Линклар

Шошилинч хабар
26 март 2019, Тошкент вақти: 06:59

Жиззах нефтни қайта ишлаш заводи қурилиши тўхтаб қолди


Иллюстратив сурат

Жиззах нефтни қайта ишлаш заводи қурилиши тўхтатилгани тўғрисида "Нефтегазинвест" директори ўринбосари Ҳусниддин Тўраевга таяниб, kun.uz хабар қилди.

Тўраевнинг айтишича, завод қурилишини қайта бошлаш Бухоро ва Фарғонадаги нефтни қайта ишловчи заводларида модернизация ишлари якунланиши билан боғлиқ. У лойиҳа концепциясида ўзгаришлар бўлганига изоҳ бериб ўтган.

"Бухоро ва Фарғонадаги нефтни қайта ишлаш заводларини модернизация қилиш бўйича қарор қабул қилинган. Заводлар фаолиятини такомиллаштириш бўйича концепция 2013-14 йиллардаёқ ишлаб чиқилганди. Айни пайтда ишни амалга оширувчи лицензиатлар билан музокаралар олиб борилмоқда. Биз модернизация ҳисобидан Евро-5 стандарти бўйича маҳсулот ишлаб чиқариш ҳажмини оширишни кўзлаяпмиз. Бундан кейин Жиззах НҚЗга оид масалалар ҳал қилинади", - деган Ҳусниддин Тўраев.

2,2 миллиард долларга баҳоланган Жиззах нефтни қайта ишлаш заводи 2021 йилда ишга тушгач, йилига 3,7 миллион тоннадан зиёд мотор ёнилғиси, 700 минг тоннадан зиёд авиакеросин, 300 минг тонна бошқа маҳсулотлар ишлаб чиқариши айтилганди. Заводни "Газпром"нинг шуъбаси — Enter Engineering қуриши кўзда тутилган эди.

2017 йил апрелида Президент Шавкат Мирзиёев иштирокида бўлиб ўтган Жиззах нефтни қайта ишлаш заводи қурилишига тамал тоши қўйиш маросимида "бу янги завод, ҳеч шубҳасиз, нафақат Ўзбекистон, балки Марказий Осиё минтақасидаги ноёб саноат объектларидан бирига айланиши" таъкидланган эди.

Аввалроқ Жиззах вилоятида амалга оширилиши режалаштирилган яна бир лойиҳа — Peugeot-Citroen автозаводи қурилиши ҳам тўхтаб қолгани ҳақида хабар берилган. Ушбу автозавод 2019 йил январидан микроавтобус ва енгил тижорий авто ишлаб чиқаришни бошлаши керак эди.

XS
SM
MD
LG