Линклар

Шошилинч хабар
05 апрел 2020, Тошкент вақти: 14:05

Ўзбекистон хабарлари

Шоир Охунжон Ҳакимов вафот этди

Охунжон Ҳакимов.

Ўзбекистон халқ шоири Охунжон Ҳакимов узоқ давом этган хасталикдан сўнг 26 март куни 86 ёшида оламдан ўтди, дея хабар қилади Газета.уз.

1934 йил 20 февралида Фарғона вилоятининг Лоғон қишлоғида дунёга келган Охунжон Ҳакимов ўрта мактабдан сўнг Фарғона Давлат педагогика институтини тамомлаган. Вилоят ва республика марказий газеталарида, “Меҳнат ва турмуш” журналида фаолият кўрсатган.

Ҳаёти давомида 20 дан зиёд шеърий тўплами ва қатор қиссаларини нашр эттирган.

Охунжон Ҳакимовни ўзбекистонлик шеърият мухлислари қўшиқчи шоир сифатида ҳам яхши танишади.

О. Ҳакимовга 2006 йили Ўзбекистон халқ шоири унвони берилган.

Кун янгиликлари

Тошкентда коронавирусдан даволанаётган 22 беморда пневмония белгилари кузатилмоқда

Санитария-эпидемиология назорати давлат инспекцияси бошлиғи Нурмат Атабеков

5 апрель куни АОКА штабида Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков иштирокида брифинг уюштирилди.

Нурмат Отабековга кўра, стационар ва уй шароитида 100 мингдан кўпроқ одам тиббий кузатув остида турибди.

- Вирусология илмий-текшириш институти раҳбарияти берган маълумотга кўра, ушбу институт клиникасида даволанаётган 85 беморнинг 22 нафарида пневмония белгилари кузатиляпти.​ 4 нафарининг аҳволи оғир, 1 нафарининг эса аҳволи нисбатан оғир, деб баҳоланмоқда.

Эпидемиология-микробиология ва юқумли касалликлар илмий текшириш институти клиникасида даволанаётган 35 бемордан 1 нафарининг аҳволи ўртача оғирликда, 1 нафарининг аҳволи ўта оғир, деб баҳоланяпти. Аҳволи оғир ва ўта оғир, деб баҳоланган беморлар интенсив-терапия муолажаларига ўтказилган, - деди Отабеков.

Бош санитар инспектор 5 апрель кунги брифингда аҳолидан коронавируснинг тарқалиши, даволаниши ва карантин қоидаларига оид саволларга жавоб берди.

Хусусан: "Ҳаво ҳарорати 40 даража иссиқ бўлганда коронавирус атмосфера ҳавосида нобуд бўлиши ростми?" деган саволга инспектор шундай жавоб берди:

- Афсуски, йўқ. Сингапур университетининг medRxiv порталидаги маълумотларга кўра, вируснинг сезувчанлик хусусияти аниқ белгиланган, яъни у цельсий шкаласи бўйича 70 даражага тенглаштирилган. Таъкидлаш лозимки, коронавируснинг турли юзаларда яшвчанлиги турлича: масалан, қоғозда 3 соат, кийимда 2 кун, шиша юзасида 4 кун, пластикда 7 кун сақланиб қолади. Шунинг учун ҳам дезинфекция қилиш ўта муҳим, деди Отабеков.

У ўзбекистонликларни уйда қолишга чақирди:

- Қачонки, касаллик бир одамдан иккинчи одамга юқишига йўл қўймасак, эпидемик вазиятни жиловлай оламиз. Акс ҳолда, вазият мураккаблашиб кетиши мумкин, - деб огоҳлантирди бош санитар инспектор.

Қуйида Отабеков билан брифингни тўлиқ томоша қилишингиз мумкин:

Марказий банк мулозими мижозларни тўловларни масофадан туриб амалга оширишга чақирди 

Ўзбекистон Марказий банки расмийси коронавирус карантинига қарамай, одамлар ҳалигача коммунал тўловларни тўлаш учун банк кассаларига бораётгани, бу билан ўзлари ва бошқаларни ҳатарга қўяётганини айтди.

4 апрель куни Тошкентда ўтказилган матбуот брифингида банк бошқарма бошлиғи Ҳусанхўжа Обидов мижозларни тўловларни масофадан туриб амалга оширишга чақирди.

"Барча базавий банк хизматларини онлайн равишда, яъни уйдан турган ҳолда амалга ошириш имконияти мавжуд. Бу билан барчага коммунал ва солиқ тўловлари, пул ўтказмалари, микроқарзларни расмийлаштириш, омонат операциялари каби муҳим банк хизматларини қулай ва тезкор тарзда амалга ошириш имконияти яратилган. Бу борада барча мижозларга ўз банкларининг мобил иловалари билан яқиндан танишиб чиқишни тавсия қилган бўлардим, - деди Обидов.

Банк мулозими мижозлар уйдан туриб мобиль телефонлари ёрдамида халқаро пул ўтказмаларини ҳам амалга ошириш имкониятига эгалигини айтди.

"Масалан, фуқароларимизга хориждан яқинлари пул юборган бўлса, ушбу пулни банкларнинг мобил иловалари орқали тўғридан-тўғри пластик карталарига ўтказиб олишлари ҳам мумкин", - деди Обидов.

