Россия ташқи ишлар вазири Сергей Лавров Норвегияда Россия парламенти ходими қўлга олинганини қоралади. Вазир ходимнинг жосусликда айбланаётганини пропагандага тенглаштирди.
25 сентябрь куни БМТ бош ассамблеяси мажлисида қатнашиш учун Нью-Йоркка борган Лавров норвегиялик мухбирнинг саволларига жавобан:
- Миянгиз пропаганда билан тўлган. Фуқаромизга нима бўлганини тушунишни хоҳлаймиз, - деди, - Уни Норвегия парламенти чақирганини биласизми ўзи? Норвегия меҳмондўстлиги ҳар қандай рекорддан устун келади.
Россия парламентининг ахборот технологиялари бўйича маслаҳатчиси Михаил Бочкарев 21 сентябрь куни Осло яқинида ноқонуний тарзда разведка билан шуғулланишда айбланиб, қўлга олинган эди.
Норвегия матбуоти тарқатган хабарларга кўра, Бочкарев Европа парламентлари маъмуриятлари ўртасидаги ҳамкорликни яхшилашга бағишланган конференцияда ўзини шубҳали тутгани учун Норвегия расмийлари разведка хизматига мурожаат қилган.
Россия Ташқи ишлар вазирлиги Бочкарев қўлга олинганини кескин қоралаб, Норвегиянинг Россиядаги элчисини чақиртирди ва “аҳмоқона” айбловларни зудлик билан бекор қилишни талаб қилди.
Норвегия бош вазири Эрна Сульберг эса ушбу ҳолат сиёсат билан боғлиқ эмаслигини, балки полиция кўриб чиқаётган иш эканлигини таъкидлади.
