёрдам кўрсатишга ундашини билдирди. Ҳозир Вашингтонда Уругвай делегацияси Халқаро валюта фонди мутахассислари билан мамлакатга 3 миллиард доллар кредит ажратиш масаласини муҳокама қилаяпти.

БМТ Хавфсизлик кенгаши Ливанда тинчликни сақлаш миссияси муддатини 6 ойга узайтирди.

Қабул қилинган резолюцияда кўрсатилишича, Ливан-Исроил чегараларидаги тартибсизликлар Ҳизбуллоҳ жангарилари томонидан содир этилмоқда.
Маълумки, БМТнинг тинчликни сақловчи кучлари Ливан жанубида 24 йилдан буён фаолият кўрсатади. Унда 3 500 атрофида ҳарбий иштирок этмоқда.

АҚШ собиқ конгрессмени Жеймс Трафикант кеча 6 йиллик қамоқ жазосига ҳукм қилинди.

Суд Жеймс Трафикантни коррупция, таъмагирлик ва солиқдан бош тортганликда айблади. Суд Огайо штатида бўлиб ўтди.
Трафикант бир ҳафта илгари АҚШ конгрессида вакиллар палатасидаги вазифасидан озод этилган. Трафикант Демократлар партияси томонидан Конгрессга бир неча марта сайланган.

Бугун Исроилда амалга оширилган террор ҳаракати оқибатида 7 киши ўлди, 80 дан ортиқ одам жароҳат олди.

Қуддус университетидаги кафега ўрнатилган портловчи мослама тушлик пайтида портлаб кетган. Бу портлаш сўнгги 2 кун ичида Қуддусдаги иккинчи террор ҳаракатидир. Кеча худкуш террорчилардан бири амалга оширган портлаш натижасида 4 киши жароҳатланган.
Бугун содир этилган террор ҳужумини Фаластиндаги “Хамас” эсктремистик гуруҳи зиммасига олди. Фаластин қуролли гуруҳлари вакиллари ўтган ҳафтада “Хамас” лидерларидан бири шайх Салоҳ Шеҳоданинг ўлими учун қасд олинишини билдирган.
Исроилнинг “Шин Бет” хавфсизлик хизмати бошлиғи Ави Дихтернинг айтишича, 2000 йилнинг сентябр ойидан буён худкуш террорчилар 90 марта бомба портлатган.

Жанубий Корея парламенти профессор Чан Сан номзодини бош вазирлик лавозимига тасдиқламади.

Чан Сан номзоди мамлакат президенти томонидан тавсия этилган. Маълум бўлишича, Жанубий Корея тарихида ҳукумат бошлиғи лавозимига аёл кишининг номзоди биринчи марта кўрсатилган.
Икки кунлик парламент муҳокамаларида кўпчилик 63 ёшли Чан Санга қарши овоз берган.
Чан Сан ноқонуний кўчмас мулк савдоси билан шуғулланганликда айбланмоқда.

Хитой ҳукумати АҚШ билан мамлакатдаги инсон ҳуқуқлари вазияти бўйича сўзлашувлар бошлайди.

Бу хусусда Хитой халқ республикаси ташқи ишлар вазири Тан Цзясюань АҚШ давлат котиби Колин Пауэлл билан учрашгандан сўнг айтди.
АҚШ Хитой ҳукумати инсон ҳуқуқларини поймол этаётганлигини бир неча марта танқид қилган. Пекиннинг билдиришича, мамлакатда инсон ҳуқуқлари вазияти яхшиланмоқда. Инсон ҳуқуқлари ташкилотларигина бу борада илгари силжиш кузатилмаяпти деган фикр билдирмоқда, дейди Хитой ташқи ишлар вазири.

Бугун Қуддус шаҳрида худкуш террорчи бомба ҳужумини уюштирди.

Натижада террорчининг ўзи ўлди ва бир нечта киши яраланди. Қуддус шаҳри полицияси бошлиғи Миккей Леви, тушлик пайтида уюштирилган ушбу бомба ҳужумида тўрт киши яраланганини билдирди.
Бугун эрталаб Ғарбий соҳилда икки нафар кўчириб келтирилган яҳудий Жаммиан қишлоғига ёқилғи олиш учун кирган пайтида фаластинликлар томонидан отиб ўлдирилди. Фаластин лидери Яссир Арафатнинг Фатаҳ ҳаракатидаги қуролли “Ал-Ақса мазлумлари” гуруҳи ушбу воқеа масъулиятини ўз зиммасига олди.
Шунингдек, бугун бир фаластинлик яхудийлар яшайдиган Итамар аҳоли пунктига кириб бир кишини пичоқлаганидан кейин Исроил аскарлари томонидан отиб ўлдирилди.

Ўзбекистон президенти Ислом Каримов Японияга уч кунлик сафарини давом эттириб бугун Токиода Япониянинг сиёсий ва бизнес лидерлари билан учрашди.