Ўзбекистон Марказий банки мулозими мамлакатда банклар ёпилиши ва номаълум муддатга фаолиятини тўхтатиши ҳақидаги гап-сўзлар ҳақиқатдан узоқ, эканини маълум қилди.

Ҳусанхўжа Обидов Тошкентда ўтказилган брифингда Ўзбекистонда банклар ва уларнинг филиаллари одатдаги тартибда ишлаётганини айтди.

Обидовга кўра, фақатгина банк биносидан ташқарида жойлашган банк кассалари ва валюта айирбошлаш шохобчалари фаолияти вақтинчалик тўхтатилган.

ИИВ Ўзбекистонда велосипедда юриш тақиқланиши ҳақидаги хабарларни рад қилди

Ўзбекистон Ички ишлар вазирлиги мамлакатда коронавирус тарқалишини олдини олиш чоралари доирасида велосипедда юриш тақиқланиши ҳақида ижтимоий тармоқларда тарқалган хабарларни рад қилди.

5 апрелдан бошлаб Ўзбекистонда велосипедда юриш тақиқланиши ҳақидаги хабарлар ижтимоий тармоқда мунозарага сабаб бўлганди.

Ички ишлар вазирлиги бу хабар ҳақиқатга тўғри келмаслиги, хабар тарқатаётганлар вазирлик сайтида берилган расмий хабарларга таяниши кераклигини билдирди.

Айни пайтда Ўзбекистонда 24 мартдан бошлаб кучайтирилган тартиб амалда қолмоқда.

Йирик шаҳарлар, вилоятлараро ва туманлараро транспорт қатновлари тўхтатилган.

30 мартдан шахсий транспортдан фойдаланишга чеклов жорий этишшга қарор қилинганди.

Бу чеклов 20 апрелгача амалда қолиши айтилган.

Карантинга қарамай армиядан қайтган ўғлига зиёфат қилиб берган ота жазоланди

Карантинга қарамай Жиззахда ота армиядан қайтган ўғлига зиёфат қилиб берган.

Бу ҳақда Ўзбекистон Ички ишлар вазирлиги хабар берди.

Вазирлик расмий сайтида билдирилишича, 3 апрель куни Жиззах вилоятининг Арнасой туманидаги Чўлқувар қишлоғида 53 яшар ота ҳарбий хизматни ўтаб қайтган ўғлининг 24 нафар синфдошини йиғиб зиёфат уюштирган.

Ички ишлар вазирлиги ахборот хизматининг хабар беришича, карантин тартибига бўйсунмаган ота Маъмурий жавобгарлик тўғрисидаги кодекснинг 54-моддасига асосан жавобгарликка тортилган.

ИИВ маълумотига кўра, Ўзбекистонда карантин карантин эълон қилинган 27 мартдан буён мамлакат бўйича карантин қоидаларига амал қилмаслик билан боғлиқ 25057 та ҳолат аниқланган.

Қибрайдиги сиҳатгоҳда карантинда сақланаётган 7 одам 15 суткага қамалди (ВИДЕО)

Кибрайдаги сиҳатгоҳда карантинда ушлаб турилганлар: "Қийналиб кетдик!"
Илтимос кутинг

Айни дамда медиа-манба мавжуд эмас

0:00 0:00:05 0:00

Тошкент вилоятининг Қибрай туманидаги "Энергетиклар” сиҳатгоҳида сақланаётган 7 нафар фуқаро карантин қоидаларини бузгани учун 15 суткага қамалди.

"Дарё" сайтининг Олий суд матбуот хизматига таяниб 3 апрелда хабар беришича, уларнинг барчаси Бирлашган Араб Амирликларидан олиб келинган ва карантинга олинган эди.

“Улар ҳар хил уятли сўзлар билан ушбу сиҳатгоҳда сақланаётган бошқа фуқаролар ва карантин тартибини назорат қилувчи ходимлар олдида бақир-чақир қилишган, уларнинг тинчлигини бузган. Улар тинчликни таъминлаш учун келган ички ишлар органлари ходимларининг қонуний талабларини бажармасдан, жамоат жойида уларни ҳам уятли сўзлар билан сўкиб, майда безорилик қилган”, дейилади расмий хабарда.

7 нафар фуқарога нисбатан иш Юқори Чирчиқ туман маъмурий судида 3 апрель куни бўлиб ўтган. Улар Маъмурий жавобгарлик тўғрисидаги кодекснинг 54-моддаси (эпидемияларга қарши курашиш қоидаларини бузиш), 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) асосида 15 суткага қамалган.

Озодлик радиоси 2 апрель куни мазкур сиҳатгоҳда карантинда сақланаётганлар билан боғлиқ вазият ҳақида лавҳа берган эди. Ўшанда Дубайдан олиб келиниб, карантинда сақланаётганлар Озодликка 14 кун деб айтилган карантин муддати тугаган бўлсада¸ уйларига қўйиб юборилмаётганига изоҳ талаб қилаётганларини айтган эдилар.

"Энергетик сиҳатгоҳи"да 17 март куни Дубайдан учиб келган аксари тужжорлар бўлган 254 ўзбекистонлик карантинда ушлаб турилибди.

