Линклар

Шошилинч хабар
23 август 2019, Тошкент вақти: 07:58

Халқаро янгиликлар

Бугун Шимолий Корея Халқ Республикаси ҳамда Жанубий Корея патрул катерлари ўртасида рўй берган отишмалардан сўнг Жанубий Корея қуролли кучлари юқори даражадаги жанговор шай холатга келтириб қўйилди.

Бўлиб ўтган тўқнашувлар оқибатида Жанубий Кореянинг тўрт нафар ҳарбий денгизчиси ҳалок бўлди, 18 нафари яраланди. Катер эса сувга чўктирилди. Отишмалар Корея ярим ороли атрофидаги Сариқ денгиз қирғоқларида рўй берди. Жанубий Корея ҳарбийларининг маълум қилишларича, Шимолий Корея ҳарбий кемалари икки мамлакат ўртасидаги чегарани бузиб ўтган. Чегарачиларнинг огоҳлантирувига эса шимолий кореяликлар ўт очиш билан жавоб қайтаришган. Шимолий Корея кемаларнинг чегара бузиш холлари йил бошидан буён ўнинчи марта такрорланиши. Бироқ олдингилари ҳарбий тўқнашувларсиз якун топган эди.
Бугун Жанубий Кореяда футбол бўйича жаҳон чемпионатининг финал бахслашувлари бўлиб ўтди. Туркия терма жамоаси Кореялик футболчилар устидан 3:2 ҳисобида ғалаба қозониб, жаҳон чемпионатининг учинчи ўрин соҳиби бўлдилар.

Бугун Қирғизистоннинг Кербен шаҳрида 5000га яқин киши ҳукумат ва маҳкаманинг кечаги қарорига қарши намойишларга тўпланган.

Кеча Қирғиз парламентининг қуйи палатаси Жалолободдаги март ғалаёнлари иштирокчиларини авф этиш юзасидан Амнистия тғрисидаги қонунни қабул қилган эди. Мазкур қонунда ғалаёнлар давомида олти кишининг ўлимида айбланаётган милиционерларнинг ҳам оқланиши кўзда тутилади. Бугун Жалолободда бир неча милиция ҳодими иш ташлаб, намойишчиларга қарата ўт очишга ким буйруқ берганига ойдинлик киритилишини ҳукуматдан талаб этишган. Эслатиб ўтамиз март ойида Ахсида депутат Азимбек Бекназаровни ҳимоя этиб ўтказилган намойишларда беш киши отиб ўлдирилган эди. Гарчи, кеча Тўқтагул туман суди Бекназаров иши ёпилгани ҳусусида эълон қилган бўлсада, шартли бир йил қамоқ жазоси тўғрисидаги маҳкама ажрими ўз кучида қолдирилди.

Бугун эрталаб Қобул атрофидаги ҳудудларнинг бирида кучли портлаш рўй берган.

Бироқ портлаш оқибатида ҳеч ким талофат кўрмади. Қобулдаги тинчликни сақловчи кучлар вакилининг маълум қилишича, портлаш пойтахт аэропортидан 3 километр узоқликда рўй берган. Ҳозирда инцидент сабабларини аниқлаш учун у ерга маҳсус бўлинма жўнатилган. Маълумотларга кўра Қобул шаҳри ва унинг атрофларида 23 йиллик уруш давомида қўйилган пиёдаларга қарши миналар ҳанузгача зарарсизлантирилмаган. Жума куни Афғонистоннинг жанубий-шарқидаги Спин-Болдак қишлоғида қурол-аслаҳа омбори портлагани оқибатида 19 киши ҳалок бўлди, ўнлаб фуқаро жароҳат олди. Яраланганлар орасида БМТ ҳодимлари ҳам бор.

Ўтган тунда Қашмирда ҳинд ҳарбийлари Покистондан Ҳиндистонга ўтишга уринган беш ислом жангарисини отиб ўлдирган.