Кеча Каримов Бош вазир Юнихиро Коизуми билан учрашди. Япония Ташқи ишлар вазирлиги, икки лидер бизнес алоқалар, шунингдек, сиёсий ва маданий алоқаларни кенгайтиришга қаратилган хужжатни имзолаганларини билдирди. Ташқи ишлар вазирлигининг яна маълум қилишича, Коизуми ва Каримов “Ипак йўли энергия миссияси” деб номланган энергия лойиҳаси борасида ҳам ҳамкорлик қилишга келишганлар. Ислом Каримов эртага Япониядан Ўзбекистонга жўнаб кетади.

Бугун Франция президенти Жак Ширак ва Германия канцлери Герхард Шрёдер Германиянинг Шверин шаҳрида учрашдилар.

Музокаралар чоғида келгусида Европа Иттифоқи фермерларига ёрдам кўрсатиш масаласи кўрилиши тахмин қилинди. Учрашувда Франция Бош вазири Жан-Пиер Раффарин, шунингдек, ҳар икки мамлакатнинг ташқи ишлар ва мудофаа вазирлари иштирок этдилар.

Афғонистон ички ишлар вазирлиги машинасига портловчи моддалар ортилган икки шахс Кобул шаҳрида қўлга олинганини маълум қилди.

Улар бомба ҳужуми уюштиришни режалаганларини тан олганлар. Ички ишлар вазирлигининг жамоа хавфсизлиги бўлими бошлиғи генерал Дин Муҳаммад Журат машинага юзлаб килограмм портловчи моддалар ортилганини айтди.

Ёзги таътилдан чақириб олинган Туркия парламенти аъзолари бугун иккинчи кун муддатидан аввал сайловлар ўтказиш масаласини муҳокама қилмоқдалар.

Бош вазир Булент Эжевет қарши бўлишига қарамасдан қонун чиқарувчилар ноябр ойида сайловлар ўтказиш ҳақидаги таклифни муфассал муҳокама қиляптилар. Эжевет муддатидан аввалги сайловлар иқтисодий ислоҳот дастурининг бажарилиши ҳамда Туркиянинг Европа Иттифоқига кириш йўлидаги уринишларига путур етказиши ҳақида огоҳлантирди.

Бугун жануби-шарқий Осиё минтақасида жойлашган давлатлар қўшма баёнот эълон қилдилар.

Баёнотда терроризмга қарши курашишда ўзаро ҳамкорлик лозимлиги тан олинган. АСЕАН гуруҳини ташкил этган 10та давлатнинг ташқи ишлар ваирлари ушбу қўшма баёнотни Брунейда бўлиб ўтган икки кунлик саммит ниҳоясида эълон қилдилар. Бу баёнот пайшанба куни АҚШ Давлат котиби Колин Пауэл билан алоҳида шартнома имзоланишидан олдин эълон қилинди.

Бугун Европа Иттифоқининг Ташқи сиёсати раҳбари Хавиер Солана Эронга қилган сафарини якунлади.

Солана Европа Иттифоқи ва Эрон ўртасидаги ҳамкорлик Яқин шарқдаги вазият барқарорлигига ҳисса қўшишини таъкидлади.
Хавиер Солана АҚШ ва Европа Иттифоқи Эрон масаласида икки хил кўз қарашга эга, аммо Вашингтон расмийлари Иттифоқнинг Теҳрон билан олиб бораётган диалогларини, Эрон раҳбарияти билан ҳамкорлик қилиш режаси, шунингдек, Европа Иттифоқининг Эрондаги ислоҳотчиларни қўллаб қувватлаш ниятини қабул қилишини айтди.
Солана Эронга сафарини тугатганидан кейин, жануби-шарқий Осиё минтақасида жойлашган давлатлар, яъни АСЕАН гуруҳига аъзо давлатлар ташқи ишлар вазирлари билан учрашиш мақсадида Брунейга учиб кетди.

Бугун БМТ шу ой бошида АҚШ кучлари Афғонистондаги тўй маросимини бомбардимон қилгани воқеаси юзасидан олиб борилаётган текшириш ҳисоботини Афғонистон ҳукуматига берди.

БМТ матбуот вакили Дэвид Сингҳ БМТ ушбу ҳисоботни матбуотга тарқатмаслигини, агар Афғонистон ҳукумати ҳоҳласа уни матбуотда эълон қилиши мумкинлигини айтди.
1 июл куни АҚШ учқичлари Урузгон вилоятида ўтаётган никоҳ кечасини бомбардимон қилгани оқибатида 48 киши ўлган ва 100дан ортиқ тинч аҳоли яраланган. БМТнинг махсус гуруҳи Афғонистонга бориб воқеани жойида ўрганди.

АҚШ Давлат котиби Колин Пауэлл бугун Малайзия ҳукумати вакиллари билан терроризмга қарши ҳамкорликни кенгайтириш борасида сўзлашувлар олиб борди.