Сиҳатгоҳ раҳбарияти ҳам¸ Ўзбекистон Санитария-эпидемиологик осойишталик агентлиги расмийлари ҳам "Энергетик сиҳатгоҳи"да 14 кунлик карантинга олинганларнинг айтилган муҳлат тугаганига қарамай¸ нега ҳанузгача ушлаб турилганига изоҳ бермади.

ТИВ: АҚШ Ўзбекистонга коронавирусга қарши кураш учун 848 минг доллар берадиган бўлди

Расмий хабарда айтилишича, бу борадаги музокаралар 31 март куни бўлган.

АҚШ Ўзбекистонга коронавирусга қарши курашиш учун 848 минг доллар беришни режалаштирмоқда. Бу ҳақда 3 апрель куни Ўзбекистон Ташқи ишлар вазирлиги хабар берди.

Хабарда айтилиишча, Ўзбекистоннинг АҚШдаги элчиси Жавлон Ваҳобов 31 март куни Давлат департаменти вакиллари билан коронавирусга қарши курашда Ўзбекистонга моддий-техник ёрдам кўрсатиш масаласини муҳокама қилган.

АҚШ Давлат департаменти расмийлари берган маълумотга қараганда, АҚШ Ўзбекистоннинг коронавирусга қарши курашдаги эҳтиёжларини ҳисобга олган ҳолда 848 минг доллар ажратиб беришни режалаштирмоқда.

“Бу маблағ АҚШ халқаро тараққиёт агентлигининг COVID-19га қарши кураш ҳаракатларини қўллаб-қувватлаш дастури доирасида Қизил Хоч ва Қизил Ярим Ой ҳамда Жаҳон соғлиқни сақлаш ташкилотига берадиган навбатдаги транши ҳисобланади”, дейилади расмий хабарда.

Молиялаштириш кенг миқёсли тестдан ўтказиш учун лабораторияларни жиҳозлаш, Covid-19 устидан эпидемологик назоратни яхшилаш, инфекцияни профлактика қилиш ва тарқалишини назорат қилишни таъминлашда тиббиёт муассасаларининг салоҳиятини ошириш, тезкор ёрдам кўрсатиш тизими, зарарланган ҳолатларни аниқлаш ва даволаш, шунингдек, вирус ҳақидаги дезинформацияга қарши туришга йўналтирилади.

Карантинда 100 мингдан зиёд одам сақланмоқда

Чирчиқдаги оромгоҳда бир хонага 5 кишидан жойлаштирилган

Ҳозирда Covid-19 боис карантинга олинганлар сони мамлакат бўйича жами 100 мингдан зиёдни ташкил қилади.

Бу ҳақда АОКА ҳузуридаги штабда ўтган брифингда Санитария-эпидемиология назорати давлат инспекцияси бошлиғи Нурмат Атабеков маълум қилди:

“Касалликнинг инкубацион даври 14 кун эканлигини эътиборга олсак, улар орасидан касаллик чиқишига ҳам тайёр бўлишимиз керак”.

Бугун Самарқанддаги “Дўстлик” оромгоҳида карантинда сақланганлардан 292 нафариига уйига рухсат берилди.

Уларнинг барчаси хориждан қайтган ва 14 кун карантинда сақланганлардир. Ўтказилган текширув ва таҳлиллар натижасида уларнинг бирортасида ҳам коронавирус инфекцияси топилмаган.

Хориждан чартер рейслари билан олиб келинганлар мамлакатнинг бир нечта ҳудудида ташкил қилинган карантин марказларида сақланмоқда.

Айрим карантиндагилар шароитлар ёмонлигидан шикоят қилишмоқда.

Жумладан, Москвадан учиб келгач, Чирчиқдаги болалар оромгоҳига жойлаштирилган ўзбекистонликлар шароит ёмонлигидан шикоят қилганди.

Қибрай санаторийсида 17 кундан буён карантинда сақланаëтганлар жанжал кўтарди.

Озодлик карантинга олинган баъзи шахслар 14 кунлик муддат тугамасидан сиҳатгоҳлардан қочишга урингани ҳақида ҳам хабар берган эди.

Хусусан¸ расмийларга кўра¸ 16 март куни Жанубий Корея ва Россиядан Самарқандга учиб келган ва карантинга олинганидан 4 кун ўтиб қочишга уринган икки шахсга нисбатан жиноят иши очилган.

Ўзбекистон қонунчилигига кўра, карантин қоидаларини бузганлар 22 миллион сўмдан жаримага тортилиши ёки беш йилгача бўлган муддатга қамалиши мумкин.

Ўзбекистонда Covid-19 тестларини ишлаб чиқариш бошланади

Ҳозирда ўзбек мутахассисларининг тестлари синовдан ўтказилмоқда

Ўзбекистонда жорий ой охирида Covid-19 тестларини ишлаб чиқариш бошланади.

Бу ҳақда АОКА ҳузуридаги штабда ўтган брифингда Санитария-эпидемиология назорати давлат инспекцияси бошлиғи Нурмат Атабеков маълум қилди.

Атабековга кўра, айни пайтда маҳаллий мутахассислар ишлаб чиқарган тест тизимлари тажрибада синаб кўрилмоқда.

