Линклар

Шошилинч хабар
23 август 2019, Тошкент вақти: 07:12

Халқаро янгиликлар

ЎЗБЕКИСТОН ГУУАМ АЪЗОЛИГИДАН ЧИҚИШГА ҚАРОР ҚИЛДИ

Ўзбекистон Ташқи ишлар вазири Абдулазиз Комилов Ўзбекистон ГУУАМ ташкилотига аъзоликдан чиққанлигини айтди. Ушбу маълумотни А. Комилов Тошкентда бошланган «Марказий Осиёда низолардан кейинги барқарорлик» анжуманида журналистлар билан учрашув пайти ошкор этди.
Комиловнинг айтишича, ГУУАМ доирасида жиддий иқтисодий режаларни амалга оширишдан аввал бу ташкилот аъзолари ўзаро муносабатларини тартибга келтиришлари ва ўз ички муаммоларини ҳал этишлари лозим. Комиловнинг таъкидлашича, Ўзбекистонинг ГУУАМга аъзо мамлакатлар билан икки томонлама алоқалари яхши.
ГУУАМ- Грузия, Украина, Озарбайжон, Молдова ва Ўзбекистон иштирокида тузилган иқтисодий ва сиёсий ташкилот. У 1997 йилда ташкил этилган. Ўзбекистон ташкилотга 1999 йили қўшилган.

МУҲИМ АНЖУМАН ИШ БОШЛАДИ

14 июнь куни Тошкентда «Марказий Осиёда низолардан кейинги даврдаги барқарорлик» мавзусидаги халқаро конференция ўз ишини бошлади.
Конференция Лондондаги халқаро стратегик тадқиқотлар институти ва Ўзбекистон Республикаси Президенти қошидаги стратегик ва минтақалараро тадқиқотлар институти ҳамкорлигида ўтказилмоқда.
Анжуман иштирокчиларининг фикрича, конференция миллатлараро таҳдидларнинг тарқалишига қаршилик кўрсатишда халқаро ва минтақавий ҳамкорликка янги руҳ беради.
15 июнь куни конференция ўз ишини давом эттиради.

Покистон расмийларининг маълум қилишларича бугун Қарачида АҚШ Консулхонаси ёнида содир этилган портлаш оқибатида ўлганлар сони 11 га етган.

Шаҳар полицияси бошлиғи Комил Шохга кўра ўлганлар орасида тўрт нафар Покистон полициячиси ҳам бор.
Гарчи портлаш оқибатида АҚШ ваколатхонаси ходимлари жароҳат олмаган бўлсада, Консулхона биноси ва унинг яқинида жойлашган меҳмонхонага жиддий шикаст етган. Ҳозирча мазкур портлашларга ҳеч бир ташкилот жавобгарликни олмади. АҚШ Консулхонаси яқинида портлаган машина террорчи –комикадзе томонидан бошқарилгани таҳмин этилмоқда. Покистон президенти Парвез Мушарраф АҚШ ва унинг иттифоқчилари олиб бораётган аксилтеррор компаниясини қўллаб-қувватлаши борасида баёнотлар билан чиққанидан сўнг, мамлакатда экстремистлар анча фаоллашиб қолгани айтилмоқда. Бугун Ҳиндистон ташқи ишлар вазирлиги бўлиб ўтган инцидент юзасидан ташвишланиш изҳор этди.

Пентагон ўзининг ракетага қарши янги мудофаа дастури доирасида навбатдаги синовларни муваффақиятли ўтказди.

Тинч океанидаги АҚШ харбий денгиз қувватларига қарашли кемадан отилган тўсувчи ракета Гавай оролларидан учирилган баллистик ракетани уриб туширди. Кема радарлари ракета йўналишини тўғри аниқлаб, уни 100 миль масофадан туриб аниқ нишонга олган. Кеча Америка Қўшма Штатлари 1972 йилда имзоланган Баллистик ракеталарга қарши мудофаа тўғрисидаги шартномадан расман чиқди. Мазкур шартнома янги синовлар ўтказилишини чеклаб келган эди.

Жанубий Осиё бўйлаб сафарини якунлаган АҚШ Мудофаа вазири Дональд Рамсфелд Қашмир бўйича Ҳиндистон ва Покистон бевосита музокараларни бошлашлари зарурлигини баён қилди.

