Линклар

Шошилинч хабар
23 август 2019, Тошкент вақти: 07:04

Халқаро янгиликлар

ТУРКИЯ ДЕЛЕГАЦИЯСИ ЎЗБЕКИСТОНГА ТАШРИФ БУЮРДИ

23 июн куни Туркиянинг Туркий Республикалар бўйича давлат вазири доктор Решат Доғру бошчилигидаги расмий делегация Ўзбекистонга ташриф буюрди.
Туркиянинг Ўзбекистондаги элчихонаси матбуот хизмати вакилларининг Озодлик мухбирига берган маълумотларига кўра, делегация ташрифи давомида Ўзбекистон ташқи иқтисодий алоқалар вазирлиги билан Туркия Жумҳурияти Бош вазирлиги девони қошидаги Туркия ҳамкорлик ва ривожланиш агентлиги (TIKA) ўртасида ҳамкорлик қилиш тўғрисида ҳужжат имзоланади. 24 июн куни делегация вакиллари Ўзбекистон Олий Мажлиси Парламентлараро алоқалар қўмитаси раиси Эркин Воҳидов билан учрашиб, ўзаро ҳамкорлик борасида келишиб олдилар.
25 июнда делегация вакиллари Ўзбекистон Соғлиқни сақлаш вазирлиги, Маданият вазирлиги ҳамда Қишлоқ ва сув хўжалиги вазирликларида учрашувлар ўтказиши мўлжалланмоқда.
Туркия элчихонаси матбуот хизмати вакилининг Озодлик радоисига берган маълумотларига кўра, делегация пайшанба куни Тошкентдан Бишкекка учиб кетади. У ерда Решат Доғлунинг Қирғизистон президенти Асқар Ақаев билан учрашув ўтказиши кутилмоқда.

Бугун Исроил кучлари Ғазо ҳудудида жангариликда гумон этилган 6 фаластинликни отиб ўлдирди ва Фаластин лидери Ясир Арафатнинг Рамаллоҳ шаҳридаги қароргоҳини яна қуршовга олди.

Фаластин манбаларининг билдиришича, Ғазода қилинган ҳаво хужумларида радикал Ҳамаз гуруҳининг камида 2 та юқори лавозимли амалдори ҳалок бўлган. Исроил ҳарбийлари бу хабарни рад этишди. Ҳамаз яқинда Исроилда содир этилган бир неча портлаш жавобгарлигини ўз зиммасига олди. Ғазодаги хужумдан сал олдинроқ, Исроил танклари Рамаллоҳ шаҳрига кириб, Арафат қароргоҳи атрофини тўсиб қўйди. Бугун Исроил аскарлари Женин ва Хеброн шаҳарларида ҳам жангариликда гумон этилган камида 10 фаластинликни ҳибсга олдилар.

Бугун Озарбайжон президенти Ҳайдар Алиев Кобулда жойлашган халқаро хавфсизлик кучлари сафида Озербайжон аскарлари ҳам хизмат қилишини айтди.

Ўтган хафтада Туркия Британиядан халқаро хавфсизлик кучларига қўмондонлик қилиш вазифасини қабул қилди.

Бугун АҚШ ҳарбий амалдори “Ал Қаида” нинг Афғонистондаги аксил террор кампаниясида тармоқ деярли зарар кўрмагани тўғрисида қилган даъвосини рад этди.

АҚШ армияси матбуот вакили полковник Рожэр Кинг бундай даъволар ҳақиқатга тўғри келмаслигини қайд этиб, АҚШ етакчилигида олиб борилган ҳарбий амалиëтларда “Ал Қаида” нинг фаолият кўрсатиш имкониятига катта зарар етказилганини таъкидлади. Бугун АҚШнинг Афғонистондаги қўмондонлиги тарқатган бошқа бир хабарга кўра, Хост шаҳри яқинидаги АҚШ махсус қўшинларига қарата бир ракета отилган. Талофатлар ва бу ҳодиса қачон содир бўлгани хақда маълумот берилмади.

Бугун Россия чегара соқчилари матбуот вакилининг айтишига кўра, кеча тунда Афғонистондан Тожикистонга ўтишга уринган 2 киши отиб ўлдирилган.

