Бош прокуратура гумонланувчилар сонига оид рақамларни келтирди
Ўзбекистон Бош прокуратураси ҳозиргача аниқлик киритилмаган асосий саволлардан бири - гумонланувчи сифатида қўлга олинганлар сони ва уларнинг жорий ҳолатига оид масала юзасидан қўйидагиларни маълум қилди:
— Қорақалпоғистонда 1—2 июль кунлари оммавий тартибсизликлар содир этилгани ҳолати юзасидан қўзғатилган жиноят иши бўйича жами 171 нафар шахс айбланувчи тариқасида иштирок этишга жалб қилинган.
Оммавий тартибсизликлар юзасидан дастлаб 516 нафар шахс ушланган бўлиб, шундан 5 нафарига нисбатан уй қамоғи ҳамда 166 нафарига нисбатан Жиноят кодексида кўзда тутилган жиноятлари учун қамоққа олиш тарзидаги эҳтиёт чоралари қўлланган, қолган ҳуқуқбузарларга нисбатан эса суд томонидан маъмурий жавобгарлик доирасида қамоқ жазоси тайинланган.
Қорақалпоғистонда 2022 йил июль ойида юз берган ҳолатлар ва воқеаларни ўрганиш бўйича мустақил комиссиянинг, кенг жамоатчиликнинг сўрови ва кафиллиги ҳамда депутатлик корпусининг жамоатчилик назоратига олишга рухсат бериш юзасидан киритган илтимосномалари инобатга олиниб, қамоққа олинган 107 нафар айбланувчига нисбатан қўлланган эҳтиёт чоралари ўзгартирилиб, уларнинг 10 нафарига уй қамоғи ва 97 нафарига жамоа кафиллиги эҳтиёт чоралари қўлланган ва қамоқдан озод қилинган.
Шунингдек, кейинги тергов давомида уй қамоғида сақланаётган 14 нафар айбланувчига нисбатан ҳам эҳтиёт чораси жамоа кафиллигига ўзгартирилган. Айни вақтда жиноят ишининг 22 нафар шахсга оид бўлган қисми (20 нафарига қамоқ, 1 нафарига жамоа кафиллиги ва 1 нафар уй қамоғи қўлланган) айблов хулосаси билан тамомланиб, судга юборилган, қолган айбланувчилар ва бошқа ҳолатлар юзасидан жиноят иши алоҳида иш юритувга ажратилган.
Ҳозирда алоҳида иш юритувга ажратилган жиноят иши юзасидан тергов ҳаракатлари якунланмоқда, иш бўйича 39 нафар айбланувчи қамоқда сақланмоқда.
Бош прокуратура вазиятга ойдинлик киритди
Қорақалпоғистон Республикасида юз берган ҳолат ва воқеаларни ўрганиш бўйича комиссия жамоатчиликни қизиқтираётган масалалар юзасидан Бош прокуратурага киритган сўровига жавоб олди.
Суд-тергов жараёнлари иштирокчиларига оид якуний маълумотлар ва тартибсизликлар вақтида ҳуқуқни ҳимоя қилувчи идоралар томонидан ортиқча куч-восита ишлатилган ёки ишлатилмаганлиги ҳамда инсон ҳуқуқларининг бузилиши билан боғлиқ ҳолатлар очиқланди.
Шу ва бошка сўров натижалари билан мазкур ҳужжат орқали танишишингиз мумкин.
Нукус воқеалари бўйича суд жараёнини трансляция қилиш вақтинча тўхтатилди
Нукусда 1−2 июль кунлари содир этилган тартибсизликларда айбланаётганларга нисбатан Бухорода ўтаётган суд жараёнини жонли эфирда трансляция қилиш 5 декабрдан бошлаб вақтинча тўхтатилади.
«Газета.uz»нинг хабар беришича, бу судда гувоҳларнинг кўрсатма бериши билан боғлиқ. Ўзбекистон Жиноят-процессуал кодексининг 432-моддасига мувофиқ гувоҳлар бошқа гувоҳларнинг кўрсатмаларини эшитмаслиги ва мулоқот қилмаслиги лозим.
2 декабрда ўтган суд мажлисида прокурор Жиноят-процессуал кодексининг 432-моддаси талабларидан келиб чиққан ҳолда судья Елубай Абибуллаевдан жараённи трансляция қилишни то томонлар мунозараси бошлангунига қадар тўхтатиб туришни сўраган эди. Судья прокурорнинг бу талабини қаноатлантирган.
Бухоро вилоят судида шу йил июлида Қорақалпоғистондаги намойиш ва зўравонликларга алоқадорликда айбланаётган 22 киши устидан суд 28 ноябрда бошланган эди.
Даулетмурат Тажимуратов ва бошқалар ЖКнинг 10 га яқин моддаси, жумладан, оммавий тартибсизликлар ва конституциявий тузумга тажовузда айбланмоқда.
ЕИ Нукус воқеалари бўйича маҳкама жараёнини диққат билан кузатмоқда
Европа Иттифоқи Қорақалпоғистонда июль ойи бошида юз берган фожиали воқеалар билан боғлиқ ҳаракатларда айбланаётган 22 нафар шахс устидан Бухоро шаҳрида ўтказилаётган суд жараёнини диққат билан кузатиб боряпти. Бу ҳақда ЕИнинг Ўзбекистондаги делегацияси хабарномасида айтилган.
Ўзбекистон ҳукуматига жараённи жамоатчилик, шу жумладан, оммавий ахборот воситалари учун очиқ ва шаффофлигини ҳамда бевосита тўғридан-тўғри трансляцияни таъминлагани учун миннатдорчилик билдирган ЕИ вакиллари маҳкаманинг адолатли ва холис бўлишига умид билдиришларини қайд этишган.
“Биз ҳукумат фикрни эркин изҳор қилиш ва йиғилишлар эркинлиги бўйича, шу жумладан, GSP+ доирасидаги ўзининг мажбуриятларини бажаришга чақирамиз. Шунингдек, биз Қорақалпоғистондаги воқеалар бўйича тергов комиссиясининг ишлари натижасини яқин кунларда олишни сабрсизлик билан кутмоқдамиз ва ушбу натижалар жамоатчиликка эълон қилинишига умид қиламиз”, дейилган хабарномада.
Форум