Линклар

Шошилинч хабар
19 ноябр 2019, Тошкент вақти: 12:38

Халқаро хабарлар

Мана тўрт кундирки, Исроил қўшинлари Хеврондаги Фаластин хавфсизлик ҳизмати бош қароргоҳини ўққа тутишда давом этмоқда.

У ерга 15га яқин фаластин жангариси яшириниб олган. Кеча мазкур бино ракеталардан ўққа тутилган эди. Гувоҳларнинг маълум қилишларича, бугун исроил ҳарбийлари танк ва бульдозерлар ёрдамида бино ичкарисига кирмоқчи бўлишган. Исроил мудофаа вазири Беньямин Бен-Элизарга кўра, Хеврондаги Фаластин маъмурияти биноси исроилликлар тарафидан қуршовга олинганидан буён 20га яқин Фаластин разведка хизмати ходими таслим бўлган. Улар террорчиларнинг портловчи модда ишлаб чиқарадиган бир неча истеҳкомларини айтиб беришган. Жумага ўтар кечаси Қуддус, Байтулҳам ва Хеврон яқинидаги ҳудудларда Исроил ҳарбийлари террорчиликда гумон этилаётган олти фаластинликни ҳибсга олди. Ҳозирда Иордан дарёси ғарбий соҳилидаги Фаластиннинг етти йирик шаҳри исроилликлар қуршовида қолмоқда. Олинган хабарларга кўра, бугун Қалқалияда исроил харбийлари уч фаластинлик болани отиб ўлдирган. Бугун Рамаллоҳда чиқиш қилган Фаластин ахборот вазири Ясер Абед Раббо исроилликларнинг бу ҳаракатларини жиноят сифатида таърифлади.
Исроил босқини кучаяр экан, кеча Фаластин раҳбарияти Канадада тўпланган "саккизлик гуруҳи" етакчиларига мурожаат билан чиқди. Мурожаатда Исроил армиясининг Фаластин ҳудудларидан чиқарилиши талаб этилади.

Қирғизистон парламентининг қуйи палатаси Жалолободдаги март ғалаёнлари иштирокчиларини амнистия қилиш тўғрисидаги қонунни қабул қилди.

Парламент депутатлари депутат Азимбек Бекназаровни қўллаб чиққан норозилик намойиш иштирокчилари билан бирга, ғалаёнлар давомида олти кишининг ўлимида айбланаётган милиционерларни ҳам оқлаш бўйича ҳукумат таклифини маъқулладилар. Шунингдек, амнистия ҳизмат лавозимини суиистеъмол қилганликда айбланаётган Азимбек Бекназаровга ҳам тегишли бўлади. Бироқ, Бекназаров амнистиядан воз кечиб, ўзининг гуноҳсиз эканини суд орқали исботлаяжагини айтган. Амнистия тўғрисидаги қонунни энди Қирғиз парламентининг юқори палатаси маъқуллаши керак.

Россия ва собиқ Совет Иттифоқининг бошқа давлатларидаги оммавий қирғин қуролларини йўқ қилиш учун дунёнинг энг ривожланган етти давлати 20 миллиард доллар ажратади.

Бу ҳақда Канадада якунланган саккизлик гуруҳи саммити давомида бир тўхтамга келинди. Ишлаб чиқилган дастурга мувофиқ, қуролларни йўқ қилиш жараёни 10 йилга мўлжалланган бўлиб, ундан мақсад – хавфли радиоактив ва химиявий қуролларнинг террорчилар қўлига тушишини олдини олишдир. Шунингдек, Россия ва МДҲ давлатларининг ядро реакторлари ва бошқа ҳатарли объектлар устидан назорат кучайтирилиши кўзда тутилган. Кеча, саммит иштирокчилари Африканинг қашшоқ давлатларига ёрдам дастурини маъқулладилар. Мазкур дастур Африкада низолар келиб чиқишининг олдини олиш, экологик лойиҳаларни молиялаш ва Африка маҳсулотларини ғарб бозорларига олиб келинишини таъминлашни ўз ичига олади.