Тожикистон ва Россия чегара соқчилари жорий йил бошидан буëн, аксари героиндан иборат 2 тоннадан ошиқ наркотикни мусодара қилишди, шунингдек, 30 га яқин контрабандистни отиб ўлдиришди ва Афғонистондан Тожикистонга наркотиклар олиб ўтишга уринган яна 700 кишини ҳибсга олдилар. БМТ маълумотларига қараганда, шу йили Афғонистонда тахминан 3.000 тонна кўкнор етиштирилиши мумкин. Афғонистонда ишлаб чиқарилаëтган наркотиклар қўшни давлатлар орқали Европага ташилмоқда.

Шанба кунги зилзила оқибатида кўплаб қишлоқ вайрон бўлганидан кейин бугун Эрон расмийлари уй-жой қуриш ишларида хавфсизлик стандартларига риоя этмаëтганлари учун танқидга учрадилар.

Депутат Валиоллоҳ Азарашнинг айтишига қараганда, зилзилада кўп одам ҳалок бўлганига уйларнинг омонат қурилгани сабаб бўлган. Эрон Қизил ярим ой жамияти расмий маълумотларига кўра, табиий офат натижасида тахминан 220 одам қурбон бўлган, аммо маҳаллий расмийларнинг айтишларича, ўлган одамлар сони бу кўрсатгичдан анча кўп бўлиши мумкин. Шанба кунги зилзила оқибатида Қавзин вилоятида кўплаб қишлоқ вайрон бўлди, минглаб одам жароҳатланди ва уйсиз қолди. Бугун Эронга яна бир неча давлат, жумладан Белгия 250.000 евро ва Қувайт Қизил ярим ой жамияти 50.000 доллар қимматида шошилинч равишда ëрдам жўнатишини билдирди.

Бугун Қозоғизистон мухолифат лидери ва собиқ ҳукумат расмий вакилининг суд иши бошланади.

Собиқ савдо ва саноат вазири Муҳтор Аблязов коррупцияда айбланмоқда. Аблязов адвокатларининг айтишларича, Қозоғистон Демократик танлови ҳаракати лидери Муҳтор Аблязовга қарши қўйилган барча айбномалар сиëсий аҳамиятга моликдир. Мухбиримизнинг айтишига қараганда, Алматида ўтказилаëтган суд ишида ўнлаб одамнинг гувоҳлик бериши кутилади.

Бугун Пекинда Хитой ва Қирғизистон президентлари 8 та янги иккитомонлама шартномани имзоладилар.

Иккитомонлама солиқ олмаслик, академик сертификатларни тан олиш, адлия вазирликлари ўртасида, энергетека ва бошқа соҳаларда ҳамкорлик қилиш - имзоланган келишувлар жумласига киради. Эртага президент Асқар Ақаев Хитой бош вазири Жу Ронгжу билан музокаралар олиб боради. Ақаев Қирғизистон мустақиллигининг биринчи 10 йиллигига бағишланган сўнгги китобини ҳам тақдим этади.

Бугун Россия президенти Владимир Путиннинг айтишига қараганда, НАТОга аъзолик - альянсга қўшилишга ҳаракат қилаëтган давлатларнинг хавфсизлигини мустаҳкамламайди.

Кремлда матбуот конференциясида сўз юритган Путин, Россия номзод давлатлар Эстония, Латвия ва Литванинг НАТОга аъзо бўлишига қаршилик кўрсатмаслигини, аммо НАТОнинг кенгайтирилиши бу давлатлардаги хавфсизлик вазиятига ëрдам бермаслигини қайд этди. Путин, шунингдек, Жаҳон савдо ташкилотини Россияни тезроқ қабулга қилишга чақириб, Россиянинг қўшилиши ташкилотга иқтисодий ишлар учун бир структура яратишга ва иқтисодий жиноятга қарши курашда ëрдам беришини айтди. Президент Европа иттифоқининг, Литва ва Польша ўртасида жойлашган Калининградга саëҳат қилувчи россияликларга виза режимини жорий этиш режасига мутлақо қарши эканини яна такрорлади. Унинг таъкидлашича, Россия давлатнинг суверент худудини ажратиб қўядиган сиëсатни ҳеч қачон қабул қилмайди.

АҚШнинг Аризона штатида ўрмон ëнғинлари ҳали ҳам давом этмоқда.

Кучли шамол эсаëтгани натижасида ўт ўчирувчиларнинг иши янада оғирлашди. Ҳозир тахминан 80 километрлик масофагача тарқалган ўрмон ëнғинларини умуман тўхтатиб бўлмаяпти. Ëнғин оқибатида ўрмон атрофидаги қишлоқларда яшовчи 25.000 одам эвакауция қилинди ва кўплаб уйлар кул-тепага айланди. Тез тарқалаëтган ëнғин энди ўрмон яқинидаги Шов Лов шаҳарчасига ҳам таҳдид этмоқда.

