Линклар

Шошилинч хабар
29 март 2024, Тошкент вақти: 11:13

Украина ЕИга аъзоликка номзод мақомини қўлга киритди. Уруш хроникаси

Урушнинг 120-куни

Украинанинг Северодонецк шаҳрида жойлашган “Азот” заводидаги бомбапаноҳда 568 киши жон сақлаяпти, улар орасида 38 нафар ёш бола бор.

Украинанинг “Жануб” оператив қўмондонлиги Қора денгиздаги Змеиний оролига зарба берилганини билдирди. Айтилишича, “зарбалар Панцир С-1 зенит-ракета комплекси, радиолокация станцияси ва автомобиль техникасига теккан”.

АҚШда Украинадаги ҳарбий жиноятларни тергов қилиш учун махсус гуруҳ тузилади.

Ростов вилоятидаги Новошахтинск нефтни қайта ишлаш заводига учқичсиз дрондан зарба берилди.

Россия Давлат Думаси асир олинган “Азов” жангчиларини алмашмасликни таклиф қилди


“Нацист жиноятчилар асир сифатида алмашилмаслиги керак. Бу ҳарбий жиноятчилар, биз улар суд қаршисида туриши учун зарур барча ишни қилишимиз лозим”, деди Давлат Думаси раиси Вячеслав Володин.


Володин депутат Вассерманнинг “одамларни ўлдиришда бевосита иштирок этганлардан тортиб, баданига татуировкалар чиздирганларгача” – барча “миллатчилар”нинг асир сифатида алмашилишини тақиқловчи “қарор ёки, керак бўлса қонун” қабул қилиш таклифига жавобан шундай деди ва Вассерманга “протокол бўйича тегишли ҳужжат” тайёрлашни топширди.


Украина армияси Бош штаби Мариуполдаги “Азовсталь” заводидан “ДХР” назоратидаги ҳудудга 254 киши (Россия маълумотида – 265 киши) олиб кетилганини ва улар кейинроқ “асир алмашиш тартиб-таомили бўйича” қайтарилишини эълон қилганди. Россия Мудофаа вазирлиги “азовчилар”ни алмашиш ҳақида ҳеч нима демади, Кремль ҳам бу масалада изоҳ берганича йўқ.

Путин Россиянинг Украинадаги “махсус ҳарбий амалиёти”дан мақсад Украинани “нацистлар”дан тозалаш ва “геноцид”ни тўхтатиш эканини иддао қилган. Аммо Россия бу борада БМТ ва бошқа халқаро тузилмаларга биронта далил тақдим этмаган. Геноцид бўйича халқаро экспертлар Россиянинг Украинада геноцид содир этилаётгани ҳақидаги иддаоларини асоссиз дея рад этишади. Халқаро қонунчиликка мувофиқ геноцид бўйича иддаолар фақат халқаро ҳамжамиятга қатъий далиллар тақдим этилган тақдирдагина легитим ҳисобланади.

Россия Мудофаа вазирлиги Мариуполдан олиб чиқилган украин ҳарбийлари ҳақида: “Улар асирга тушяпти”


Украина қўмондонлиги Мариуполдаги “Азовсталь” комбинати ҳудудида қолган аскарларининг олиб чиқиб кетилишини эвакуация ва гуманитар амалиёт деб атамоқда. Украин ҳарбийлари “ДХР” бўлгинчилари назоратидаги ҳудудга жўнатиляпти.


Россия Мудофаа вазирлиги сайтидаги хабарда эса вазият қуйидагича талқин қилинган: “Мариуполнинг “Азовсталь” заводида қуршовда қолган “Азов” миллатчи бўлинмаси жангарилари ҳамда украин ҳарбий хизматчилари асирга тушишни бошлади.

Ўтган сутка мобайнида 356 жангари қуролини ташлаб, асирга тушди, улардан 51 нафари оғир ярадор. Тиббий ёрдамга муҳтож барча асирлар Донецк Халқ Республикасининг Новоазовск шаҳридаги касалхонага даволанишга жўнатилди”.

Эрдўғон: Туркия Финляндия ва Швециянинг НАТОга киришига рози эмас


Туркия президенти Ражаб Тоййиб Эрдўғонга кўра, Швеция ва Финляндия НАТОга кириш учун берган аризаларини маъқуллашга уни кўндириш учун ўз делегацияларини Анқарага йўллашига ҳожат йўқ. Эрдўғон 16 майдаги матбуот анжуманида Туркия Финляндия ва Швециянинг Шимолий Атлантика иттифоқига аъзо бўлишига “ҳа” дея олмаслигини айтди.


“Иккала мамлакатнинг ҳам террорчи ташкилотларига нисбатан аниқ бир позицияси йўқ. Швеция бу террорчи ташкилотларни урчитадиган марказга айланиб қолган. Улар террорчиларни парламентга олиб келишади, уларга минбар беришади, махсус таклифномалар жўнатишади”, деди Туркия президенти.


Анқара Швеция ва Финляндия Курдистон ишчи партияси (КИП) жангариларига алоқадор одамларга ҳамда Фатҳуллоҳ Гулен издошларига бошпана бераётганини иддао қилади. Туркия КИПни ва Гулен ташкилотини террористик ташкилотлар деб ҳисоблайди.


НАТОга кириш учун альянснинг барча аъзоларидан розилик олиш талаб этилади.

АҚШ молия вазири: Россияга қарши санкциялар II жаҳон урушидаги санкциялар билан ўхшаш

Жаннет Йеллен
Жаннет Йеллен

АҚШ молия вазири Жаннет Йеллен 16 май куни ғарб давлатлари томонидан Россия Марказий банки активларининг музлатилиши билан Гитлер Германияси томонидан оккупация қилинган мамлакатларга қарши акцияларни қиёслаган. Бу ҳақда Reuters ахборот агентлиги хабар қилди.

Душанба куни Варшавадаги Польшалик яҳудийлар тарихи музейида чиқиш қиларкан, мулозима 1940 йили ўша пайтдаги АҚШ президенти Франклин Рузвельт Норвегия ва Даниянинг Қўшма Штатлар молиявий муассасаларида бўлган активларини ҳибс этиш қарорини олганини эслатди. Бу чора истило қилинган мамлакатларнинг хорижий банкларда бўлган сарвати Германия томонидан ишлатилишига имкон бермаслик мақсадида қабул қилинган.

Йелленга кўра, ўша давр сабоқлари Россияга қарши туриш стратегиясини ишлаб чиқишда фойда берган. “Биз мустабидликка қарши туриш учун тасарруфимизда бўлган барча воситаларни ишга солишимиз лозим. Бу бугунги кунда ҳам долзарб бўлган сабоқдир… Биз Россияни жавобгарликка тортиш ва украиналикларни имкон қадар дастаклаш қатъиятида собитмиз”, дея урғулаган Йеллен.

Россия қўшинлари Украина ҳудудига бостириб кирганидан кейин АҚШ ва Европа Иттифоқи Россия Банки активларини музлатиб, Россия ҳукуматига қарашли олтин-валюта захираларининг қарийб учдан икки қисмини олиш имкониятини тўсиб қўйган. Россияга қарши бу ва бошқа молиявий санкциялардан мақсад уни Украинада уруш олиб бориш воситаларидан маҳрум қилишдан иборат бўлган. Молиявий-иқтисодий санкциялар, шу жумладан, Владимир Путин дохил унинг атрофидаги одамлар ҳамда ҳукуматга яқин миллиардерларга қарши санкциялар кўлами муттасил равишда кенгайиб бормоқда.

Давомини ўқинг

XS
SM
MD
LG