Ўтган тунда Афғонистон жанубида қурол-аслаҳа омбори портлагани оқибатида камида етти киши нобуд бўлди, ўттизга яқини яраланди.

Шунингдек, эллик киши дом-дарак йўқолгани айтилмоқда. Портлаш оқибатида жами ўнга яқин бино вайрон бўлди. Портлаган ракеталарнинг бири БМТ тасарруфидаги озиқ-овқат омборига келиб тушган. У ерда ташкилотнинг олти ходими жароҳат олди. Ҳозирда портлаш сабаблари ўрганилмоқда. Қурол-аслаҳа омбори мазкур ҳудудларда толибон режими даврида қурилгани таҳмин этилмоқда.

Иқтисодий мураккабликларни бошидан кечираётган Аргентинада оммавий норозилик намойишлари давом этмоқда.

Пайшанба куни Буэнос-Айресда мамлакатдаги иқтисодий тушкунликдан норози 10 мингга яқин намойишчи шаҳар кўчаларига чиқиб, президент Эдуардо Дуальде истеъфосини талаб қилишган. Шунингдек, бир вақтнинг ўзида Аргентинада ўқитувчилар ва бошқа давлат ҳизматчиларининг иш ташлашлари давом этмоқда. Чоршанба куни намойишчилар ва полиция ўртасида юз берган тўқнашувлар оқибатида икки фуқаро ҳалок бўлган эди.

АҚШ ҳукумати зилзиладан азият чеккан Эрон халқига инсонпарварлик ёрдамини жўнатиш ниятида.

АҚШ Давлат департаменти матбуот вакили Ричард Баучерга кўра, мазкур ёрдам доирасида Эронга сув тозалагичлар, дори-дармон ва чодирлар юборилади. Вашингтоннинг Теҳрон билан дипломатик алоқаси бўлмагани боис, ёрдамлар БМТ каналлари орқали жўнатиладиган бўлди. Ёрдамларнинг умумий қиймати 300 минг долларни ташкил этади. Эслатиб ўтамиз, Эронда ўтган ҳатфа рўй берган кучли зилзила оқибатида жами 220 киши нобуд бўлди, минглаб киши бош панасиз қолди.

Бугун Жанубий Кореяда мамлакат президенти Ким Дэ Жунг ўғли устидан маҳкама жараёни бошланди.

У маҳаллий тадбиркорларидан уч миллион доллар миқдорда пора олганликда айбланмоқда. Президентнинг яна бир ўғли ҳам коррупцияда айбланиб, унга нисбатан жиноят иши қўзғатилган. Ким Дэ Жунг ҳукумат тепасига 1998 йилда, коррупция ва уюшган жиноятчиликка қарши кураш шиори остида келган эди. Ўтган ҳафта у ўғилларининг қилмишлари учун парламентдаги ўз сайловчиларидан кечирим сўради.

Ҳаво шарида ер айланаси бўйлаб сайёҳатини давом эттираётган америкалик сайёҳ Стив Фоссет анча мураккаб вазиятга тушиб қолди.

Шимол тарафдан эсган кучли шамол унинг ҳаво шарини жанубий қутб томон учириб юборди. Ҳозирда америкалик сайёҳ деярли музликлар устидан учиб ўтмоқда. Мураккабликларга қарамай. Фоссет ер айланаси бўйлаб сайёҳатини муваффақиятли якунлашга бел боғлаган. У олдин ҳам ўзининг ҳаво шарида ер куррасини айланиб чиқишга беш марта уриниб кўрган эди. Олдинги уринишлар бесамар якун топган.

Британиянинг "The Who" рок гуруҳи бас гитарачиси Жон Энтвисл кеча Лас Вегасда 57 ёшида юрак ҳуружидан оламдан ўтди.