Покистонда фаолият олиб бораётган мусулмон экстремистларининг Ҳиндистонга ҳуружлари Деҳли ва Исломобод ўртасида вазиятнинг таранглашувига олиб келди. Ҳозирда чегаранинг ҳар икки тарафига юз минглаб аскар жалб этилган. Ҳиндистон бош вазири Атал Бихари Важпаи Покистон раҳбариятини яна бир бор террорчи гуруҳларнинг ҳуружларига чек қўйишга, уларга қарши кескин чоралар кўришга даъват этди. Деҳли Исломободни Қашмир айирмачиларини қўллаб-қувватлаётганликда айбламоқда. Улар 1989 йилдан буён қашмир мустақиллиги учун курашни давом эттирмоқда. Ўшандан буён мазкур минтақада жами 35 минг киши қурбон бўлди.

АҚШ Давлат департаменти икки журналист иши юзасидан чиқарган Белорус маҳкамаси қарорини қоралади.

Белорус муҳолифати газетаси ҳисобланмиш "Пагония" бош муҳаррири Николай Маркевич ҳамда газета мухбири Павел Можайколар ушбу ҳафта мамлакат президенти Александр Лукашенко тўғрисида танқидий мақолалар ёзганликлари учун узоқ муддатли мажбурий меҳнат жазосига тортилдилар. Бироқ маҳкама қарорида айтилишича журналистлар мамлакат президентига таъна тошларини отганликлари учун бундай жазога тортилганлар. АҚШ Давлат департаменти матбуот мулозими Ричард Баучер Белорус маҳкамасининг бундай қарорини "умумэътироф этилган сўз эркинликлари ва эркин матбуот тамойилларига тажоввуз" сифатида таърифлади. Журналистларнинг жазога тортилиши эса "сиёсий ўч олиш"дан бошқа нарса эмас, - қайд этади Баучер.

Бугун АҚШ Президенти Жорж Бушга ичак жарроҳлик операцияси қилинади.

Бушнинг таъкидлашича, операция давомида у наркоз холатида бўлиши боис, ҳар эҳтимолга қарши давлатга раҳбарлик қилиш ваколати бир неча соатга вице-президент Дик Чейни зиммасига юклатилади, чунки Буш таъбири билан айтганда Америка уруш ҳолатида. Бушга жарроҳлик операцияси АҚШ президентининг Кэмп Дэвид амбулатор касалхонасида амалга оширилади.

Бугун Исроил ҳарбийлари Хеврондаги Фаластин маъмурий биносини портлатишди.

Франс-пресс ахборот агентлигининг Исроил радиосига таяниб хабар беришича, у ерда яшириниб олган 15 фаластин жангариси ҳалок бўлган. Улар Фаластин раҳбари Ясир Арафат раҳнамолигидаги "Фатх" ҳаракатининг ҳарбий қаноти - "Танзим" ташкилотининг фаоллари бўлишган. Исроил ҳукумати эса "Танзим" ҳаракатини бир неча қуролли ҳуружларни содир этганликда айбламоқда. Исроилликлар Хеврондаги Фаластин маъмуриятини деярли тўрт кун давомида қуршовда ушлаб турдилар. У ерда яшириниб олган фаластинликлар таслим бўлишдан воз кечканликлари боис бино портлатилиб, бульдозерлар билан ер билан яксон этилди. Исроил кучлари ғарбий соҳилда бугун ҳам амалиётларни давом эттирдилар. Ушбу ҳудудлардаги Фаластиннинг етти йирик шаҳри ҳанузгача исроилликлар қуршовида қолмоқда. Амалиётлар фаластин террорчиларининг яқинда содир этган ҳуружларига жавобан амалга оширилмоқда. Уларнинг оқибатида ўнлаб исроилликлар ҳалок бўлган эди.

Хитой раҳбарияти лицензияси бўлмаган Интернет – кафе эгаларини қонун йўли билан қўрқитмоқда.