Америкалик ва британиялик ҳарбийлар Афғонистоннинг жанубий минтақаларида толиблар лидери Мулла Умар ва унинг сафдошларини ушлаш бўйича кенгмиқёсли амалиётлар ўтказмоқдалар.

Мазкур амалиётларда юзлаган ҳарбий хизматчи иштирок этмоқда. Амалиётлар мулла Умар мамлакатнинг жанубидаги тоғли минтақада яширинган, деган маълумот қўлга киритилганидан сўнг бошланди. Мулла Умар билан бирга собиқ толиблар ҳукуматида Мудофаа вазири лавозимини эгаллаб турган мулла Убайдуллоҳ ҳамда бир қатор бошқа шахслар борлиги тахмин қилинмоқда.
Британия денгиз пиёдалари Покистон чегарасидаги қишлоқда аксилтеррор амалиётлари бошлангандан буён биринчи бор энг йирик қурол-яроғ омборини топдилар. Топилган қуроллар орасида минометлар, ракеталар бор. 10 киши ҳибсга олинди.

Усама бин Ладиннинг вакили "Ал-Қаида" террористик ташкилоти раҳбари ва унинг яқин сафдоши Айман ал Завахри АҚШ ҳарбийлари томонидан ўтказилган бомбардировкалар чоғида Афғонистоннинг шарқидаги тоғларда нобуд бўлишган, деган маълумотларни инкор этди.

Сулаймон Абу Гейснинг чиқиши ёзилган видеотасмани бугун Қатарнинг Ал Жазира телеканали намойиш қилди.
Абу Гейс "Ал-Қаида" бутун дунё бўйлаб Америкага қарашли объектларга янги хужумлар уюштиришга тайёр эканлигини билдирди. Туниснинг Жерба оролидаги синагогда шу йилнинг апрелида содир этилган террористик хуруж ҳам "Ал-Қаида" томонидан уюштирилган эди, деди Абу Гейс.
Видеоёзувнинг қалбаки эмаслигини тасдиқлашнинг ҳозирча иложи йўқ, дейилади хабарларда. Унинг қачон ва қаерда суратга олингани аниқ эмас. Телеканал раҳбарияти ёзувни қаердан олгани ҳақида хабар бермаган.
АҚШ маъмурияти вакиллари ҳозирча вазиятни шарҳламаяптилар. Вашингтон Усама бин Ладиннинг ўлганлиги тўғрисида ишончли далиллари йўқ эканлиги ҳақида аввал баёнот берган эди.

Россиянинг Краснодар ўлкасида 200 нафар месхети турки шанба куни очлик эълон қилди.

Маҳаллий ҳокимиятнинг месхети туркларига нисбатан олиб бораётган дискриминацион сиёсати туфайли ўтказилмоқда мазкур норозилик акцияси.
Бу ҳақда "Франс-пресс" ахборот агентлиги инсон ҳуқуқлари бўйича Новороссийск қўмитасидан олинган маълумотга таяниб хабар берган.
Шу йилнинг февралида Краснодар ўлкасининг Қонун чиқарувчи мажлиси мигрантлар ҳуқуқларини камситувчи қарор қабул қилган эди.

Озарбайжон президенти Ҳайдар Алиев мамлакат конституциясига ўзгартириш киритиш бўйича рефередум ўтказиш ҳақида фармонни имзолади.

Референдумни 24 августда ўтказиш белгиланди.
Асосий қонуннинг 20 та моддасига, жумладан президент сайлови тўғрисидаги моддасига ҳам ўзгартишлар киритиш таклиф қилинмоқда. Умумхалқ овоз беришида бу таклифлар қабул қилинса, мамлакат президентлигига номзод сайловчилар овозларининг оддий кўпчилигини олиши кифоя қилади. Ҳозир эса президент бўлиш учун номзод сайловчилар овозларининг учдан икки қисмини олиши лозим.
Ёши 79га чиққан Алиев шу ҳафтада ўз номзодини учинчи бор президентликка қўйишга қарор қилганини эълон қилди. Сайловлар кейинги йилнинг октябрида бўлиб ўтади.
Мухолифат Озарбайжонда 1998 йили бўлиб ўтган президентлик сайловларини бойкот қилган эди. Хорижий кузатувчилар ўша сайловларни нодемократик сайловлар, деб баҳолагандилар.

