Озодлик радиоси туркман хизмати мухбири Худойберди Аллашов ва унинг онаси 2,5 ой деганда озодлика чиқарилди. Озодликка маълум қилинишича, журналист ва унинг онаси 15 февраль куни озодликка чиққан. Аллашов мамлакатда тақиқланган нос маҳсулотини сақлаганликда айбланиб, 3 декабрь куни қўлга олинган эди. Мазкур айблов бўйича у етти йилгача озодликдан маҳрум қилиниши мумкин эди. Озодлик манбасининг билдиришича, бунинг ўрнига суд мухбирни уч йиллик шартли жазога ҳукм қилган.
Манба Аллашов ҳозир Кўҳна Урганч шаҳрида уйида эканлигини, онаси ва ўзи яхши эканлигини айтди. Мухбирнинг уйини ҳуқуқ-тартибот идоралари ходимлари назорат қилмоқда. Журналистдан алоқа воситалари тортиб олингани учун унинг ўзи билан алоқага чиқишнинг иложи бўлмади.
Аллашов билан унинг онаси ва рафиқаси ҳам қўлга олинган эди. Кейинроқ унинг турмуш ўртоғи қўйиб юборилди, аммо уларнинг уйи назорат остида қолди.
Озодликка келиб тушган маълумотларга кўра, Аллашов қўлга олинганидан кейин уни полиция ходимлари қаттиқ дўппослаган ва электр токи ёрдамида қийноққа тутган.
Махсус хизмат ходимлари эса Аллашовнинг аёлини икки фарзанди олдида дўппослашган. Полиция Аллашов аёлини турмуш ўртоғининг қўлга олингани ҳақида хабар тарқатишда айблаб, сиқувга олган.
Сўнгги йилларда Туркманистонда Озодлик мухбирларини таъқиб қилиш кучайиб кетган. Ўтган йилнинг ноябрь ойида мазкур хизмат мухбири Сўлтан Очилова калтакланган эди.
Видеожурналист Сапармамед Непесқулиев эса тақиқланган дори-дармон маҳсулотларини сақлаганликда айбланиб, судланганидан сўнг уч йиллик қамоқ жазосини ўтамоқда. Ҳуқуқ фаолларига кўра, Непесқулиевга бу айблов унинг журналистик фаолияти туфайли ундан қасд олиш мақсадида қўйилган.
“Менинг фикримча, радио журналистларининг сўнгги бир неча йилдан бери таъқиб этилиши ва уларга нисбатан ноинсоний муносабатда бўлиниши қабул қилиб бўлмайдиган ҳолатдир”, деди Давлат котибининг Жанубий ва Марказий Осиё бўйича ёрдамчиси Ниша Бисвал 8 декабрь куни Озодлик радиосига берган суҳбатида.
Аввалроқ Европа хавфсизлик ва ҳамкорлик ташкилоти, АҚШнинг юқори лавозимли расмийлари ҳамда инсон ҳуқуқлари ташкилотлари Туркманистон ҳукуматини журналист Худойберди Аллашовни озод этишга чақирган эди.