Бугундан бошлаб уч кун ичида мамлакатдаги барча Интернет-кафелар қайта рўйхатдан ўтишлари керак бўлади. Расмий маълумотларга кўра, Хитойда мавжуд 200минг Интернет кафенинг, бешдан бир қисмигина рўйхатдан ўтган холос. Ўтган йили Хитойда мижозларнинг қайси саҳифаларга киришларини қайд этиб борадиган маҳсус дастур қўйилмаган мингга яқин Интернет-кафе ёпилган эди. Хитой махсус ҳизматлари мамлакатга интернет оқимини мунтазам кузатиб борилади, ҳукумат олиб бораётган сиёсатга номақбул бўлган сайтлар бўғилади.

Бугун Туркия футболчилари Жанубий Корея терма жамоаси устидан 3:2 ҳисобида ғалаба қозониб, жаҳон чемпионатининг учинчи ўрин соҳиби бўлдилар.

Мана тўрт кундирки, Исроил қўшинлари Хеврондаги Фаластин хавфсизлик ҳизмати бош қароргоҳини ўққа тутишда давом этмоқда.

У ерга 15га яқин фаластин жангариси яшириниб олган. Кеча мазкур бино ракеталардан ўққа тутилган эди. Гувоҳларнинг маълум қилишларича, бугун исроил ҳарбийлари танк ва бульдозерлар ёрдамида бино ичкарисига кирмоқчи бўлишган. Исроил мудофаа вазири Беньямин Бен-Элизарга кўра, Хеврондаги Фаластин маъмурияти биноси исроилликлар тарафидан қуршовга олинганидан буён 20га яқин Фаластин разведка хизмати ходими таслим бўлган. Улар террорчиларнинг портловчи модда ишлаб чиқарадиган бир неча истеҳкомларини айтиб беришган. Жумага ўтар кечаси Қуддус, Байтулҳам ва Хеврон яқинидаги ҳудудларда Исроил ҳарбийлари террорчиликда гумон этилаётган олти фаластинликни ҳибсга олди. Ҳозирда Иордан дарёси ғарбий соҳилидаги Фаластиннинг етти йирик шаҳри исроилликлар қуршовида қолмоқда. Олинган хабарларга кўра, бугун Қалқалияда исроил харбийлари уч фаластинлик болани отиб ўлдирган. Бугун Рамаллоҳда чиқиш қилган Фаластин ахборот вазири Ясер Абед Раббо исроилликларнинг бу ҳаракатларини жиноят сифатида таърифлади.
Исроил босқини кучаяр экан, кеча Фаластин раҳбарияти Канадада тўпланган "саккизлик гуруҳи" етакчиларига мурожаат билан чиқди. Мурожаатда Исроил армиясининг Фаластин ҳудудларидан чиқарилиши талаб этилади.

Қирғизистон парламентининг қуйи палатаси Жалолободдаги март ғалаёнлари иштирокчиларини амнистия қилиш тўғрисидаги қонунни қабул қилди.

Парламент депутатлари депутат Азимбек Бекназаровни қўллаб чиққан норозилик намойиш иштирокчилари билан бирга, ғалаёнлар давомида олти кишининг ўлимида айбланаётган милиционерларни ҳам оқлаш бўйича ҳукумат таклифини маъқулладилар. Шунингдек, амнистия ҳизмат лавозимини суиистеъмол қилганликда айбланаётган Азимбек Бекназаровга ҳам тегишли бўлади. Бироқ, Бекназаров амнистиядан воз кечиб, ўзининг гуноҳсиз эканини суд орқали исботлаяжагини айтган. Амнистия тўғрисидаги қонунни энди Қирғиз парламентининг юқори палатаси маъқуллаши керак.

Россия ва собиқ Совет Иттифоқининг бошқа давлатларидаги оммавий қирғин қуролларини йўқ қилиш учун дунёнинг энг ривожланган етти давлати 20 миллиард доллар ажратади.