Ташриф якунида Рамсфелд Покистон Президенти Парвез Мушарраф билан сўзлашувлар олиб борди. АҚШ Мудофаа вазири террорчиликка қарши Покистон раҳбарияти ҳаракатларини ижобий баҳолади. Рамсфелдга кўра, Президент Парвез Мушарраф террорчи-экстремистларнинг Ҳиндистонга ўтишининг олдини олиш бўйича кескин чораларни ваъда қилган. Унгача эса АҚШ мудофаа вазири Қашмир масаласини Ҳинд раҳбарияти билан муҳокама этди. Рамсфелд таклиф этган тинчлик режасига мувофиқ томонлар чегара ҳудудларида артиллерия отишмаларини тўхтатиш бўйича мажбурият олганлар. Шунга қарамай Қашмир минтақасида вазият қалтислигича қолмоқда. Бугун у ерда яна артиллерия отишмалари кузатилган. Отишмалар давомида тўрт кишининг нобуд бўлгани айтилмоқда.

Бирлашган Миллатлар Ташкилоти Бош котиби Кофи Аннан Ҳамид Карзайнинг Афғонистон муваққат ҳукуматига қайтадан раҳбар этиб сайланганини олқишлади.

Аннан ушбу воқеани "Афғонистонда тинчлик ва барқарорлик йўлида ташланган муҳим қадам" - дея эътироф этди. Афғон қавмлари оқсоқоллар кенгаши Лўя Жирга мажлисида кўпчилик овоз билан раҳбарликка қайтадан сайланган Ҳамид Карзай ўз халқи тинчлик-фаровонлиги, тотувлигини таъминлашда бор имкониятини сафарбар қилишини баён қилди.
"Мен бир Оллоҳнинг ожиз бандаси сифатида ўз халқим тинчлиги, мустақиллиги ва фаровон ҳаёти йўлида қўлимдан келганича, бор кучимни аямайман. Жафокаш Афғон халқига хизмат қилишга тайёрман", - деб таъкидлади Ҳамид Карзай.
Эндиликда Лўя Жирга депутатлари олдида мураккаб вазифа турибди. Улар янги ҳукумат аъзоларини сайлашлари керак. Бу борада айрим этник гуруҳлар ўртасида келишмовчиликлар ҳали ҳам сақланиб қолаётгани айтилмоқда. БМТ режасига мувофиқ, икки йилдан сўнг Афғонистонда умумхалқ демократик сайловлари бўлиб ўтиши режалаштирилган.

Исроил қайтадан Фаластин вакиллари билан мулоқотни йўлга қўйиш ниятида.

Бу ҳақда бугун исроил ташқи ишлар вазири Шимон Перес баён қилди. Пересга кўра, бўлажак музокаралар превентив характерга эга. Бироқ, ҳозирча бу борада батафсил маълумотлар айтилмаяпти. Кеча Фаластин янги маъмурияти қасамёдга келтирилган эди. Халқаро ҳамжамият кучли босими остида Ясир Арафат ўз маъмуриятини ислоҳ этишга мажбур бўлди. Вазирлар сони учдан иккига қисқартирилди. Фаластин хавфсизлик кучларини мувофиқлаштириб бориш учун ички ишлар вазири лавозими жорий этилди. Илгари ушбу вазифани Арафатнинг ўзи бажариб келган эди. Шунга қарамай Иордан дарёси ғарбий соҳилида Исроил харбийлари террорчиларга қарши рейдларни давом этирмоқда. Бугун Хеврон яқинида террорчиликда гумон этилиб уч фаластинлик хибсга олинган.

Ўзбекистон таркибига беш собиқ Совет республикаси кирувчи ГУУАМ ташкилотидан чиқиш ниятида.

Бу ҳақда Ўзбекистон ташқи ишлар вазири ўринбосари Содиқ Сафоев маълум қилди. Сафоевга кўра ГУУАМга аъзо давлатлар –Грузия, Украина, Озарбайжон ва Молдова элчихоналарига бу ҳақда огоҳлантирув нотаси юборилган. Аъзо давлатлар ўртасида Россия таъсиридан ташқарида сиёсий, иқтисодий ва стратегик ҳамкорлик алоқаларини кучайтиришга йўналтирилган ГУУАМ ташкилоти 1997 йилда ташкил топган эди. Ўзбекистон эса мазкур ташкилотга 1999 йилда қўшилди. Ўзбекистон ташқи ишлар вазирлиги нотасида, ташкилот ўз олдига қўйган мақсад ва вазифаларнинг бажарилишидан қониқиш ҳосил қилмагани боис, Ўзбекистон ундан чиқажаги айтилади.