Шу кунларда унинг гуруҳи Шимолий Америка бўйлаб гастрол-концертларни ўтказаётган эди. Шундай қилиб "The Who" гуруҳи ўзининг яна бир талантли ижрочисидан айрилди. 1978 йилда гуруҳ барабанчиси Кэит Мун ҳам автомобил фалокати туфайли ҳалок бўлган эди.

АҚШ ТОШКЕНТДАГИ ФТИЗИАТРИЯ ВА ПУЛЬМОНОЛОГИЯ ИЛМИЙ ТЕКШИРИШ ИНСТИТУТИГА БИНОКУЛЯР МИКРОСКОПЛАР ҲАДЯ ЭТДИ

28 июн куни АҚШнинг Ўзбекистондаги элчиси жаноб Жон Хёрбст Тошкентдаги Фтизиатрия ва пульмонология илмий текшириш институтига бинокуляр микроскоплар тақдим этди.
Маълумотларга кўра, мазкур микроскоплар АҚШ Конгресси томонидан Ўзбекистон Республикасида тиббиёт соҳасини қўллаб-қувватлаш учун ажратилган ассигнациялар эвазига олиб келинган.

НАРКОТИК МОДДАЛАР ЁҚИБ ЮБОРИЛДИ

Ўзбекистон ҳукумати топшириғига кўра, 27 июн куни Ўзбекистон Миллий хавфсизлик хизмати журналистлар иштирокида 2230 кило наркотик моддани ёқиб юборди. Маълум бўлишича, 1994 йилдан буён Ўзбекистонда 35 тонна наркотик модда йўқ қилинган.
Маълумотларга кўра, кейинги пайтда қора бозорда наркотик моддалар нарҳи ошган. Бир йил олдин 1 кг. героин 4,5-5 минг долларга баҳоланган бўлса, бугунги кунда унинг нарҳи 6-7 минг долларни ташкил этмоқда.

ЎЗБЕК ЖУРНАЛИСТЛАРИ КАСБ БАЙРАМИНИ НИШОНЛАДИЛАР

27 июн ўзбек журналистлари ўзларининг касб байрамини нишонладилар. Мазкур байрам муносабати билан марказий нашрларда Ўзбекистон президенти Ислом Каримовнинг байрам табриги эълон қилинган. Аксар маҳаллий журналистларнинг Озодлик мухбирига айтишларича, бу йилги байрам табриги аввалгиларидан тубдан фарқ қилади. Унда хусусан шундай дейилади: «… ўзимизга бир савол берайлик: мана шундай турли хил қарашлар, ўзаро қарама-қарши бўлган фикрлар матбуотимиз, оммавий ахборот воситаларимизда ўзига ўрин топаяптими? Бугун масалани мана шу тарзда қўйиш вақти етди, деб ўйлайман.» «Моҳият» газетаси бош муҳаррири, ёзувчи Абдуқаюм Йўлдошевнинг Озодлик мухбирига айтишича, газеталарда даврнинг энг аччиқ ҳақиқатлари чоп этилмаслигининг сабаби, кўпчилик муҳаррирларда ички цензуранинг мавжудлиги, журналистларда ҳукумат томонидан берилган эркинлик вақтинча, деган фикр ҳукмрон эканлигидадир.
Тошкентнинг Мирзо Улуғбек боғида ўтказилган байрам сайли давомида Ўзбекистон оммавий ахборот воситаларини демокриятлаштириш ва қўллаб қувватлаш ижтимоий-сиёсий жамғармаси вакиллари бир қатор фаол журналистларни қимматбаҳо совғалар билан тақдирлашди.

Бугун Туркия бош вазири Булент Эжевит парламентда ўз партиясининг учрашувига иштирок этди.