Бу ҳақда Канадада якунланган саккизлик гуруҳи саммити давомида бир тўхтамга келинди. Ишлаб чиқилган дастурга мувофиқ, қуролларни йўқ қилиш жараёни 10 йилга мўлжалланган бўлиб, ундан мақсад – хавфли радиоактив ва химиявий қуролларнинг террорчилар қўлига тушишини олдини олишдир. Шунингдек, Россия ва МДҲ давлатларининг ядро реакторлари ва бошқа ҳатарли объектлар устидан назорат кучайтирилиши кўзда тутилган. Кеча, саммит иштирокчилари Африканинг қашшоқ давлатларига ёрдам дастурини маъқулладилар. Мазкур дастур Африкада низолар келиб чиқишининг олдини олиш, экологик лойиҳаларни молиялаш ва Африка маҳсулотларини ғарб бозорларига олиб келинишини таъминлашни ўз ичига олади.

Ўтган тунда Афғонистон жанубида қурол-аслаҳа омбори портлагани оқибатида камида етти киши нобуд бўлди, ўттизга яқини яраланди.

Шунингдек, эллик киши дом-дарак йўқолгани айтилмоқда. Портлаш оқибатида жами ўнга яқин бино вайрон бўлди. Портлаган ракеталарнинг бири БМТ тасарруфидаги озиқ-овқат омборига келиб тушган. У ерда ташкилотнинг олти ходими жароҳат олди. Ҳозирда портлаш сабаблари ўрганилмоқда. Қурол-аслаҳа омбори мазкур ҳудудларда толибон режими даврида қурилгани таҳмин этилмоқда.

Иқтисодий мураккабликларни бошидан кечираётган Аргентинада оммавий норозилик намойишлари давом этмоқда.

Пайшанба куни Буэнос-Айресда мамлакатдаги иқтисодий тушкунликдан норози 10 мингга яқин намойишчи шаҳар кўчаларига чиқиб, президент Эдуардо Дуальде истеъфосини талаб қилишган. Шунингдек, бир вақтнинг ўзида Аргентинада ўқитувчилар ва бошқа давлат ҳизматчиларининг иш ташлашлари давом этмоқда. Чоршанба куни намойишчилар ва полиция ўртасида юз берган тўқнашувлар оқибатида икки фуқаро ҳалок бўлган эди.

АҚШ ҳукумати зилзиладан азият чеккан Эрон халқига инсонпарварлик ёрдамини жўнатиш ниятида.

АҚШ Давлат департаменти матбуот вакили Ричард Баучерга кўра, мазкур ёрдам доирасида Эронга сув тозалагичлар, дори-дармон ва чодирлар юборилади. Вашингтоннинг Теҳрон билан дипломатик алоқаси бўлмагани боис, ёрдамлар БМТ каналлари орқали жўнатиладиган бўлди. Ёрдамларнинг умумий қиймати 300 минг долларни ташкил этади. Эслатиб ўтамиз, Эронда ўтган ҳатфа рўй берган кучли зилзила оқибатида жами 220 киши нобуд бўлди, минглаб киши бош панасиз қолди.

Бугун Жанубий Кореяда мамлакат президенти Ким Дэ Жунг ўғли устидан маҳкама жараёни бошланди.

У маҳаллий тадбиркорларидан уч миллион доллар миқдорда пора олганликда айбланмоқда. Президентнинг яна бир ўғли ҳам коррупцияда айбланиб, унга нисбатан жиноят иши қўзғатилган. Ким Дэ Жунг ҳукумат тепасига 1998 йилда, коррупция ва уюшган жиноятчиликка қарши кураш шиори остида келган эди. Ўтган ҳафта у ўғилларининг қилмишлари учун парламентдаги ўз сайловчиларидан кечирим сўради.

Ҳаво шарида ер айланаси бўйлаб сайёҳатини давом эттираётган америкалик сайёҳ Стив Фоссет анча мураккаб вазиятга тушиб қолди.