Бугун Қирғизистон жанубида яна намойишлар бўлиб ўтди.

Юзлаб намойишчилар депутат Азимбек Бекназаровга қўйилаётган айбловлар бекор этилишини талаб этиб чиқишган. Қирғизистон ички ишлар вазирлиги матбуот вакили Жолдасбек Бузманкуловга кўра, норозилик намойишларида 700га яқин киши иштирок этган. Ўтган ой Бекназаров ўз хизмат лавозимини суиистеъмол қилганликда айбланиб, унга нисбатан шартли 1 йил қамоқ жазоси белгиланган эди. Келгуси хафтада Қирғиз маҳкамаси унинг ишини қайтадан кўриб чиқиши керак.

Бугун Қирғизистоннинг Чўлпон ота шаҳрида Мустақил Давлатлар Ҳамдўстлигига аъзо мамлакатлар мудофаа вазирлари минтақавий хавфсизлик ҳамда ўзаро ҳарбий ҳамкорлик масалаларини муҳокама этдилар.

Россия мудофаа вазири Сергей Иванов раислигида ўтаётган мазкур йиғин кун тартибидан шунингдек, Грузия-Абхазия минтақасида тинчлик ўрнатиш борасида Ҳамдўстлик давлатлари иштирокини кучайтириш масаласи ҳам ўрин олди. Учрашув якунида МДҲ мудофаа идоралари раҳбарлари коллектив тезкор кучлар харбий машқларини кузатадилар. Шунингдек, уларнинг Қирғизистон президенти Аскар Акаев билан учрашуви ҳам режалаштирилган.

Япония ва Корея ўйингоҳларида футбол бўйича жаҳон чемпионати давом этмоқда.

Бугун чемпионатнинг навбатдаги даврасига йўлланма олган янги командалар аниқланди. Жанубий Корея Португалия терма командаси устидан 1:0 ҳисобида ғалаба қозониб, чемпионатнинг навбатдаги босқичига йўлланма олди. АҚШ футболчилари эса Польша терма жамоасига 0:1 ҳисобида ютқазиб бўлса ҳам, ўйинларни давом эттирадиган бўлди. Ундан олдин эса Япония Тунис футболчилари устидан 2:0 ҳисобида ғолибликни қўлга киритган бўлса, Бельгия терма командаси Россияликларни 3:2 ҳисобида мағлубиятга учратди. Шундай қилиб, мезбон давлат жамоалари билан бир қаторда АҚШ ва Бельгия ҳам давбатдаги бочқичга йўлланма олдилар. Тунис, Польша, Португалия ва Россия терма командлари чемпионатни тарк этадиган бўлди. Ушбу воқеалардан сўнг Олег Романцев бошлиқ Россия жамоаси мураббийлар гуруҳи истэъфо берди.

ТОШКЕНТДА НАТО ИЛМИЙ ҚЎМИТАСИНИНГ КЎЧМА МАЖЛИСИ ВА СЕМИНАРИ ЎЗ ИШИНИ БОШЛАДИ

НАТО илмий қўмитаси барча Марказий Осиё республикалари билан мавжуд илмий-техникавий ҳамкорликни янада ривожлантиришга интилмоқда.
13 июнь куни Тошкентда НАТО илмий қўмитаси бошлаган семинарда минтақанинг илмий-техникавий муаммоларини ечиш йўллари кўриб чиқилди. Семинар 14 июнда ҳам ўз ишини давом эттиради.

ЗАМБУРУҒЛИ КАСАЛЛИКЛАР КЎПАЙМОҚДА

Ўзбекистон тери-таносил касалликлари илмий-текшириш институти мутахассиси Акром Баратов йил сайин республика аҳолиси орасида замбуруғли касалликлар кўпайиб бораëтганини қайд этди.
Баратовнинг айтишича, Ўзбекистон аҳолисининг қарийб 35% замбуруғли касалликларга чалинган. Маълум бўлишича, Навоий, Бухоро ва Самарқанд вилоятлари ҳамда Қорақалпоғистон республикаси аҳолиси орасида замбуруғли касалликлар айниқса кўп учрайди.
Юқоридаги маълумотлар Ўзбекистон соғлиқни сақлаш вазирлигининг замбуруғли касалликларга оид ўтказган матбуот йиғинида айтиб ўтилди.