Исроил ҳарбийлари танклар ёрдамида бугун эрталаб Иордан дарёсининг ғарбий соҳилидаги Фаластинга қарашли Қалқилия шаҳрига кирдилар.

Шаҳарда комендантлик соати жорий этилди.
Қалқилия шаҳрига қилинган рейд Исроил ҳарбийлари ўтказаётган кенгмиқёсли амалиётларнинг бир қисмидир. Бу амалиётлар 30 га яқин исроилликнинг нобуд бўлишига олиб келган бир неча террористик хуружга жавоб тариқасида ўтказилмоқда.
Исроил ҳарбийлари Наблус, Женин, Тулкарм, Байтулҳам шаҳарларини ва Рамаллоҳ шаҳри атрофларини ишғол қилиб турибдилар.
Иордан дарёсининг ғарбий соҳилидаги амалиётлар қўмондони генерал Амос Гилад Исроил радиосига берган интервьюсида армия Фаластин ҳудудларида ҳарбий бошқарувни жорий этмоқчи эмас, гап "террористларнинг базалари" устидан назорат ўрнатиш ҳақида бормоқда, холос, деди.
Ўтказилаётган ҳарбий амалиётлар муносабати билан бугун Исроилда заҳирадаги ҳарбий хизматчиларни сафарбар қилиш эълон этилди.

Қирғизистон сиёсий мухолифатининг бир неча юз фаоли бугун мамлакат жанубидаги Ўш шаҳрига етиб келди.

Улар парламент депутати Азимбек Бекназаровга қўйилган айбловларни бекор қилишни талаб этаяптилар. Намойишчилар Ўшда митинг уюштиришни режалаштирганлар.

Мазкур акция тафсилотларини дастуримиз давомида тинглашингиз мумкин.

Шанба куни кечқурун Севилья шаҳрида глобализмга қарши кучларнинг кўпминг кишилик намойиши бўлиб ўтди.

Мазкур акция икки кун давомида бу шаҳарда бўлиб ўтган Европа Иттифоқи саммитининг ёпилиши муносабати билан ўтказилди.
Полиция маълумотларига кўра намойишда 20 минг киши иштирок этди. Намойиш уюштирувчиларига кўра эса, акцияда қатнашганлар сони ўн баравар кўпдир.
Севильяда бўлиб ўтган намойишда, март oйида Барселонада ўтказилган намойишдан фарқли ўлароқ, полиция билан тўқнашувлар юз бермади.

Эроннинг шимоли-ғарбида қутқарувчилар зилзила оқибатида вайроналар остида қолганларни қутқариш ишларини давом эттирмоқдалар.

Мамлакат расмийлари шанба куни камида 500 киши нобуд бўлгани, бир ярим мингдан зиёд киши жароҳатлангани ҳақида эълон қилгандилар. Бироқ олис тоғ қишлоқларидан хабарлар етиб келгач, қурбон бўлганлар миқдори анча кўп бўлиши мумкинлиги тахмин қилинмоқда.
Қизил Ярим Ой жамияти маълумотларига кўра 5 минг уй вайрон бўлган, 25 минг киши бошпанасиз қолган. Эроннинг шимоли-ғарбидаги Казвин вилоятига бугун БМТнинг махсус миссияси жўнаб кетди. У юз берган табиий офат кўламини аниқлайди ва бу минтақага шошилинч инсонпарварлик ёрдами етказишни уюштиради.
АҚШ президенти Жорж Буш Қўшма Штатлар зилзиладан зарар кўрган минтақага озиқ-овқат ва дори-дармонлар жўнатишга тайёр эканлигини билдирди.

Хитой Жанубий Кореянинг Пекиндаги консулхонасига кириб олган 20 дан зиёд Шимолий Корея фуқаросига мамлакатдан чиқиб кетишга рухсат беради, деб баёнот берди Хитой Ташқи ишлар вазирлиги вакили.

Агар улар Хитой ҳудудида тартиббузарлик қилмаган бўлсалар, Хитойдан ҳеч қандай монеликсиз чиқиб кетишлари мумкин, деди вакил.

Бугун Испанияда яна портлаш содир этилди.