Унинг соғлиқ муоаммолари сиëсий барқарорлик бошланиши тўғрисидаги ҳавотирларга сабаб бўлмоқда. 77 ëшли Эжевит янада эркинроқ ўтириш учун ўзининг одатдаги машинасида эмас, балки микроавтобусда парламентга борди. Эжевит парламент биносига кириб борганида депутатлар уни гулдирос қарсаклар билан кутиб олишди. Сўнгги пайтларда Эжевит турли хасталиклардан азият чекмоқда. У март ойида икки марта шифоҳонага ëтқизилганидан буëн уйида даволанмоқда. Кеча у тиббий текширувдан ўтганидан кейин 2-3 хафта ичида ишга қайтишини айтди. Эжевитнинг соғлиқ муоаммолари, у истеъфо бериши, унинг коалиция ҳукумати қуллаши ва муддатидан олдин сайловлар ўтказилишига сабаб бўлиши мумкин, деган хавотирларга сабаб бўлмоқда. Бугун Эжевит навбатдаги сайловлар белгилангани каби 2004 йил апрел ойида ўтказилишини айтди.

Бугун Европада хавфсизлик ва ҳамкорлик ташкилоти Қозоғистоннинг сиëсий партиялар тўғрисидаги янги қонуни хақда хавотирланиш билдириб, бу сиëсий плюрализмга зарар етказишини таъкидлади.

Шу хафтада Қозоғистон парламентининг ҳар икки палатаси томонидан қабул қилинган янги қонунга кўра, партия руйҳатдан ўтиш учун 3.000 дан 50.000 гача аъзоси бўлиши керак. Европада хавфсизлик ва ҳамкорлик ташкилотининг билдиришича, ушбу шартни фақат ҳукуматга тарафдор партияларгина бажара олади. Қозоғистон президенти Нурсултон Назарбоевнинг қонун лойиҳасини имзолаши кутилади ва бу кучга кирганидан кейин барча сиëсий партиялар янги шартларга кўра қайта руйҳатдан ўтишлари керак.

Бугун Киевда Украина президентлик ва ҳукумат бинолари қошида бир неча юз одам тўпланиб, президент Леонид Кучмани истеъфо беришга чақирдилар.

Муҳолифат партиялари томонидан уюштирилган номойишда сўзга чиққанлар, Кучма ҳукуматини коррупцияда, жиноятчиликда айбладилар ва Украина конститутцияси ҳурмат қилинишини талаб этдилар. Кучма Россияга Украинада ҳаддан зиëд сармоя ҳуқуқларини бергани тўғрисида ҳам шикоят қилинди.

Бугун Қирғизистоннинг Тўқтағул туманида суд депутат Азимбек Бекназаровнинг шикоят аризасини кўриб чиқишни бошлади.

Ўтган ойда суд, Бекназаровни Жалолобод прократурасида терговчи сифатида хизмат қилган пайтида салоҳиятини суистеъмол этганида айбдор, деб топган эди. Бекназаров суднинг ушбу ҳукми бекор этилишини сўрамоқда. Айни чоғда Жалолобод шаҳрида ва Ўш шаҳри атрофида Бекназаровга тарафдор бўлган юзлаб одам тўпланиб, суднинг шикоят аризаси юзасидан қандай қарор чиқаришини кутиб туришибди. Эслатиб ўтамиз, март ойида Аҳси туманида Бекназаровни қўллаш учун ўтказилган намойишда милиция ўқ узгани оқибатида намойиш иштирокчиларидан 5 одам ҳалок бўлган эди. Ҳозир Қирғизистон парламенти мамлакатдаги вазиятни муҳокама қилмоқда.

БМТнинг билдиришича, Афғонистон шимолида рақиблашган фракциялар ўртасида отишмалар содир бўлгани оқибатида юзлаб одам уйларини ташлаб кетишга мажбур бўлган.

БМТ матбуот вакили Маноэл Силванинг айтишига қараганда, талон-тарож ва вайронагарчиликлардан кейин тахминан 150 оила уйсиз қолган. Тўқнашувлар туфайли БМТ ўзининг 3 нафар ишчисини Майманадан Мазори-Шарифга кўчирди. Силванинг айтишига кўра, кеча тунда Сари-Пул тумани атрофида Абдул Рашид Дўстум етакчилигидаги этник ўзбек кучлари ва аксари этник тожиклардан иборат “Жамияти-Исломий” фракцияси кучлари ўртасида тўқнашувлар давом этган.