МУХОЛИФАТ ПРЕЗИДЕНТ ИСЛОМ КАРИМОВ БИЛАН УЧРАШМОҚЧИ

Ўзбекистондаги ноҳукумат ташкилот вакиллари, мустақил инсон ҳуқуқлари ҳимоячилари ва мухолифат аъзолари президент Ислом Каримов билан учрашиш истагини билдирмоқда.
«Шахс ҳуқуқларини ҳимоя қилиш» ташкилоти раиси муовини Абдуқодир Назаровнинг Озодлик радиосига айтганларига кўра, бу ташаббусни улар Янгийўл шаҳрида бўлиб ўтган семинар давомида илгари суришган. "Мухолифат қуруқ гап-сўздан ташқари амалий иш қилмоқчи",- дейди Абдуқодир Назаров.
Унинг айтишича, конструктив мухолифат, ноҳукумат ташкилотлар ва инсон ҳуқуқлари ҳимоячилари Ўзбекистон ижтимоий-сиёсий ҳаётида фаол иштирок этиш йўлларини қидиряпти.

Жанубий Корея ва Япония давлатларида футбол бўйича жаҳон чемпионати ўйинлари давом этмоқда.

Бугун Туркия ва Бразилия терма жамоалари чемпионат мусобақаларининг иккинчи даврасига йўлланма олишди. Туркиялик футболчилар Хитойликларни 3-0 хисобида, Бразилиялик футболчилар эса Коста Рикалик рақибларини 5-2 хисобида мағлубиятга учратишди. Натижада Хитой ва Коста Рика терма жамоалари турнирдан чиқиб кетишди.

Бугун 30 йил олдин тузилган баллистик ракеталарга қарши шартноманинг муддати расман тугади.

АҚШ аллақачон янги ракета мудофаа тизими устида иш бошлади. Ўтган декабр ойида АҚШ президенти Жорж Буш мамлакати шартномадан чиқишини расман эълон қилди. Бушнинг айтишига қараганда, 1972 йил май ойида АҚШ президенти Ричард Никсон ва Совет Иттифоқи раҳбари Леонид Брежнев томонидан имзоланган мазкур шартнома совуқ уруш даврининг қолдиғи бўлгани боис ўзининг стратегик аҳмиятини йўқотган. Бугун Россия ташқи ишлар вазири Игорь Ивановнинг айтишига кўра, Россия шартнома кучдан чиққанига афсусланади, аммо бунинг натижасида юзага чиқадиган салбий оқибатларни камайтириш устида ишлайди. Шанба куни АҚШнинг Аляска штатида янги ракета мудофаа тизими учун синов майдонини қуриш ишлари бошланди.

Бугун Римда БМТ озиқ-овқат саммити якунланди.

Делегатлар аъзо давлатларнинг жаҳон бўйлаб очликдан азият чекаëтган одамлар сонини ярмига қисқатириш хақдаги мақсадини тасдиқладилар, аммо бу мақсадга қандай эришиш борасида келишолмадилар. БМТ маълумотларига кўра, бугун жаҳон бўйлаб 800 миллиондан ошиқ одам, шу жумладан, болалар ҳам очликдан азият чекишмоқда. Ҳар куни таҳминан 24 минг одам очликдан қурбон бўлмоқда. Учрашувга мезбонлик қилган Италия бош вазири Силвио Берлускони саммит фойдали бўлганини айтди ва аксари Ғарб лидерларининг учрашувга қатнашмагани – саммит аҳамиятини камайтирди, деган танқидларни рад этди. Жаҳон бўйлаб ривожланаëтган деярли барча 74 мамлакатнинг давлат ëки ҳукумат бошлиқлари саммитда иштирок этишди. 4 кунлик саммит давомида камбағал давлатларнинг делегатлари бой давлатлар бозорларига кириш осонлаштирилишига чақирдилар.

Россия хавфсизлик котиби Владимир Рушайлонинг айтишига қараганда, Мустақил давлатлар ҳамдўстлигига аъзо давлатлар келаси бир неча йил ичида террорга қарши янги бир дастур ишлаб чиқишлари керак.