Шимол тарафдан эсган кучли шамол унинг ҳаво шарини жанубий қутб томон учириб юборди. Ҳозирда америкалик сайёҳ деярли музликлар устидан учиб ўтмоқда. Мураккабликларга қарамай. Фоссет ер айланаси бўйлаб сайёҳатини муваффақиятли якунлашга бел боғлаган. У олдин ҳам ўзининг ҳаво шарида ер куррасини айланиб чиқишга беш марта уриниб кўрган эди. Олдинги уринишлар бесамар якун топган.

Британиянинг "The Who" рок гуруҳи бас гитарачиси Жон Энтвисл кеча Лас Вегасда 57 ёшида юрак ҳуружидан оламдан ўтди.

Шу кунларда унинг гуруҳи Шимолий Америка бўйлаб гастрол-концертларни ўтказаётган эди. Шундай қилиб "The Who" гуруҳи ўзининг яна бир талантли ижрочисидан айрилди. 1978 йилда гуруҳ барабанчиси Кэит Мун ҳам автомобил фалокати туфайли ҳалок бўлган эди.

АҚШ ТОШКЕНТДАГИ ФТИЗИАТРИЯ ВА ПУЛЬМОНОЛОГИЯ ИЛМИЙ ТЕКШИРИШ ИНСТИТУТИГА БИНОКУЛЯР МИКРОСКОПЛАР ҲАДЯ ЭТДИ

28 июн куни АҚШнинг Ўзбекистондаги элчиси жаноб Жон Хёрбст Тошкентдаги Фтизиатрия ва пульмонология илмий текшириш институтига бинокуляр микроскоплар тақдим этди.
Маълумотларга кўра, мазкур микроскоплар АҚШ Конгресси томонидан Ўзбекистон Республикасида тиббиёт соҳасини қўллаб-қувватлаш учун ажратилган ассигнациялар эвазига олиб келинган.

НАРКОТИК МОДДАЛАР ЁҚИБ ЮБОРИЛДИ

Ўзбекистон ҳукумати топшириғига кўра, 27 июн куни Ўзбекистон Миллий хавфсизлик хизмати журналистлар иштирокида 2230 кило наркотик моддани ёқиб юборди. Маълум бўлишича, 1994 йилдан буён Ўзбекистонда 35 тонна наркотик модда йўқ қилинган.
Маълумотларга кўра, кейинги пайтда қора бозорда наркотик моддалар нарҳи ошган. Бир йил олдин 1 кг. героин 4,5-5 минг долларга баҳоланган бўлса, бугунги кунда унинг нарҳи 6-7 минг долларни ташкил этмоқда.

ЎЗБЕК ЖУРНАЛИСТЛАРИ КАСБ БАЙРАМИНИ НИШОНЛАДИЛАР

27 июн ўзбек журналистлари ўзларининг касб байрамини нишонладилар. Мазкур байрам муносабати билан марказий нашрларда Ўзбекистон президенти Ислом Каримовнинг байрам табриги эълон қилинган. Аксар маҳаллий журналистларнинг Озодлик мухбирига айтишларича, бу йилги байрам табриги аввалгиларидан тубдан фарқ қилади. Унда хусусан шундай дейилади: «… ўзимизга бир савол берайлик: мана шундай турли хил қарашлар, ўзаро қарама-қарши бўлган фикрлар матбуотимиз, оммавий ахборот воситаларимизда ўзига ўрин топаяптими? Бугун масалани мана шу тарзда қўйиш вақти етди, деб ўйлайман.» «Моҳият» газетаси бош муҳаррири, ёзувчи Абдуқаюм Йўлдошевнинг Озодлик мухбирига айтишича, газеталарда даврнинг энг аччиқ ҳақиқатлари чоп этилмаслигининг сабаби, кўпчилик муҳаррирларда ички цензуранинг мавжудлиги, журналистларда ҳукумат томонидан берилган эркинлик вақтинча, деган фикр ҳукмрон эканлигидадир.
Тошкентнинг Мирзо Улуғбек боғида ўтказилган байрам сайли давомида Ўзбекистон оммавий ахборот воситаларини демокриятлаштириш ва қўллаб қувватлаш ижтимоий-сиёсий жамғармаси вакиллари бир қатор фаол журналистларни қимматбаҳо совғалар билан тақдирлашди.