Маълумки Малайзия аксил-террор кампанияси давомида АҚШ билан иттифоқчи. Малайзия Ташқи ишлар вазири Сайид Ҳамид музокаралар чоғида икки давлат ўртасидаги ҳамкорликни кучайтириш масаласи муҳокама этилганини маълум қилди.
Кеча Таиландда бўлган Пауэлл жануби-шарқий Осиё давлатларига олти кунлик сафарини давом эттириб Брунейга жўнаб кетиши олдидан бугун кечки пайт Сингапурда тўхташни режалаштирган.

Исроил мудофаа вазири Биньямин Бен-Элиэзер шу ҳафта фаластин муҳторияти вакиллари билан ҳавфсизликка доир масалаларни муҳокама қилишни режалаштирмоқда.

Бугун Қуддусда қилган чиқишида вазир бундай учрашув минтақадаги вазиятни барқарорлаштиришнинг биринчи босқичини бошлаб бериши мумкинлигини таъкидлади.
Фалaстин муҳторияти раҳбарлари ҳозирча Бен-Элиэзернинг баëнотига ҳеч қандай муносабат билдирмаганлар.
Кеча Исроил бош вазири Ариэль Шарон Фаластин муҳториятига бундан икки йил олдин Исроил томонидан банк ҳисобларида музлатиб қўйилган 15 миллион доллар қайтариб берилишини эълон қилди. Шарон шунингдек комендантлик соати муддатлари ва фаластин ҳудудларидаги йўлларда қўйилган блок-постлар сонини қисқартириш ҳақда кўрсатма берди.
Исроилда ишлаган ўн икки минг фалстинликка иш жойларига қайтишга руҳсат берилган.

Афғонистоннинг жануби-шарқидаги Хост шаҳри яқинида аксил-террор коалицияси қисмлари қурол-аслаҳаларнинг йирик омборини топишга муваффақ бўлишди.

Шанба куни бу ерда қуролланган толиблар ва “Ал-Қоида”жангарилари билан тўқнашув юз берган.
Бу ҳақда бугун АҚШ қуролли кучлари қўмондонлиги вакили Рожер Кинг маълум қилди.
Унинг сўзларига кўра, шанба куни элликка яқин америкалик ва афғонистонлик ҳарбий ҳизматчи разведка амалиëтларини бажариш чоғида пистирмага йўлиққан. Жангда икки афғон ҳарбийси ҳалок бўлди. Америкалик беш ҳарбий ҳизматчи жароҳатланган. Ҳужумчилардан беш киши ўлдирилди.
Кўп ўтмай Америка авиацияси тўқнашув содир бўлган жойга зарбалар берди.

Якшанба куни Пулково ҳаво компаниясига қарашли Ил-86 самолети қулаган жойда ҳалок бўлган барча 14 одамнинг жасади топилди.

Ҳалокатда омон қолган икки бортпроводник касалҳонада қолмоқда. Шифокорлар улардан бири оғир аҳволда эканини маълум қилишди.
Ил-86 самолети якшанба куни Москва яқинидаги Шереметьево-1 аэропортидан Санк-Петербургга техникавий рейсни бажариш учун кўтарилаëтганида ерга қулаган. Бортда йўловчилар бўлмаган.
Ҳалокат сабаблари ҳозирча номаълум.Мутаҳассислар кема бортидаги уч “қора қутида” ëзилган маълумотларни ўрганишмоқда.

АҚШ давлат котиби Колин Пауэлл Осиë мамлакатлари бўйлаб сафарини давом эттирмоқда.

Бугун у Бангкокда Таиланд раҳбарияти билан халқаро терроризм ва наркотиклар контрабандаси билан кураш муаммоларини муҳокама қилмоқда.
Пауэлл шунингдек Малайзия, Сингапур, Бруней ва Филиппинда бўлади.
Брунейда у Жанубий Шарқий Осиë мамлакатлари минтақавий ҳамкорлик ассоциацияси анжуманида иштирок этади.
Кеча Исломободда бўлган Пауэлл, Покистон президенти Парвез Мушарраф билан музокаралари якунида, Вашингтон Покистон ва Ҳиндистон билан дипломатик музокараларни Кашмир муаммосини ҳал этиш борасидаги келишувга эришилмагунича давом эттиришини эълон қилди.

Япония бош вазири Юнихиро Коизуми ва Ўзбекистон президенти Ислом Каримов икки мамлакат орасидаги иқтисдоий алоқалар ҳамда сиëсий ва маданий алмашувни кенгайтириш борасида келишиб олишди.

Япония ташқи ишлар вазирлигининг маълум қилишича келишув бугун Япония бош вазирининг Токиодаги резиденциясида имзоланган.
Вазирлик шунингдек томонлар “Ипак йўли энергия миссияси” номли лойиҳа доирасида энергетика соҳасида ҳамкорлик қилиш борасида келишиб олганларини маълум қилди.
Японияга ташрифи давомида Ўзбекистон президенти шунингдек Япония императори ва мамлакатнинг етакчи сиëсатчилари ва тадбиркорлари билан учрашиши кутилмоқда.

Давомини ўқинг

Кўрмай қолган бўлсангиз

XS
SM
MD
LG