Соғлиқни сақлаш вазирлиги ҳузуридаги Санитария-эпидемиологик осойишталик агентлиги маълумотларига кўра, бугунги кунда Ўзбекистонда полимераза занжирли реакциясини аниқлайдиган 200 мингдан ортиқ тест мавжуд.

Ўтган ойда Хитойга 100 минг тестга буюртма берилгани ва расмий Пекин Ўзбекистонга 2,5 минг тестни бепул бермоқчилиги хабар қилинганди.

Карантиндаги 292 беморга уйига рухсат берилди

“Дўстлик” оромгоҳида карантинда сақланганлардан 292 нафарига уйига рухсат берилди.

Самарқанддаги “Дўстлик” оромгоҳида карантинда сақланганлардан 292 нафарига уйига рухсат берилди.

Уларнинг барчаси хориждан қайтган ва 14 кун карантинда сақланган шахслардир. Ўтказилган текширув ва таҳлиллар натижасида уларнинг бирортасида ҳам коронавирус инфекцияси топилмаган.

Кoronavirusinfo хабарига кўра, 292 киши махсус ажратилган автобусларда уйларига элтиб қўйилган.

Соғлиқни сақлаш вазирлигининг 3 апрель соат 10.00 да берган маълумотида айтилишича, Ўзбекистонда коронавирус инфекцияси аниқланган шахслар сони 16 тага ошиб, 221 нафарни ташкил этмоқда.

3 апрель ҳолатига кўра, 25 бемор соғайган. Жумладан, пайшанба куни коронавирус инфекциясига чалинган беморларнинг яна 13 нафари бутунлай тузалди.

Бош санитар инспектор вазият мураккаблашиб бораётганини айтди

Ўзбекистонда коронавирус инфекцияси аниқланган шахслар сони 16 тага ошиб, 221 нафарни ташкил этмоқда.

“Коронавирусга чалинган беморларнинг 17 нафарида пневмония белгилари кузатиляпти, 4 нафарининг аҳволи оғир, икки нафари эса нисбатан оғир деб баҳоланмоқда”, - деди 3 апрель куни "Ўзбекистон 24" телеканали орқали қилган чиқишида Вазирлар маҳкамаси ҳузуридаги санитария-эпидемиология назорати давлат инспекцияси бошлиғи, Бош санитар инспектор Нурмат Отабеков.

“Вазият мураккаблашиб бораётганини ҳали тўлиқ англаб етмадик, чамаси. Ҳалигача карантин талабларини бузаётган, бемақсад кўчаларда кезиб юриш, тиббиёт ходимларининг тавсияларига амал қилмаслик ҳолатлари учраб турибди. Минг афсуски, касаллик аломатлари кузатилсада, бепарволик билан қараб, ўз вақтида шифокорларга мурожаат қилмай, аҳволи оғирлашгандан кейин шифохонага мурожаат қилаётганлар ҳам бор”, — деди Нурмат Отабеков.

Соғлиқни сақлаш вазирлигининг 3 апрель соат 10.00 да берган маълумотида айтилишича, Ўзбекистонда коронавирус инфекцияси аниқланган шахслар сони 16 тага ошиб, 221 нафарни ташкил этмоқда.

2 апрель куни 24 одамда коронавирус аниқлангани маълум бўлди ва беморлар сони 205 нафарга етган эди.

3 апрель ҳолатига кўра, 25 бемор соғайган.

Коронавирусга чалинганлар 3 апрель куни эрталаб яна 16 нафарга кўпайди

Тошкент кўчаларидан биридаги манзара.

Соғлиқни сақлаш вазирлигининг 3 апрель соат 10.00 да берган маълумотида айтилишича, Ўзбекистонда коронавирус инфекцияси аниқланган шахслар сони 16 тага ошиб, 221 нафарни ташкил этмоқда.

2 апрель куни 24 одамда коронавирус аниқлангани маълум бўлди ва беморлар сони 205 нафарга етган эди.

3 апрель ҳолатига кўра, 25 бемор соғайган. Жумладан, пайшанба куни коронавирус инфекциясига чалинган беморларнинг яна 13 нафари бутунлай тузалди.

Соғлиқни сақлаш вазирлигининг хабар қилишича, уларнинг 12 нафари Тошкентдаги Вирусология илмий-текшириш институти клиникасидан, 1 нафари эса Хоразм вилоятидаги юқумли касалликларга ихтисослашган шифохонадан соғайиб чиққан.

Instagramʼда “зўравонлик билан таҳдид қилган” шахслар ушланди

Тошкент вилоят ИИББнинг 3 апрель куни билдиришича, Instagramʼ ижтимоий тармоғида жонли мулоқот пайтида одамларни ҳақорат қилган ва зўравонлик билан таҳдид қилган уч нафар шахс қўлга олинди.

Расмий маълумотда айтилишича, бу таҳдидни Instagramʼда Greenrapoff номли фойдаланувчиси ўз саҳифасида шериклари билан январь ойларида амалга оширган. Бу видео ижтимоий тармоқларда тарқалиб, кенг муҳокамага сабаб бўлган.

