“Биз 20-25 кун ичида миллий терма жамоага хорижлик мураббий тайинланиши ҳақида айтиб ўтгандик. Бугунги кунда бир қанча номзодларни кўриб чиқдик, лекин, ҳозирча, бизнинг талабларимизга жавоб берадигани чиқмади. Аммо, изланишдамиз, музокаралар олиб бормоқдамиз”, – деган Ўзбекистон Футбол Федерацияси президенти Умид Аҳмаджонов бугун Тошкентда бўлиб ўтган мажлисда.
Бу ҳақда хабар қилган the-uff.com сайтига кўра, Ўзбекистон терма жамоасини Бирлашган Араб Амирликларидаги ўртоқлик учрашувига Рўзиқул Бердиев олиб боради. Ўзбекистон миллий терма жамоаси БАА билан 14 ноябрь куни меҳмонда ўртоқлик учрашуви ўтказади. Ўйин бўлиб ўтадиган стадион ва унинг вақти ҳақида кейинроқ хабар берилади.