Бугун Туркия бош вазири Булент Эжевит парламентда ўз партиясининг учрашувига иштирок этди.

Унинг соғлиқ муоаммолари сиëсий барқарорлик бошланиши тўғрисидаги ҳавотирларга сабаб бўлмоқда. 77 ëшли Эжевит янада эркинроқ ўтириш учун ўзининг одатдаги машинасида эмас, балки микроавтобусда парламентга борди. Эжевит парламент биносига кириб борганида депутатлар уни гулдирос қарсаклар билан кутиб олишди. Сўнгги пайтларда Эжевит турли хасталиклардан азият чекмоқда. У март ойида икки марта шифоҳонага ëтқизилганидан буëн уйида даволанмоқда. Кеча у тиббий текширувдан ўтганидан кейин 2-3 хафта ичида ишга қайтишини айтди. Эжевитнинг соғлиқ муоаммолари, у истеъфо бериши, унинг коалиция ҳукумати қуллаши ва муддатидан олдин сайловлар ўтказилишига сабаб бўлиши мумкин, деган хавотирларга сабаб бўлмоқда. Бугун Эжевит навбатдаги сайловлар белгилангани каби 2004 йил апрел ойида ўтказилишини айтди.

Бугун Европада хавфсизлик ва ҳамкорлик ташкилоти Қозоғистоннинг сиëсий партиялар тўғрисидаги янги қонуни хақда хавотирланиш билдириб, бу сиëсий плюрализмга зарар етказишини таъкидлади.

Шу хафтада Қозоғистон парламентининг ҳар икки палатаси томонидан қабул қилинган янги қонунга кўра, партия руйҳатдан ўтиш учун 3.000 дан 50.000 гача аъзоси бўлиши керак. Европада хавфсизлик ва ҳамкорлик ташкилотининг билдиришича, ушбу шартни фақат ҳукуматга тарафдор партияларгина бажара олади. Қозоғистон президенти Нурсултон Назарбоевнинг қонун лойиҳасини имзолаши кутилади ва бу кучга кирганидан кейин барча сиëсий партиялар янги шартларга кўра қайта руйҳатдан ўтишлари керак.

Бугун Киевда Украина президентлик ва ҳукумат бинолари қошида бир неча юз одам тўпланиб, президент Леонид Кучмани истеъфо беришга чақирдилар.

Муҳолифат партиялари томонидан уюштирилган номойишда сўзга чиққанлар, Кучма ҳукуматини коррупцияда, жиноятчиликда айбладилар ва Украина конститутцияси ҳурмат қилинишини талаб этдилар. Кучма Россияга Украинада ҳаддан зиëд сармоя ҳуқуқларини бергани тўғрисида ҳам шикоят қилинди.

Бугун Қирғизистоннинг Тўқтағул туманида суд депутат Азимбек Бекназаровнинг шикоят аризасини кўриб чиқишни бошлади.

Ўтган ойда суд, Бекназаровни Жалолобод прократурасида терговчи сифатида хизмат қилган пайтида салоҳиятини суистеъмол этганида айбдор, деб топган эди. Бекназаров суднинг ушбу ҳукми бекор этилишини сўрамоқда. Айни чоғда Жалолобод шаҳрида ва Ўш шаҳри атрофида Бекназаровга тарафдор бўлган юзлаб одам тўпланиб, суднинг шикоят аризаси юзасидан қандай қарор чиқаришини кутиб туришибди. Эслатиб ўтамиз, март ойида Аҳси туманида Бекназаровни қўллаш учун ўтказилган намойишда милиция ўқ узгани оқибатида намойиш иштирокчиларидан 5 одам ҳалок бўлган эди. Ҳозир Қирғизистон парламенти мамлакатдаги вазиятни муҳокама қилмоқда.

Давомини ўқинг

XS
SM
MD
LG