“Мазкур ҳолат юзасидан Тошкент вилояти ИИББ томонидан тезкор равишда суриштирув ишлари олиб борилиб, ушбу шахслар Тошкент шаҳар Шайҳонтоҳур туманида яшовчи 2000 й.т. Шоҳжаҳон А. ва 1999 й.т. Жамшид Ҳ.лар эканлиги аниқланиб, ушланган. Видеодаги ҳолат шу йилнинг январь ойларида Тошкент шаҳрида бўлиб ўтган. Ушбу шахслар билан ИИББда профилактик суҳбат ўтказилиб, хатти-ҳаракатлари юзасидан тўпланган ҳужжатлар қонуний чора кўриш учун тегишлиги бўйича Тошкент шаҳар ИИОга юборилди”, дейилади расмий хабарда.

Ўзбекистон Қирғизистонга жўнатган инсонпарварлик ёрдами тўғрисида батафсил маълумот берилди

Инсонпарварлик ёрдами 17та вагондан иборат.

Қирғизистон ҳукумати Ўзбекистон жўнатган инсонпарварлик ёрдами 2 апрель куни етиб келганини билдирди ва жўнатилган маҳсулотлар бўйича маълумот берди.

Қирғиз ҳукуматининг билдиришича, Ўзбекистондан 17та вагонда гуманитар ёрдам келган. Бу ёрдам 1000 тонна ун, 7 минг комплект тиббий ҳимоя кийимлари, 95 респиратор, 20 минг тиббий қўлқоп, 500 кўз ойнак, 200та пирометр, 7 мингта бир марталик респиратордан иборат.

“Бу юк 17та вагонга барча санитар-эпидемиологик талаблар сақланган ҳолда юкланган”, дейилади ҳукумат маълумотида.

Ҳукумат гуманитар ёрдамнинг озиқ-овқатдан иборат қисми Фавқулодда ҳолатлар вазирлиги омборхонасига туширилганини ва тегишли давлат идоралари билан келишилган ҳолда кам таъминланган ва ёрдамга мухтож оилаларга бўлиб берилишини билдирди.

1 апрель куни президент Шавкат Мирзиёев ташаббуси билан Қирғизистон Республикасига коронавирус “COVID-19” касаллигини бартараф этишга кўмаклашиш мақсадида инсонпарварлик ёрдами жўнатилгани хабар қилинганди. Ўша куни Ўзбекистон Афғонистонга ҳам темир йўл орқали инсонпарварлик ёрдами жўнатган.

29 март куни Бош вазир Абдулла Арипов топшириғига асосан Ўшга коронавирусга қарши кураш учун зарур бўлган тиббий воситалар жўнатилгани хабар қилингганди. Ўшанда 10 мингта тиббиёт маскаси ва 900та ҳимоя костюми Фарғона вилояти ҳокими Шуҳрат Ғаниев томонидан, 4800та экспресс-тестлар ва реагентлар Андижон вилояти ҳокими Шуҳрат Абдураҳмонов томонидан жўнатилган.

Айни пайтда 1 апрель куни Ўзбекистон Осиё тараққиёт банкидан давлат бюджетини қувватлаш мақсадида 1 миллиард АҚШ доллари миқдорида қўшимча қарз сўрагани хабар қилинди.

Коронавирус пандемияси бошланганидан буëн ҳозиргача Ўзбекистон ҳукумати Осиë тараққиëт банкидан вирус тарқалишини тўхтатиш учун 200 миллион доллар грант олган.

Коронавирусга чалинганлар сони 205 нафарга етди.

Соғлиқни сақлаш вазирлиги хузуридаги Санитария-эпидемиологик осойишталик агентлиги томонидан 2 апрель ҳолатига асосан ишлаб чиқилган инфографика.

Ўзбекистонда 3 апрелга ўтар кечаси яна 15 кишида коронавирус аниқланди. Бу билан коронавирусга чалинган одамлар сони 205 нафарга етди.

Соғлиқни сақлаш вазирлиги 2 апрель куни Тошкент вақти билан соат 10да берган маълумотида Ўзбекистонда коронавирус инфекцияси аниқланган шахслар сони 6 тага ошгани ва коронавирусдан касалланганлар сони 187 нафарни ташкил этганини билдирганди.

Шундан сўнг вазирлик 2 апрель куни тушга яқин уч кишида коронавирус аниқланиб, беморлар сони 190га етганини хабар қилган.

Ҳисоб қилинса, 2 апрель куни 24 одамда коронавирус аниқлангани маълум бўлади.

Пайшанба куни коронавирус инфекциясига чалинган беморларнинг яна 13 нафари бутунлай тузалди.

Соғлиқни сақлаш вазирлигининг хабар қилишича, уларнинг 12 нафари Тошкентдаги Вирусология илмий-текшириш институти клиникасидан, 1 нафари эса Хоразм вилоятидаги юқумли касалликларга ихтисослашган шифохонадан соғайиб чиққан.

1 апрель куни 4 нафар беморнинг соғайгани ҳам айтилди. Бу билан Ўзбекистонда коронавирусдан соғайган беморлар сони 12 нафарга етганди. 2 апрель куни соғайганлар сони 25 нафар бўлди. 2 нафар бемор вафот этди.

Энергетика вазирлиги: Яқин келажакда электр энергияси нархининг оширилиши режалаштирилмаган

Ўзбекистонда электр энергияси ишлаб чиқариш ҳаражатлари уни истеъмол қилишга бўлган тўловга қараганда, анча юқори.