БМТ хавфсизлик кенгаши Афғонистоннинг ўтиш даври ҳукуматини қўллаб, уни инсон хуқуқларини ҳурмат этадиган давлат ташкил қилишга ундади.

Кеча кенгашга аъзо 15 давлат томонидан бир овоздан қабул қилинган резолюцияда Афғонистон халқи Лўя Жирга учрашуви муваффақиятли бўлгани билан қутланди. Кенгаш Лўя Жирга Хамид Карзайни ўтиш давридаги президент этиб сайлаганини мамнуният билан қабул қилди. Маълумки, Карзай, 18 ойдан кейин миллий сайловлар ўтказилишига қадар, давлат бошлиғи сифатида хизмат қилади. БМТ хавфсизлик кенгаши Афғонистоннинг ўтиш давридаги ҳукуматини ўз мажбуриятларини бажаришга, жумладан асосий қонунни ишлаб чиқишга, марказий ҳукуматни мустаҳкамлашга, миллий армия ва полиция кучларини ташкил қилишга чақирди. Кенгаш, шунингдек, янги ҳукуматни наркотикларга қарши курашишга, инсон хуқуқлари ҳимоя қилинишини таъминлашга, адлия соҳасида ислоҳотлар ўтказишга ва иқтисодиëтни ривожлантириш учун замин яратишга ҳам ундади.

Шу ҳафтада АҚШ президенти Жорж Буш, агар фаластинликлар террорга муроса қилмайдиган янги раҳбарият танласаларгина мустақил давлат учун ëрдам олишлари мумкин, деб айтган гапларига халқаро ҳамжамиятнинг муносабатлари турлича бўлмоқда.

Канада конференциясида иштирок этаëтган саккизлик гуруҳи лидерларининг аксарияти, фаластинликлар ўз лидерини танлашда эркин бўлишлари кераклигини қайд этишди. Британия бош вазири Тони Блэр, фаластинликлар терроризмни рад этадиган лидер сайлашлари зарурлигини таъкидлади. Канада бош вазири Жан Кретьеннинг айтишига қараганда, Фаластин раҳбари Ясир Арафат ўрнига бошқа бир лидер сайланиши балки ижобий қадам бўлиши мумкин, лекин келаси январ ойида ўтказиладиган президентлик ва парламент сайловлари натижаларини муҳокама қилишга вақт эрта. Бугун Исломий конференция ташкилотига аъзо давлатларнинг ташқи ишлар вазирлари бир баëнот тарқатиб, Арафат раҳбариятини қўллаб-қувватлашди.

ҚАШШОҚЛИК БОЛАЛАР НИГОҲИДА

Ўзбекистон Бадиий Академиясининг кўргазмалар залида «Қашшоқлик болалар нигоҳида» мавзуида кўргазма-танлов бўлиб ўтди. Танлов-кўргазмани БМТнинг Аҳолишунослик жамғармаси ва Ўзбекистон Бадиий академияси ташкил этишган. Кўргазмада 6 ёшдан 19 ёшгача бўлган ўзбек ёш мусаввирларининг қашшоқлик мавзуида чизган 300 га яқин асарлари намойиш этилди.
Кўргазма мавзуига қарамай¸танловга қўйилган асарларнинг фақатгина учдан бир фоизида қашшоқлик мавзуси акс эттирилган эди. Қашқадарё, Сурҳондарё ва қорақалпоқистонлик ёш рассомларнинг асарларида қашшоқлик мавзуси кўпроқ ифода этилган.