Бугун Бишкекда нутқ сўзлаган Рушайло, дастур ҳар қачонгидан ҳам пухта бўлиши, аммо шунинг билан бирга халқаро қонунларга жавоб бериши зарурлигини таъкидлади. Унинг айтишича, коллектив тезкор кучларнинг амалиëтларида самарадорликни оширишга эҳтиëж сезилмоқда. Бугун Бишкекда Россия мудофаа вазири Сергеи Иванов расмий Москва ўзининг Қирғизистондаги ҳарбий базаларини яна камида 7 йилдан 15 йилгача сақлаб туришни режалаëтганини маълум қилди. Ҳозир Россия қуролли кучлари ва федерал чегара ҳизматининг Қирғизистонда 4 та ҳарбий базаси бор. Иванов ва Қирғизистон мудофаа вазири Эсен Топоев Россиянинг Қирғизистондаги базалари тўғрисида бир шартнома имзоладилар.

Бугун Тошкентда НАТОнинг илмий-техникавий қўмитаси 2 кунлик учрашув ўтказишни бошлади.

Учрашувда минтақавий энергетика, табиатни муҳофаза этиш ва сув таъминоти каби масалалар муҳокама этилмоқда. Ўзбекистон расмийларининг айтишларича, кеча НАТО бош котибининг илмий-техникавий ва экология ишлари бўйича ëрдамчиси Жан Фурнет Ўзбекистон ташқи ишлар вазири Абдулазиз Комилов билан учрашган.

Бугун Афғонистон Лўя Жирга олий кенгаши делегатлари муваққат ҳукумат раҳбари Хамид Карзайни мамлакатнинг янги давлат бошлиқлигига номзод этиб кўрсатдилар.

Шундан кейин олий кенгашнинг 1.500 делегати олдида чиқиш қилган Карзай, мамлакатга хавфсизлик ва тинчлик, шунингдек, бутун Афғонистонни назорат эта оладиган бир ҳукумат кераклигини айтди. Унинг таъкидлашича, бутун Афғонистон ҳалқи таълим олиш имкониятига эга бўлиши ва етарлича озиқ-овқат билан таъминланиши зарур. Карзайнинг ўтиш давридаги 18 ойлик ҳукуматга етакчилик қилиши кутилмоқда.

Кеча Ҳиндистонда “Ал-Қаида” жангарилари Кашмирнинг Покистон назоратидаги ҳудудларида фаолият кўрсатаëтган бўлиши мумкинлигини айтган АҚШ мудофаа вазири Доналд Рамсфелд бугун расмий Исломободни мазкур террор тармоғига қарши курашда ҳамкорлик қилаëтгани учун мақтади.

Рамсфелднинг Исломободда Покистон ташқи ишлар вазири Абдул Саттор билан музокаралар олиб борганидан кейин айтишига кўра, Покистон ҳукумати “Ал-Қаида” жангариларини Кашмирнинг Ҳиндистон қисмига киришини қўллагани тўғрисида далиллар йўқ.

“Менда, АҚШда “Ал-Қаида” жангарилари Кашмирда фаолият кўрсатаëтгани хақда далиллар йўқ. Разведка манбалари Кашмирда ëки турли жойларда “Ал-Қаида” жангарилари борлигига ишонишмоқда, фақат бу маълумотлар тахминий ва тасдиқланмади”, - деди Рамсфелд. У Исломобод ҳукумати Покистон ичида “Ал-Қаида”нинг ҳар қандай аъзосига қарши чора-тадбирлар кўришига ишонишини айтди. Бугун Рамсфелд Кашмир можаросида Ҳиндистон билан бўлган кескинликни юмшатиш мақсадида Покистон президенти Парвез Мушарраф билан учрашади.

ЎЗБЕКИСТОН-АРМАНИСТОН ЎРТАСИДА ҚЎШМА КОМИССИЯ ТУЗИЛДИ

Арманистон ташқи ишлар вазири Вартан Оскаряннинг Тошкентга ташрифи натижаси ўлароқ Ўзбекистон-Арманистон орасида қўшма комиссия тузилди. Мазкур комиссия икки мамлакат ўртасида савдо-иқтисодий алоқаларни ривожлантириш билан шуғулланади.