Бу ҳақда 2 апрель куни Энергетика вазирлиги маълум қилди. Вазирликнинг билдиришича: “давлат-хусусий шериклиги электр энергиянинг таннархини пасайтиришга ёрдам беради ва натижада ўрта ва узоқ муддатли истиқболда қулай тариф сиёсатини таъминлашга хизмат қилади”.

Энергетика вазирлиги узоқ муддатли тариф сиёсатини ишлаб чиқиб, бугунги кунда соҳада ривожлантирилаётган давлат-хусусий шериклиги электр энергия қийматига ижобий таъсир кўрсатишини билдирган ва “Яқин келажакда электр энергияси нархининг оширилиши режалаштирилмаган”, деб таъкидлаган.

Айни пайтда Энергетика вазирлиги сайтининг “Энергетика вазирлиги жавоб беради” рукнида” Ўзбекистонда электр энергияси ишлаб чиқариш ҳаражатлари уни истеъмол қилишга бўлган тўловга қараганда, анча юқори экани билдирилган.

“Ҳисоб-китобларга кўра, бугунги кунда бир киловатт соат электр энергия ишлаб чиқаришга 403 сўм сарф қилинади. Бугун аҳоли 1 кВт учун қарийб 295 сўм тўлайди. Яъни аҳоли учун электр энергия нархи ўн йил илгари бўлганидек, давлат томонидан белгиланади. Агарда шу тариқа давом этса, тармоқ нафақат ўн йиллар, балки бир неча йилда мутлақо норентабел соҳага айланади, сармоядорлар учун жозибадор бўлмай қолади ва ўз навбатида, бутунлай таназзулга учрайди. Ҳеч бир маданий жамият бунга йўл қўймайди”, дейилади расмий сайтда.

3 апрелдан бошлаб дизель ёқилғиси яна арзонлатилди

Бир ой ичида дизель ёқилғиси икки марта арзонлатилди

Энергетика вазирлиги 3 апрелдан бошлаб Ўзбекистонда ишлаб чиқарилган дизель ёқилғиси яна 300 сўмга арзонлатилганини билдирди. Сўнгги бир ой ичида бу билан дизель 500 сўмга арзонлади.

Бундан аввал 1 март кунидан бошлаб “Ўзбекнефтгаз” АЖнинг “UNG” миллий бренди остидаги ёқилғи қуйиш шохобчалари тармоғида дизель ёнилғисининг нархи 200 сўмга камайтирилган эди.

Айни пайтда дизель ёқилғисининг нархи бир литрга 7 минг сўм қилиб белгиланди.

“Нархлар масаласида шуни таъкидлаш керакки, “Ўзбекнефтгаз” ёқилғи қуйиш шохобчалари тармоғи орқали сотиладиган дизель ёқилғисининг нархи хорижий компаниялар томонидан сотилаётган дизель ёқилғиси нархидан 11,5% арзондир”, дейилади расмий хабарда.

Энергетика вазирлигининг билдиришича, “Ўзбекнефтгаз” нархларни босқичма-босқич камайтириб боришда давом этади.

Ўзбекистонда 30 мартдан бошлаб Бухоро нефтни қайта ишлаш заводи базасида Ўзбекистонда биринчи марта Евро-4 ва Евро-5 стандартидаги дизель ёқилғиси ишлаб чиқариш бошлангани хабар қилинган эди.

Коронавирусдан соғайганлар сони 25 кишига етди

1 апрель куни тузалганлар сони 12 нафар эди.

Коронавирус инфекциясига чалинган беморларнинг яна 13 нафари бутунлай тузалди.

Соғлиқни сақлаш вазирлигининг хабар қилишича, уларнинг 12 нафари Тошкентдаги Вирусология илмий-текшириш институти клиникасидан, 1 нафари эса Хоразм вилоятидаги юқумли касалликларга ихтисослашган шифохонадан соғайиб чиққан.

1 апрель куни 4 нафар беморнинг соғайгани ҳам айтилди. Бу билан Ўзбекистонда коронавирусдан соғайган беморлар сони 12 нафарга етганди. 2 апрель куни соғайганлар сони 25 нафар бўлди. 2 нафар бемор вафот этди.

Сўнгги расмий маълумотларга қараганда, 2 апрель ҳолатига кўра, 190 киши коронавирусга чалинган.

"Адолат": ЕОИИга аъзо бўлиш Ўзбекистон иқтисодига 2 миллиард доллар зиён келтиради

ЕОИИга қўшилиш масаласи Ўзбекистоннинг Россия билан алоқалари мустаҳкамлана бошлаши ортидан кун тартибига қўйилди.

«Адолат» социал-демократик партиясининг Олий Мажлис Қонунчилик палатасидаги фракцияси Ўзбекистоннинг Евросиё иқтисодий иттифоқи билан ҳамкорлиги масаласида ўтказилган видеоконференцияда, Тошкентнинг ташкилотга аъзо бўлиши ортидан мамлакат иқтисоди 2 миллиард доллар зиён кўриши тўғрисидаги хулосани эълон қилди.

Хулосада айтилишича, ЕОИИга аъзо бўлиш натижасида автомобилсозлик, озиқ-овқат, фармацевтика ва бошқа соҳаларда инқироз юзага келиши мумкин.

