Линклар

Шошилинч хабар
29 март 2024, Тошкент вақти: 03:35

Ўзбекистонда айрим банклар Western Union пул ўтказиш тизимини ёпиб қўйди


"Ипотека" банки, Тошкент
"Ипотека" банки, Тошкент

Ўзбекистондаги тижорат банклари, жумладан, "Ипак Йўли", "Ипотека", "Асака", "Миллий”, “Халқ” ва “Ўзсаноатқурилиш” банкларида мазкур тизим бўйича мижозларга хизмат кўрсатиш 29 ноябрдан тўхтатилди. Озодлик суҳбатлашган айрим тижорат банклари ходимлари бундай тадбирнинг қўлланилишига Марказий Банкдан айтилган норасмий кўрсатма сабаб бўлган.

Озодлик суҳбатлашган "Ипак йўли" банкининг ўзини таништирмаган мулозими Western Union 2017 йил 10 январидан кейин яна ишга тушишини айтди:.

"Бизга Марказий Банкдан норасмий кўрсатма келди. Бажаришга мажбурмиз", - деди тижорат банки ходими.

"Ипотека" банки филиалларидан бирида пул ўтказмалари бўлимида ишлайдиган бошқа бир ходим фаразига кўра, бунга президент сайловлари сабаб бўлган бўлиши мумкин.

“Western Union келаси йил 10 январдан кейин ишлайди. Сайлов туфайли тизим ўчирилди”, - деди “Ипотека” банкининг ходими.

Аммо "Ҳамкор", "Капитал" каби хусусий банкларда Western Union тизими орқали пул бериш ва олиш ишлари ҳали ҳам амалга оширилаётгани маълум бўлди.

"Афтидан, Марказий банк кўрсатмаси асосан давлат таъсис қилган тижорат банкларига юборилган. Акс ҳолда, бошқа банклар ҳам бугундан эътиборан Western Union тизими орқали хизмат кўрсатишни тўхтатиб қўйишлари керак эди," дейди Озодлик мобил мухбири.

Айни пайтда, бошқа пул ўтказиш тизимлари, жумладан, Money Gram, Unistream, Zolotaya Korona каби тизимлар орқали пул бериш ва олиш ишлари барча банкларда давом этмоқда.

Сайёҳларни кутиб олишга тайёргарлик

Озодлик мобил мухбирининг хабар беришича, пойтахт Тошкентнинг марказий ҳудудларида махсус валюта айирбошлаш пунктлари барпо қилинмоқда.

"Бу пунктлар аҳолидан хорижий валюталарни давлат курсида сотиб олишга мўлжалланган, сотув эса умуман йўқ," дейди Озодлик мобил мухбири.

Ўзбекистон Марказий банки ходимининг маълум қилишича, янги айирбошлаш пунктлари асосан хорижий давлатлар ватандошлари учун ташкил этилмоқда.

Бундай тадбирнинг олинишига, унинг фаразига кўра, дунёнинг 27 мамлакати ватандошларига виза тартибини бекор қилишни назарда тутган президент фармони туртки бўлган.

Марказий банк ходимига кўра, янги фармоннинг келгуси йил 1 апрелидан кучга кириши ортидан Ўзбекистонга келадиган сайёҳлар сони ортиши кутилмоқда.

Шу билан бирга маҳаллий меҳмонхоналарда хорижий давлат ватандошларидан жой ва хизмат ҳақини фақат АҚШ долларида олиш белгилаб қўйилди, дея хабар берди Озодлик мобил мухбири.

XS
SM
MD
LG