ЯККА ТАРТИБДА САВДО ҚИЛУВЧИЛАР НОРОЗИ

2002 йил 6 июн куни эълон қилинган Ўзбекистон Республикаси Вазирлар Маҳкамасининг «Жисмоний шахслар томонидан Ўзбекистон Республикаси ҳудудига товарлар олиб келинишини тартибга солиш тўғрисида»ги қарорнинг жорий этилиши индивидуал савдогарлар норозилиги туфайли 1 июлга қадар қолдирилди. Маълум бўлишича, қарорнинг айрим бандларида индивидуал тарзда савдогарлик билан шуғулланувчи тадбиркорлар ҳуқуқи хисобга олинмаган. Шу сабаб 2002 йил 7 июнь куни «Отчопар» бозорида савдо қилувчи савдогарлар Тошкент шаҳар Давлат солиқ инспекцияси биноси олдида йиғилишган. Воқеа жойига Ўзбекистон давлат солиқ қўмитаси раиси ўринбосари Эркин Гадоев ҳамда молия вазири ўринбосари жаноб Жўраев етиб келишган. Аммо улар билдирилган эътирозларга жавоб бера олишмаган.
Маълум бўлишича, қарорда Давлат солиқ қумитаси Назорат-тафтиш бош бошқармаси ва Республика прокуратураси ҳузуридаги Солиққа оид жиноятларга қарши курашиш департаменти мансабдорларига «импорт қилувчи жисмоний шахсларда тижорат фаолияти учун мўлжалланган товарларнинг Ўзбекистон Республикаси ҳудудига олиб келинишини тасдиқловчи ҳужжатлар мавжудлигини режадан ташқари текшириш ҳуқуқи» берилган бўлиб, айни ҳужжат кўрсатилмаса тадбиркорнинг товари мусодара этилиши айтилган. «Отчопар» бозорининг милиция ходимлари қарорнинг мазкур бандини баҳона қилган ҳолда савдогарлардан ўтган йили олиб келинган товарлар учун ҳужжат кўрсатишни талаб қилишган. Ҳужжат кўрсатилмагач, милиция ходимлари савдогарларнинг товарларини мусодара қила бошлаган.
Республика солиқ қўмитаси вакилига кўра, «Отчопар» бозори яқиндан бери милиция ходимлари тасарруфига ўтган бўлиб, солиқ тўловлари ҳамда махсус ҳужжатларни текшириш ишлари уларга юклатилган.
Республика солиқ қўмитаси ходимларининг Озодлик радиосига хабар беришларича, айни пайтда қарорга тузатиш киритиш устида ишлар олиб бориляпти.

«КЎКТУРКЛАРНИНГ ЎЛИМИ» РОМАНИ ИЛК БОР ЎЗБЕК ТИЛИДА НАШР ЭТИЛДИ

Туркчилик ғоясини ўз асарида мадҳ этган ХХ аср машҳур турк ёзувчиси Ҳусайн Ниҳол Отсизнинг «Кўктуркларнинг ўлими» романи илк бор ўзбек тилида нашр этилди. Ушбу асарни турк тилидан ўзбекчага таниқли ўзбек шоири Тохир Қаҳҳор ўгирган.
«Кўктуркларнинг ўлими» романида қадимги туркий хақонликнинг Чин мамлакатига қарам бўлиб қолиши акс этган.
Тохир Қаҳҳорнинг эътирофича, «Кўктуркларнинг ўлими» романи ўзбек ўқувчилари учун хануз ғира-шира бўлиб турган қадимги турклар даврини бир қадар ёритади.

Москва тарафдори бўлган Чеченистон маъмуриятидаги расмий киши, ўтган 24 соат ичида Россиянинг камида етти аскари ўлдирилганини маълум қилди.

Ўз исмини айтмасликни сўраган расмий киши Ассосиэйтед Пресс ахборот агентлигига, бир милиция ходими номаълум шаҳс томонидан ўлдирилгани ҳамда бошқа бир милиция ходимининг жасади топилганини билдирди.
Россия ҳаво кучлари Ножай Юрт туманида партизанларга тегишли эканида гумон қилинган жойларни бомбардимон қилди. Шунингдек Россия аскарлари тозалаш операциялари давомида партизан ёки уларга хайриҳоҳ эканида гумон қилинган 60 кишини қўлга олди.

Давомини ўқинг

XS
SM
MD
LG