Партия матбуот хизмати эълон қилган хабарда айтилишича, хулосада “ЕОИИнинг энг асосий аъзоси (иттифоқ иқтисодий потенциалининг салкам 85 фоиз ташкил этувчи) Россия ҳозирги кунда халқаро санкциялар ва босим остида. Бу унинг иқтисодиётига салбий таъсир кўрсатмоқда, охирги 2 йилда рубль бир неча баравар қадрсизланган. Ушбу мамлакат билан битта иттифоқ доирасида ҳамкорликка киришиш келгусида бизнинг иқтисодиётимизга ҳам салбий таъсирини ўтказади”, деб ёзилган.

Айни пайтда партия "аъзолик ЕОИИ давлатларидаги мигрантлар масаласида айрим ижобий натижаларни келтириб чиқаради”, деб ҳисоблайди. Хулосада айтилишича, бугунги кунда Россияда 2,5 миллиондан ортиқ ўзбекистонлик меҳнат муҳожирлигида юрибди.

"Аъзоликдан сўнг фуқаролар ушбу давлатларда патент олмасдан ишлаш имкониятига эга бўлади ва пул жўнатмалари ҳозирги 4-5 миллиарддан 7-8 миллиард АҚШ долларига етиши кутилмоқда”, дейилади хулосада.

Март ойининг бошларида эса Ўзбекистон ЕОИИга кузатувчи-давлат мақомида қўшилиши маълум бўлганди.

Евроосиё иқтисодий иттифоқи аввал Белорусдан, Қозоғистон ва Россия Божхона бирлашмаси сифатида тузилган. 2015 йилдан кейин мазкур ташкилотга Армения ҳамда Қирғизистон қўшилиб, ҳозирги номини олган.

Тўққизта банк жисмоний шахсларга кредит таътили эълон қилгани тўғрисида хабар берилди

"Фоиз тўловлари вақтида амалга оширилмаганлиги учун пеня ва жарима ҳисобланмайди", демоқда банклар.

Ўзбекистон Миллий банки жисмоний шахсларнинг барча кредит турлари бўйича апрель, май, июнь ойидаги кредит тўловлари учун таътил эълон қилди. Миллий банкнинг 2 апрель куни расман билдиришича, бу ойлар учун тўловлар қолган тўлов муддатига тенг равишда тақсимланади.

“Фоизлар ўз вақтида тўланмаганлиги учун жарима (пеня) ҳисобланмайди. Кредитни муддатидан аввал қўшимча тўловларсиз сўндириш имкони мавжуд”, дейилади хабарда.

Айни пайтда яна 8та банк -Ўзсаноатқурилишбанк, Асакабанк,Туронбанк, Алоқабанк, Ҳамкорбанк, Агробанк, Микрокредитбанк ва ZiraatBank ҳам кредит таътили эълон қилган банклар қаторида экани хабар қилинди.

“Ушбу банклар жисмоний шахслар учун кредит шартномасига бир томонлама ўзгартириш киритишмоқда ва кредитлар бўйича 2-3 ойлик имтиёзли давр беришмоқда. Фоиз тўловлари вақтида амалга оширилмаганлиги учун пеня ва жарима ҳисобланмайди”, дейилади хабарда.

Коронавирусдан даволанаётганларнинг энг кўпи Тошкентда (Инфографика)

COVID-19 коронавирус инфекцияси бўйича Ўзбекистондаги эпидемик вазият тўғрисида батафсил маълумот.

Маълумот Соғлиқни сақлаш вазирлиги хузуридаги Санитария-эпидемиологик осойишталик агентлиги томонидан 2 апрель ҳолатига асосан ишлаб чиқилган.

Ўзбекистонда бир кунда 4,3 млн. дона тиббий ниқоб ишлаб чиқарилаётгани айтилди

АОКА ҳузуридаги штабда Фармацевтика тармоғини ривожлантириш Агентлиги директори Сардор Кариев иштирокида брифинг ўтказилди.

Брифингда маълум қилинишича, жорий йилнинг 1 март ҳолатига кўра жами 15та тиббий ниқоб ишлаб чиқарувчи корхона бўлган ва уларнинг кунлик ишлаб чиқариш қувватлари 450-500 минг донани ташкил этган.

1 апрелга келиб тиббий ниқоб ишлаб чиқарувчи корхоналарнинг сони 190 тага етказилган ва уларнинг умумий ишлаб чиқариш қувватлари 4,3 млн. донага кўтарилган.

ССВнинг буйруғи билан ниқоблар тиббий буюмлар рўйхатидан чиқарилган.

Шу боис ҳозирги кунда уларни ишлаб чиқариш ва реализация қилиш учун алоҳида лицензия талаб этилмайди.

Президент Шавкат Мирзиëев 26 март куни ижтимоий ва тиббий муҳофазани кучайтириш бўйича қўшимча чора-тадбирлар ҳақида ўтказган йиғилишда тиббиёт ниқоблари ишлаб чиқаришни кунига 5 миллион донага етказиш бўйича топшириқ берган эди.

Э. Боситхонова кўнгилли хайриячилар устидан 500га яқин шикоят тушганини айтди

Хайрия учун ҳозирланган озиқ-овқатлар

АОКА ҳузуридаги штабда Маҳалла ва оилани қўллаб-қувватлаш вазири ўринбосари Элмира Боситхонова иштирокида брифинг ўтказилди.