Соҳил бўйидаги Мижас шаҳридаги икки меҳмонхона оралиғида ичига бомба қўйилган машина портлади. Қурбонлар тўғрисида ҳозирча айтилмаяпти. Бу каби портлашлар Испания жума куни ҳам содир этилганди. Мамлакат жанубидаги шаҳарларда ичига бомба қўйилган икки машина портлатилгани оқибатида олти нафар хорижлик сайёҳ жарохат олди. Ҳеч бир ташкилот мазкур портлашга жавобгарликни зиммасига олмади. Полиция мазкур портлашларда ЭТА айирмачиларини айблади.

Бугун Россияда Улуғ Ватан уруши бошланган кун – Хотира ва мотом куни сифатида нишонланмоқда.

Бутун мамлакат бўйлаб давлат байроқлари тушуриб қўйилган. Ушбу сана муносабати билан Россия Президенти Владимир Путин ва ҳукуматнинг бошқа аъзолари Қизил майдондаги номаълум солдат қабоига гулчамбар қўйдилар. Шунингдек, Москванинг турли бурчакларида намойишлар, ҳар хил тадбирлар бўлиб ўтмоқда. Пойтахтнинг Белорус вокзали ёнида мингга яқин уруш фахрийси тўпланган.

АҚШ Федерал қидирув бюроси террорчилар навбатдаги ҳуружларни уюштиришда бензин ташувчи юк машиналардан фойдаланишлари мумкинлигидан огоҳлантирди.

Федерал қидирув бюроси вакилининг айтишича, ҳоҳ Қўшма Штатларда бўлсин ҳоҳ бошқа давлатларда, ёқилғи қуйиш шаҳобчалари, яҳудий мактабари ва синагогалари навбатдаги террорчилик ҳаракатлари объекти бўлиши мумкин. Апрель ойида бензин ташувчи юк машинаси портлатилгани оқибатида Тунисда 19 киши нобуд бўлган эди.

Ҳиндистон ўз қўшинларини Кашмирга туташ ҳудудлардан орқага олмас экан, Покистон қўшинлари назорат чизиғини тарк этмайди.

Бугун бу ҳақда Исломобод раҳбари Парвез Мушарраф баён қилди. Мушаррафнинг таъкидлашича, бир неча хафта олдин Покистон ва Ҳиндистон ўртасида Кашмир устида уруш чиқишига сал қолганди. Шунга қарамай, дейди Покистон раҳбари, ҳозир ҳам вазият таранглигича қолмоқда. Бу мамлакатларни иккига ажратувчи назорат чизиғининг ҳар икки тарафига миллионлаб қўшин жалб этилган. Гарчи ҳар икки томон ўт очмасликка мажбурият олишган бўлишсада, у ерда вақти –вақти билан ўқ овозлари эшитилиб туради.

АҚШ мустақил Фаластин давлати барпо этиш масаласи юзасидан ўз қарашларини қайта кўриб чиқиши мумкин.

Бугун бу ҳақда Оқ уй вакилларидан бири маълум қилди. Олдинроқ АҚШ Президенти Жорж Буш Исроилнинг Фаластин жангарилари амалга оширган террорчилик ҳаракатларига жавобан олиб бораётган чораларини қўллаб-қувватлаганди. Бушга кўра Исроил ўзини террорчилардан ҳимоя этишга ҳақли. Жума куни бутун Исроил бўйлаб армияга сафарбарлик эълон этилди. Бугунга келиб ғарбий соҳилдаги олти фалатин шаҳри исроилликлар томонидан ишғол этилди. Ушбу хафта фаластин террорчилари томонидан содир этилган ҳуружлар оқибатида жами 30 исроиллик ҳалок бўлди. Кеча Жининда Исроил харбийлари тўрт фаластинликни отиб ўлдирган, улар орасида ёш болалар ҳам бор. Бироқ, исроил харбийлари нишон нотўғри бўлганини айтишган.

Бугун Эронда кучли зилзила рўй берди.

ИРНА ахборот агентлиги тарқатган хабарга кўра зилзила оқибатида камида 500 киши ҳалок бўлган, 1000 га яқини жароҳатланган. Зилзила эпидмаркази мамлакатнинг шимолий-шарқида бўлиб, у Рихтер шкаласи бўйича 6.3 бални ташкил этган. Эрон радиосининг хабарларига кўра мамлакатнинг Казвин ва Хамадан вилоятлари зилзиладан кучли талофат кўрган. Ҳозирда мазкур худудларда қутқарувчилар иш олиб бормоқда. Шунингдек, зилзила эпидмарказдан 225 километр узоқда бўлган пойтахт Теҳронда ҳам қайд этилди.

Давомини ўқинг

XS
SM
MD
LG