ФЕДЕРАЛ ҚИДИРУВ БЮРОСИ ТОШКЕНТДА СЕМИНАР ЎТКАЗМОҚДА

АҚШ Федерал қидирув бюроси (FBI) Тошкент шаҳрида «Ички назорат» мавзуида семинар бошлади. АҚШ Давлат департаменти билан ҳамкорликда ўтказилаëтган бу семинарда ҳуқуқни муҳофаза қилиш органлари ичидаги жиноятчиликка қарши кураш масаласи муҳокама қилинади.
Семинарда АҚШ Федерал қидирув бюроси ҳодимларидан ташқари, Америка полицияси вакиллари ва Бирмингем шаҳар прокурори ёрдамчиси иштирок этаётир. Семинар уч кун давом этади.

Иордан дарёсининг ғарбий соҳилидаги фаластин ҳудудларида Исроил харбийларининг рейдлари бугун ҳам давом этди.

Ҳозирга қадар Фаластининг етти шаҳри исроилликларнинг тўлиқ назоратида. Кеча Хеврондаги амалиётлар давомида Исроил аскарлари тўрт фаластин полициячисини отиб ўлдирган. Бугун ғарбий соҳилдаги қишлоқларнинг бирида етти фаластинлик террорчиликда гумон этилиб ҳибсга олинди.

Фаластин ҳукуматининг юқори мартабали вакили Саэб Эрекат мухторият президентлиги ҳамда парламент сайловлари келаси йилнинг январ ойида ўтказилишини маълум қилди.

Маҳаллий вакиллик органларига сайловлар эса март ойига белгиланди.
Эрекатга кўра, Фаластин раҳбарияти шунингдек, мухторият суд тизими ва хавфсизлик ҳизматини ҳам ислоҳ қилиш ниятида. Президентлик сайловларида Ясир Арафат ўз номзодини қўядими, йўқ, бу ҳақда у кейинроқ маълум қилажагини айтган. Душанба куни АҚШ Президенти Жорж Буш келаси уч йил ичида мустақил Фаластин давлатини барпо этиш режасини ўртага ташлади. Шу билан бирга Буш фаластин халқини ўзларига янги, террорчилик ва ҳар хил иддаоларда холи раҳбар сайлашга чақирди. "Нью-Йорк таймс" (New York Times)газетасининг ёзишича, АҚШ раҳбарининг бундай қарорига Ясир Арафат террорчи гуруҳларнинг бирига 20 минг доллар ўтказгани ҳақидаги маълумот сабабчи бўлган.
Айнан ана шу ташкилот кейинчалик Қуддусда содир этилган сўнгги террорчилик ҳаракатига жавобгарликни зиммасига олган эди.

Яқин Шарқ низосини тинч йўл билан ҳал этиш ва халқаро террорчиликка қарши кураш масалалари бугун Канадада очилажак катта саккизлик саммити диққат марказида бўлади.

Шунингдек, саммит иштирокчилари жаҳон иқтисоди, қашшоқликка қарши кураш ва Африка мамлакатларига ёрдам масалаларини ҳам мухокама этадилар. Канаданинг саммит ўтаётган Альберт вилоятида хавфсизлик чоралари кучайтирилган.

Халқаро валюта жамғармаси вакиллари фикрича, Ўзбекистон ўзининг ўта марказлашган ва чигал иқтисодини ўнглаб олишда "сезиларли ўсиш"га эришган.

Шунга қарамай, бугун Тошкентда чиқиш қилган ташкилот вакиллари мамлакатда бошланган пул ислоҳоти ва фискал сиёсатда чекинишлар бўлиш – бўлмаслигини аниқлаш учун мазкур жараённи яна икки ой давомида кузатажакларини айтишган. Ўтган йили Халқаро валюта жамғармаси Ўзбекистонда иқтисодий ислоҳотлар кузатилмагани боис у ердаги ўз вакилини чақириб олган эди. Бироқ, сал ўтиб Ўзбекистон ва Халқаро валюта жамғармаси ўртасида меморандум имзоланди. Унга кўра Тошкент ҳукумати шу йилнинг ўртасига келиб сўм конвертациясига чекловларни бекор қилиш мажбуриятини олган эди.

Давомини ўқинг

XS
SM
MD
LG