Брифингда асосан, "иммунитети нисбатан паст бўлган аҳоли тоифалари — кексалар ва нуронийлар, ногиронлар, якка ёлғиз яшовчи фуқароларнинг" хонадонларига турли ҳомийлар, волонтерлар томонидан хайрия маҳсулотларининг карантин қоидаларига зид равишда кириб бораётгани ҳақида гап борди.

"Кейинги 5 кунда Вазирликка келиб тушган мурожаатларни таҳлил қилиб кўрдик — 494 та шу мазмунда мурожаат бўлган. Ҳақиқатда, оилаларни, одамларни, айниқса, хонадонимиз фаришталари — дуогўйларимизни асрашимиз керак. Бундан ташқари, айрим хонадонларга устма-уст ёрдам берилгани ҳолда, айрим хонадонлар эътибордан четда қолаётгани ҳақида ҳам 200 га яқин норозилик мурожаатлари бўлди", деди Боситхонова.

Унинг айтишича, бу ҳолатни инобатга олган ҳолда, 1 апрелдан Тошкент, Нукус шаҳарлари ва вилоятлар марказларида “ўзини яккалаш” (само изоляция) ҳаёт тарзи жорий этилган ва хайрияни макразлашган тартибда етказиш қарори олинган.

1 апрель куни президент топшириғи билан Ўзбекистонда карантин қоидалари янада кескинлаштирилиб, қатор чекловлар жорий этилди.

65 ёшдан катталарнинг уйда чиқмаслиги билан бирга якка тартибдаги хайрия акциялари ҳам 1 апрелдан вақтинча тақиқланди.

Бош санитар инспектор ҳаво ҳарорати исиб кетиши билан коноравирус вазияти яхшиланишига умид билдирди (ВИДЕО)

Коронавирусдан ҳимояланиш учун айрим одамлар мана шундай чораларни ҳам кўрмоқда.

АОКАда 2 апрель куни ўтказилган брифингда Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков коронавирус инфекцияси ҳаво ҳарорати исиб кетиши билан коронавирус инфекцияси йўқола бошлашига умид билдирди.

“Айрим тадқиқотларда коронавирус инфекцияси ҳаво ҳарорати -2 ва +10 даражагача бўлган пайтда фаоллашиши аниқланди. Демак, умид қиламизки, ҳаво ҳарорати исиб кетиши билан вазият яхшиланади”, деди Отабеков.

Соғлиқни сақлаш вазирлигининг 2 апрель куни тушга яқин билдиришича, яна 9 одамда коронавирус аниқланиб, беморлар сони 190га етди.

2 апрелдаги сўнгги маълумотларга қараганда, дунёнинг 203 давлатида коронавирусга чалинганлар сони 935 840 нафарни ташкил этди. Улардан 194 286 нафари соғайган, 47 241 нафари вафот этган, 35 478 нафар бемор оғир аҳволда.

Коронавирусдан касалланганлар сони 190 нафарга етди

1 апрель куни коронавирусдан соғайган тўрт одамнинг барчаси ёшлардир.

Соғлиқни сақлаш вазирлигининг 2 апрель куни тушга яқин билдиришича, яна учта одамда коронавирус аниқланиб, беморлар сони 190га етди.

Вазирлик Тошкент вақти билан соат 10да берган маълумотида Ўзбекистонда коронавирус инфекцияси аниқланган шахслар сони 6 тага ошгани ва коронавирусдан касалланганлар сони 187 нафарни ташкил этганини билдирганди.

1 апрель соат 21.40даги ҳолатга кўра, коронавирус инфекцияси аниқланган шахслар сони 9 тага ошиб, 181 нафарни ташкил этганди.

Шу куни 4 нафар беморнинг соғайгани ҳам айтилди. Бу билан Ўзбекистонда коронавирусдан соғайган беморлар сони 12 нафарга етди. 2 нафар бемор вафот этди.

Афғонистонга ҳам инсонпарварлик ёрдами жўнатилди

Афғонистонга коронавирус тарқалишининг олдини олишда кўмак бериш мақсадида инсонпарварлик ёрдами жўнатилди.

Маҳаллий матбуотнинг ёзишича, Ўзбекситон Афғонистонга коронавирус тарқалишининг олдини олишда кўмак бериш мақсадида инсонпарварлик ёрдами жўнатди.

Президенти Шавкат Мирзиёевнинг топшириғи асосида уюштирилган ёрдам 1 апрель куни Ангрен — Тошкент — Термиз — Мозори-Шариф йўналиши бўйлаб жўнатилди.

Инсонпарварлик ёрдами тиббий ниқоблар, ҳимоя комбинезонлари, касалликни аниқлашга ёрдам берадиган тепловизор, пирометрлар, ун, ёғ, гуруч, хўжалик совуни, афғон болалари учун кийим-кечаклардан иборат.

29 март ва 1 апрель кунлари Ўзбекистон Қирғизистонга ҳам шу каби маҳсулотлардан иборат инсонпарварлик ёрдамини жўнатган эди.

Давомини ўқинг

Кўрмай қолган бўлсангиз

XS
SM
MD
LG